Al‑jisim al‑samaawi
5
1 Wa l‑jisim al‑indina wakit gaaʼidiin fi l‑ard,
hu misil kheema bas.
Wa naʼarfu kadar wakit jisimna da yumuut,
indina jisim aakhar al‑gaaʼid fi l‑samaawaat.
Wa l‑jisim da misil beet gawi al‑Allah bas banaah.
Wa yagood ila l‑abad wa ma misil beet al‑banooh al‑naas.
2 Wa haaliiyan da,
aniina gaaʼidiin naguntu achaan garmaaniin bilheen le beetna al‑samaawi al‑Allah yantiih leena le niʼiichu foogah.
3 Wa misil da,
kan libisna al‑jisim al‑jadiid da,
battaan ma nabgo aryaaniin bala jisim.
4 Wa wakit aniina gaaʼidiin fi l‑kheema al‑ardiiye di,
naguntu min al‑himil al‑tagiil.
Wa daahu al‑cheyy al‑nidooruuh wa hu,
ma nabgo aryaaniin min al‑jisim al‑ardi laakin nidooru nalbaso al‑jisim al‑jadiid.
Wa fi l‑bakaan da,
al‑haya al‑abadiiye di taakul marra waahid al‑jisim al‑yumuut.
5 Allah zaatah jahhazaana le l‑haya di wa hu nazzal foogna al‑Ruuh al‑Khudduus achaan yabga al‑alaama al‑tiwassif kadar Allah yisawwi kulla cheyy al‑jahhazah leena.
6 Wa achaan da,
achamna daayman gawi.
Sahiih naʼarfu kadar wakit aniina saakniin fi l‑jisim al‑ardi,
aniina lissaaʼ ma saakniin fi beetna al‑sahiih al‑gaaʼid maʼa Rabbina al‑Masiih.
7 Laakin niʼiichu hasab al‑cheyy al‑aniina muʼminiin beyah wa ma hasab al‑nichiifuuh be eenna.
8 Aywa,
achamna gawi wa akheer leena nikhallu al‑jisim al‑ardi da achaan naskunu maʼa Rabbina.
9 Wa khalaas,
ziyaada min kulla cheyy aakhar,
nidooru nisawwu al‑cheyy al‑yarda beyah Rabbina,
kan aniina naskunu fi l‑jisim al‑ardi walla nikhalluuh.
10 Achaan laabudda ayyi waahid minnina yagiif giddaam kursi mahkamat al‑Masiih.
Wa fi l‑bakaan da,
ayyi naadum yalga al‑cheyy al‑waajib leyah hasab al‑amal al‑sawwaah wakit hu aayich be jismah al‑ardi,
kan amalah hana kheer aw hana charr.
Al‑suluh be l‑Masiih
11 Wa naʼarfu al‑khoof min Rabbina wa achaan da,
nidooru nijiibu al‑naas fi l‑derib.
Allah yaʼarif haalna marra waahid wa nitmanna kadar intu kula taʼarfuuha fi guluubku.
12 Wa battaan ma nidooru nifaachuru.
Aniina nidooru nantuuku fursa achaan tihajju beena raasku marfuuʼ wa turuddu le l‑naas al‑gaaʼidiin yarfaʼo ruuseehum be l‑cheyy al‑binchaaf bas wa ma be l‑cheyy al‑gaaʼid fi l‑galib.
13 Kan sahiih agulna laffa,
da fi chaan Allah.
Wa kan agulna aafe,
da le faayditku.
14 Wa mahabbat al‑Masiih leena tajburna achaan aniina muʼakkidiin kadar hu al‑waahid al‑maat fi chaan kulla l‑naas wa beyah hu bas,
kulluhum maato.
15 Wa hu maat le kulla l‑naas achaan al‑naas al‑hayyiin ma yiʼiichu battaan le nufuushum laakin yiʼiichu le l‑Masiih al‑maat wa baʼas fi chaanhum.
16 Achaan da,
min al‑yoom le giddaam ma nifakkuru fi ayyi naadum misil al‑naas yifakkuru foogah.
Awwal aniina fakkarna fi l‑Masiih misil al‑naas.
Laakin abadan ma nifakkuru foogah battaan misil da.
17 Wa kan ayyi naadum indah alaakha maʼa l‑Masiih,
hu bigi khaliige jadiide.
Hayaatah al‑gadiime faatat wa hayaatah al‑jadiide badat khalaas.
18 Wa da kulla ke,
jaayi min Allah.
Hu bas sawwa al‑suluh maʼaana be l‑Masiih.
Wa l‑khidme al‑Allah kallafaana beeha,
hi ballikhiin khabar al‑suluh.
19 Wa maʼanaatah Allah sawwa al‑suluh be waasitat al‑Masiih.
Wa hu chaal niiye achaan ma yihaasib naas al‑dunya hasab khataayaahum.
Wa kallafaana be ballikhiin bichaarat al‑suluh.
20 Wa be misil da,
ana wa akhwaani bigiina sufara le l‑Masiih wa Allah gaaʼid yinaadiiku be lisaanna.
Wa khalaas,
natulbu minku be usum al‑Masiih,
assaalaho maʼa Allah.
21 Wa l‑Masiih al‑abadan ma aznab,
Allah jaʼalah dahiiye fi chaan zunuubna achaan aniina nabgo beyah chaʼab Allah al‑saalihiin.