Radd al‑rasuul le khusmaanah
10
1 Ana bas Buulus al‑yuguulu foogi ana nimaskin nafsi wakit ana gaaʼid maʼaaku wa laakin kalaami haarr wakit ana khaayib minku.
Wa ana nihannisku be kheer al‑Masiih wa mahannitah.
2 Nachhadku achaan wakit najiiku ma tilizzuuni lahaddi nihajji leeku be kalaam haarr.
Wa laakin akiid ana nagdar nihajji be kalaam haarr le l‑naas al‑yuguulu kadar aniina nitaabuʼu haal naas al‑dunya.
3 Sahiih,
aniina aaychiin fi l‑dunya laakin ma nihaarubu misil naas al‑dunya.
4 Wa l‑silaah al‑nihaarubu beyah ma silaah al‑naas.
Gudrat silaahna jaaye min Allah wa beeha nidammuru al‑khidme al‑gawiiye hana Ibliis.
Nidammuru al‑afkaar al‑khaatiyiin hana l‑naas
5 wa ayyi kalaam hana istikbaar al‑yisidd al‑derib al‑beyah al‑naas yaʼarfu Allah.
Wa nakurbu ayyi fikir wa nisawwuuh yitaabiʼ kalaam al‑Masiih.
6 Wa nidooru intu titaabuʼu kalaam al‑Masiih tamaam.
Wa baʼad da,
aniina nabgo jaahiziin le niʼaakhubu ayyi naadum be sabab al‑isyaan.
7 Intu gaaʼidiin tifakkuru fi l‑cheyy al‑binchaaf giddaamku bas.
Ayyi naadum kan muʼakkid hu hana l‑Masiih,
khalli yifakkir adiil.
Kan hu hana l‑Masiih,
aniina kula hana l‑Masiih.
8 Wa kan nilfachchar chiyya be l‑sulta al‑Rabbina antaani foogku,
da ma eeb leyi.
Hu antaani al‑sulta di achaan nigawwiiku fi l‑iimaan wa ma achaan nikharribku.
9 Wa ma indi niiye nikhawwifku be jawaabaati.
10 Hatta kan naas waahidiin yahguruuni wa yuguulu foogi :
« Kalaam Buulus fi jawaabaatah haarr wa gawi.
Laakin wakit hu zaatah haadir maʼaana,
hu ma indah gudra wa kalaamah ma indah faayde. »
11 Wa khalli al‑naas al‑yuguulu al‑kalaam da yaʼarfu kadar al‑cheyy al‑katabnaah wakit aniina khaaybiin minhum,
akiid nisawwuuh wakit aniina haadiriin maʼaahum.
12 Aniina abadan ma nukhuttu nufuusna fi nafs al‑saff maʼa naas waahidiin al‑yisawwu nufuushum kubaar.
Ma nidooru nigaaduru nufuusna maʼaahum.
Humman gaaʼidiin yigaaduru nufuushum be nufuushum wa yigaaduru nufuushum ambeenaathum.
Wa be da,
yiwassufu kadar humman mataamiis.
13 Laakin aniina ma nilfachcharo ziyaada.
Naʼarfu huduudna.
Nihajju be l‑khidme al‑sawweenaaha fi daakhil al‑huduud al‑Allah jaʼalaahum leena.
Wa akiid intu kula gaaʼidiin fi bakaan al‑khidme al‑Allah jaʼalaaha leena.
14 Wa ma futna khaadi min huduudna wakit macheena lahaddi hillitku.
Wa aniina bigiina al‑awwalaaniyiin al‑ballakho leeku bichaarat al‑Masiih.
15 Wa aniina ma nufuutu khaadi min huduudna wa ma nistakbaro fi l‑khidme al‑sawwooha naas aakhariin.
Laakin nitmanno kadar iimaanku yiziid wa khidmitna ambeenaatku kula tiziid marra waahid.
16 Wa khalaas,
namchu fi l‑buldaan al‑khaadi minku wa niballukhu leehum al‑bichaara.
Wa ma nakhdumu fi ayyi bakaan al‑naadum aakhar ballakh foogah al‑bichaara gabulna.
Wa misil da,
abadan ma nisawwu nufuusna kubaar be l‑khidme al‑sawwaaha naadum aakhar fi l‑bakaan al‑Allah antaah leyah.
17 Wa l‑Kitaab buguul :
﴾Khalli naadum ma yisawwi nafsah kabiir.
Akheer yuguul Allah bas kabiir.﴿*
18 Achaan al‑naadum al‑Allah yachhad leyah,
hu bas al‑Allah khibilah wa ma yakhbal al‑naadum al‑yachhad le nafsah.