Al‑chariiʼa ambeenaat al‑muʼminiin
6
1 Wa kan naadum minku mazluum fi akhuuh al‑muʼmin,
maala yiwaddiih le l‑muznibiin achaan yagtaʼo leyah al‑chariiʼa ?
Akheer kan yikhalli al‑saalihiin yagtaʼo leyah al‑chariiʼa wa yihaasubu al‑zaalim.
2 Nisiitu kadar aniina al‑saalihiin nihaakumu al‑dunya walla ?
Wa kan baʼadeen intu tihaakumu al‑dunya,
kikkeef ma tagdaro tihaakumu fi muchkila sakhayre kula ?
3 Nisiitu kadar aniina nihaakumu al‑malaaʼika walla ?
Wa kan misil da,
akiid nagdaro nihaakumu fi machaakil akhwaanna fi l‑dunya kula.
4 Wa kan induku machaakil ambeenaatku,
maala tigaddumuuhum le l‑naas al‑ma muhimmiin fi jamaaʼat al‑muʼminiin ?
5 Wa da eeb foogku.
Ma fi naadum minku indah hikma achaan yahkim ambeenaat akhwaanah walla ?
6 Laakin intu gaaʼidiin tikhallu al‑muʼmin yachki akhuuh giddaam al‑hukkaam,
hatta kan al‑hukkaam dool ma muʼminiin kula.
7 Kan waddeetu akhuuku fi l‑mahkama,
intu fachaltu khalaas.
Akheer takhbalo al‑zulum wa tasburu foogah.
Akheer tikhallu naadum yasrig minku.
8 Laakin be l‑aks,
intu zaatku gaaʼidiin tazulmu akhwaanku wa tasurgu khumaamhum be khachch !
9 Nisiitu kadar al‑muznibiin ma yawrusu mamlakat Allah walla ?
Ma tukhuchchu nufuusku.
Kan naadum faasikh walla aabid asnaam walla zannaay walla chamrookha walla luuti
10 walla sarraag walla tammaaʼ walla sakkaari walla nammaam walla nahhaab ma indah warasa fi mamlakat Allah.
11 Wa naas waahidiin minku awwal gaaʼidiin yisawwu al‑zunuub dool.
Laakin Allah khassalaaku wa sawwaaku khaassiin leyah wa jaʼalaaku saalihiin be usum Rabbina Isa al‑Masiih wa be gudrat Ruuh Allah Ilaahna.
Jisim al‑muʼmin le l‑Rabb
12 Intu gultu :
« Kulla cheyy halaal leyi.
» Wa laakin ana nuguul ma kulla cheyy indah faayde.
Aywa,
intu gultu :
« Kulla cheyy halaal leyi.
» Wa laakin ana nuguul abadan ma nikhassid kadar ayyi cheyy yiʼabbidni.
13 Wa gultu :
« Al‑batun gaaʼide le l‑akil wa l‑akil gaaʼid le l‑batun.
» Aywa,
fi l‑akhiir Allah yidammir al‑akil wa l‑batun sawa.
Wa laakin al‑jisim ma gaaʼid le l‑zina.
Al‑jisim gaaʼid fi chaan Rabbina Isa wa Rabbina baʼas fi chaan al‑jisim.
14 Wa Allah baʼas Rabbina wa be nafs al‑gudra yabʼasna aniina kula.
15 Ma iriftu kadar hassaʼ jisim al‑muʼmin udu min jisim al‑Masiih walla ?
Wa kan misil da,
hal niwaddi jismi al‑hassaʼ udu min jisim al‑Masiih wa nantiih le mara charmuuta ?
Abadan.
16 Ma iriftu kadar al‑naadum al‑yilimm maʼa l‑charmuuta yabga maʼaaha jisim waahid ?
Maktuub fi l‑Kitaab :
﴾Al‑naaseen yabgo jisim waahid.﴿*
17 Wa laakin al‑yinrabit maʼa Rabbina al‑Masiih yabga maʼaayah ruuh waahide.
18 Khalaas,
baʼʼudu min al‑zina.
Kulla l‑zunuub al‑aakhariin al‑yisawwiihum al‑insaan ma yilammusu al‑jisim,
laakin al‑zannaay hu bas yudurr jismah.
19 Ma iriftu kadar al‑Ruuh al‑Khudduus gaaʼid fiiku walla ?
Wa be da,
jisimku hu beet al‑Ruuh al‑Khudduus al‑Allah antaah leeku wa gaaʼid fiiku.
Intu ma hana nufuusku.
Intu hana Allah.
20 Hu fadaaku be taman khaali.
Achaan da,
khalli kulla cheyy al‑tisawwu be jisimku yimajjid Allah.