Buulus yilfachchar be duʼufah
12
1 Al‑fachaar da ma indah faayde laakin kan laabudda nilfachchar,
nihajji be l‑ruʼya wa l‑asraar al‑Allah kachafaahum leyi.
2 Ana naʼarif muʼmin waahid be l‑Masiih wa yoom waahid,
gabul 14 sana,
hu anrafaʼ lahaddi l‑sama fi l‑aali.
Kan anrafaʼ be jismah walla bala jismah,
da ma naʼarfah.
Illa Allah wiheedah bas yaʼarfah.
3‑4 Wa ana naʼarif kadar al‑naadum da anrafaʼ fi l‑Janna.
Kan be jismah walla bala jismah,
da ma naʼarfah.
Illa Allah wiheedah bas yaʼarfah.
Wa hu simiʼ asraar faaytiin fikir al‑naas wa ma fi insaan indah izin yihajji beehum.
5 Wa fi chaan naadum misil da,
nilfachchar laakin fi chaani ana,
ma nilfachchar illa nihajji be duʼufi.
6 Wa kan nilfachchar kula,
ana ma naadum al‑ma indah fikir achaan kalaami sahiih.
Laakin naaba ma nilfachchar achaan ma nidoor ayyi naadum yifakkir foogi cheyy ziyaada min al‑chaafah fi khidimti be eenah wa simʼah minni be adaanah.
7 Akiid,
ana chift ruʼya ajiibe bilheen wa Allah ma yidoor ana nistakbar be sababha.
Wa achaan da,
Allah antaani cheyy waahid al‑gaaʼid yitaʼʼibni misil chook fi lahami wa misil mursaal hana l‑Cheetaan al‑gaaʼid yuduggini.
Wa antaani al‑taʼab da achaan ma nistakbar.
8 Wa talaata marraat,
ana daʼeet Rabbina Isa wa chahadtah achaan yarfaʼah minni.
9 Wa laakin hu radda leyi wa gaal :
« Rahmati takfi leek.
Gudurti tabga kaamile fi l‑naadum al‑daʼiif.
» Achaan da,
nilfachchar be farah ziyaada wakit ana daʼiif achaan gudrat al‑Masiih tasbit foogi.
10 Achaan da,
ana nafrah wakit ana daʼiif wa wakit yiʼayyuruuni wa yitaʼʼubuuni wa yiʼazzubuuni wa yidaayuguuni fi chaan ana gaaʼid nitaabiʼ al‑Masiih.
Achaan wakit ma indi gudra,
fi l‑bakaan da bas,
al‑gudra tagood foogi.
11 Khalaas,
ana hajjeet leeku misil naadum al‑ma indah fikir.
Intu lazzeetuuni achaan nuguul al‑kalaam da.
Wa intu bas al‑naas al‑waajib yikarrumuuni achaan ana ma sakhayyar be ayyi cheyy min al‑rusul al‑intu tuguulu humman kubaar,
kan ana naadum ma naafiʼ kula.
12 Intu chiftu al‑daliil al‑yisabbit kadar ana rasuul wakit khadamt fi usutku.
Chiftu al‑sabur al‑gawi wa l‑alaamaat wa l‑ajaayib wa amal Allah.
13 Hal ligiitu minni faayde chiyya naagse min al‑faayde al‑ligooha minni jamaaʼaat al‑muʼminiin al‑fi bakaanaat al‑aakhariin ?
Daahu cheyy waahid bas ana ma sawweetah wa hu,
ana ma kallaftuku be kulla cheyy al‑nihtaaj leyah.
Wa da jariime.
Saamuhuuni !
Al‑ziyaara al‑taalta
14 Khalaas,
daahuuni jaahiz namchi leeku taalit marra.
Wa ana ma nabga leeku tagiil achaan al‑nidoorah ma maalku,
nidoorku intu.
Achaan al‑iyaal ma yudummu maal fi chaan waaldeenhum.
Al‑waaldeen bas waajib yudummu maal fi chaan iyaalhum.
15 Wa fi chaanku intu,
nanti be farah kulla cheyy al‑indi wa nanti nafsi fi chaanku battaan.
Kan nihibbuku katiir,
hal intu tihibbuuni chiyya walla ?
16 Khalaas,
tuguulu sahiih ana ma kallaftuku be kulli cheyy al‑nihtaaj leyah.
Laakin waahidiin yuguulu ana najiid wa akaltuku be najaada.
17 Wa hal chilt minku cheyy be waasitat al‑akhwaan al‑ana rassaltuhum leeku walla ?
18 Ana talabt min Tiitus achaan yamchi leeku wa rassalt maʼaayah al‑akhu al‑aakhar.
Wa hal Tiitus chaal cheyy minku be khachch walla ?
La !
Haalah wa haali sawa wa aniina khadamna be nafs al‑tariiga.
19 Akuun intu tuguulu fi guluubku fi tuul al‑wakit da aniina nidaafuʼu le nufuusna giddaamku.
La !
Ma ke.
Nihajju leeku be usum al‑Masiih giddaam Allah.
Ya akhwaani al‑nihibbuuku,
kulla cheyy al‑sawweenaah da,
hu fi chaanku bas achaan iimaanku yabga gawi.
20 Wa hassaʼ ana khaayif achaan wakit najiiku,
intu ma tukuunu misil ana nidoorah wa ana kamaan ma nukuun misil intu tidooruuh.
Akuun nalga ambeenaatku al‑huraaj wa l‑husud wa l‑zaʼal wa l‑mukhaasama wa l‑bakhaada wa l‑guwaale wa l‑istikbaar wa l‑barjaal.
21 Akuun wakit najiiku,
Allah yijiib leyi battaan al‑eeb giddaamku.
Wa nahzan fi chaan al‑naas al‑katiiriin al‑awwal aznabo wa ma taabo min al‑haal al‑khabiise wa l‑zina wa l‑fasaad al‑awwal sawwoohum.