Al‑muʼaahada al‑jadiide
3
1 Akuun tuguulu aniina badeena battaan nachkuru nufuusna.
La,
ma ke.
Akiid naas waahidiin waajib leehum jawaab al‑yachhad leehum,
kan jawaab leeku aw jawaab minku.
Wa laakin da ma waajib leena aniina.
2 Intu bas jawaabna.
Intu maktuubiin fi guluubna.
Wa kulla l‑naas yaʼarfuuh wa yagruuh.
3 Aywa,
intu bas jawaab al‑Masiih wa hu rassalah be waasitatna wa da waadih le ayyi naadum.
Wa l‑jawaab da ma maktuub be galam laakin be Ruuh Allah al‑Hayy.
Wa hu ma maktuub fi looh hana hajar laakin maktuub fi guluub al‑naas.
4 Wa gulna al‑kalaam da achaan achamna fi Allah gawi be l‑Masiih.
5 Aniina be nufuusna ma indina al‑gudra al‑waajbe le nisawwu al‑khidme di.
Nagdaro nisawwu al‑khidme di illa kan Allah antaana al‑gudra al‑waajbe.
6 Aywa,
hu antaana al‑gudra le nabgo khaddaamiin wa nakhdumu le Allah fi l‑muʼaahada al‑jadiide.
Wa l‑muʼaahada al‑jadiide di ma hana churuut maktuubiin wa laakin hana Ruuh Allah.
Achaan muʼaahadat al‑churuut al‑maktuubiin tijiib al‑moot wa laakin Ruuh Allah yijiib al‑haya.
7 Churuut al‑Tawraat kataboohum fi liihaan hana hajar wa nuur Allah al‑majiid baan wakit hu nazzalaahum.
Wa l‑nuur al‑majiid da chadiid lahaddi Bani Israaʼiil ma gidro yichiifu al‑nuur al‑gaaʼid fi wijih Muusa.*
Wa l‑nuur da ma tawwal.
Wa kan kalaam Allah al‑hakam al‑naas be l‑moot da nazal be nuur majiid,
8 akiid kalaam Allah al‑yanti leena al‑Ruuh al‑Khudduus yaji be nuur majiid ziyaada.
9 Naʼarfu kadar khidmit al‑muʼaahada al‑jaʼalat al‑naas khaatiyiin giddaam Allah,
indaha nuur majiid.
Wa misil da,
naʼarfu kadar khidmit al‑muʼaahada al‑tajʼal al‑naas saalihiin indaha nuur majiid ziyaada marra waahid.
10 Wa sahiih,
awwal fi nuur majiid wa haaliiyan ja nuur majiid aakhar ziyaada minnah wa waddarah.
11 Wa kan al‑cheyy al‑ma tawwal ja be nuur majiid,
akiid al‑yagood ila l‑abad yaji be nuur chadiid ziyaada minnah.
Al‑mindiil anrafaʼ
12 Wa be misil da,
indina acham gawi wa achaan da nakhdumu be chajaaʼa chadiide.
13 Aniina ma nisawwu misil Muusa.
Hu khatta wijhah be mindiil achaan Bani Israaʼiil ma yichiifu al‑nuur al‑gaaʼid yufuut.
14 Laakin humman dool fikirhum antamas.
Wa lahaddi l‑yoom kan yagru leehum churuut al‑Tawraat al‑hi al‑muʼaahada al‑gadiime,
khalaas nafs al‑mindiil gaaʼid yikhatti fikirhum wa ma yikhalliihum yafhamo al‑kalaam adiil.
Wa l‑mindiil da ma yinrafiʼ minhum illa kan yiʼaamunu be l‑Masiih.
15 Aywa,
lahaddi l‑yoom kan kalaam Muusa yagruuh leehum,
al‑mindiil gaaʼid yikhatti guluubhum.
16 Laakin kan naadum yichiil derib al‑Rabb,
al‑mindiil yinrafiʼ wa hu yafham adiil.
17 Wa fi l‑kalaam da,
al‑Rabb hu al‑Ruuh al‑Khudduus.
Wa ayyi bakaan al‑Ruuh al‑Khudduus hana l‑Rabb gaaʼid foogah,
al‑hurriiye kula gaaʼide foogah.
18 Wa aniina ma indina mindiil al‑yikhatti wujuuhna.
Wa kullina gaaʼidiin nichiifu nuur Allah al‑majiid.
Wa l‑nuur da yibiin foogna waadih.
Wa l‑nuur al‑majiid da yaji min Ruuh Allah al‑gaaʼid yikhayyirna ziyaada lahaddi suuritna tabga misil suurat Allah al‑majiide.