Al‑jawaab le l‑Ibraaniyiin
Mugaddima
Al‑hamdulillah, Allah rahiim wa hanuun. Hu hajja be waasitat anbiya katiiriin wa fi l‑akhiir, hajja be waasitat Isa al‑Masiih.
Allah rassal al‑Masiih awwal le l‑Yahuud achaan humman min zurriiyit Ibraahiim wa yitaabuʼu al‑diin al‑Allah antaahum be waasitat Muusa. Wa Allah rassal al‑Masiih achaan yitammim al‑khidme al‑hu badaaha zamaan be Ibraahiim wa Muusa. Wa Yahuud waahidiin simʼo kalaam Allah wa aamano be l‑Masiih wa l‑jawaab da, hu taʼliim al‑muwajjah leehum. Humman min zurriiyit Ibraahiim al‑hu Ibraani wa fi chaan da, sammo al‑jawaab da « le l‑Ibraaniyiin ».
Al‑Yahuud al‑aamano be Isa bado adiil fi derib al‑Masiih laakin bigi leehum gaasi achaan akhwaanhum al‑ma aamano be l‑Masiih daayagoohum lahaddi waahidiin dawwaro yigabbulu fi diinhum al‑gadiim. Wa l‑jawaab da yiwassif kadar al‑gabbiliin wara ma yanfaʼ. Al‑Masiih akbar min al‑anbiya wa akbar min al‑malaaʼika. Awwal, Allah anta le l‑chaʼab rujaal al‑diin al‑masʼuuliin fi beetah al‑mukhaddas al‑fi l‑ard. Laakin hassaʼ, Allah antaahum al‑Masiih wa hu raajil diin al‑yimassil al‑chaʼab giddaam Allah fi l‑sama. Awwal, rujaal al‑diin gaddamo dahaaya le Allah ayyi sana fi chaan zunuub al‑naas. Laakin hassaʼ, Allah rassal al‑Masiih achaan yigaddim nafsah dahiiye marra waahide fi chaan al‑naas. Wa rujaal al‑diin hana awwal, humman aznabo wa aabo. Laakin hassaʼ, Allah rassal al‑Masiih wa hu raajil diin al‑abadan ma indah zanib wa la eeb.
Wa l‑jawaab da yiwassif kikkeef khidmit al‑Masiih tammamat khidmit al‑anbiya wa mahat zunuubna. Wa fi chaan da, kalaam al‑jawaab da yichajjiʼ ayyi naadum al‑muʼmin be l‑Masiih al‑gaaʼid fi ust akhwaanah al‑ma muʼminiin beyah wa yidooru yigabbuluuh wara.
Khalli Allah yichajjiʼ ayyi muʼmin al‑yagri al‑kalaam da wa yaftah galbah achaan yakrub al‑kalaam wa yalga al‑baraka al‑kaamile al‑Allah waaʼad beeha Ibraahiim. Aamiin.