Haalit rusul al‑Masiih
4
1 Wa leyi ana wa akhwaani,
waajib tahsubuuna khaddaamiin al‑Masiih masʼuuliin min ballikhiin sirr Allah al‑awwal al‑naas ma irfooh.
2 Wa l‑cheyy al‑waajib le ayyi naadum al‑masʼuul,
hu al‑sidikh.
3 Wa kan leyi ana,
ma lammaani kan intu tihaasubu khidimti walla kan ayyi insaan yihaasibni.
Ana kula ma nihaasib nafsi.
4 Galbi gaaʼid yuguul ana ma indi eeb laakin da wiheedah ma yisabbit kadar ana bari.
Al‑gaaʼid yihaasibni,
hu Rabbina Isa.
5 Be misil da,
ma tihaasubu khidmit ayyi naadum gubbaal yoom al‑Hisaab.
Fi l‑yoom da,
Rabbina yaji wa yibayyin kulla cheyy al‑mulabbad fi l‑dalaam wa yakchif niiyit al‑naas al‑gaaʼide fi guluubhum.
Wa ayyi naadum yalga rida,
ma min al‑naas laakin min Allah.
6 Ya akhwaani,
ana tabbagt kalaami da fi l‑cheyy al‑yukhussini ana wa Abuluus achaan intu talgo minnah faayde.
Wa be da,
nidoor intu taʼarfu maʼana al‑masal al‑maʼruuf al‑buguul :
« Khalli naadum ma yamrug min derib al‑Kitaab.
» Ma tistakbaro battaan fi l‑naadum al‑waahid wa tahguru al‑aakhar.
7 Wa nuguul le ayyi waahid,
yaatu al‑sawwaak akheer min akhuuk ?
Al‑cheyy al‑indak da,
hu min Allah.
Wa kan Allah bas antaah leek,
maala tistakbar beyah misil inta ma ligiitah minnah hu ?
8 Wa khalaas,
tifakkuru intu chabʼaaniin wa bigiitu khaniyiin be l‑iimaan wa khalleetuuna wara wa tifakkuru gaʼadtu khalaas fi karaasiiku le tamulku.
Nitmanna kadar intu tamulku be sahiih achaan nichaaruku maʼaaku fi l‑muluk.
9 Wa gult al‑kalaam da achaan fi fikri,
Allah khattaana aniina rusul al‑Masiih fi l‑bakaan tihit marra waahid.
Aniina bigiina misil masaajiin al‑hakamo leehum be l‑moot wa maragoohum giddaam kulla l‑dunya wa kulla naasha wa kulla l‑malaaʼika al‑gaaʼidiin yichiifu taʼabna.
10 Wa be sabab alaakhitna maʼa l‑Masiih,
al‑naas hasaboona juhhaal.
Wa laakin intu tuguulu intu aagliin be alaakhitku maʼa l‑Masiih.
Intu tifakkuru kadar aniina daʼiifiin wa intu gaadriin.
Intu mukarramiin laakin aniina mahguuriin.
11 Ya hassaʼ aniina jiiʼaaniin wa atchaaniin.
Ma indina khulgaan.
Yudugguuna wa yaturduuna min ayyi bakaan.
12 Wa nakhdumu be duraaʼna achaan niʼiichu.
Wakit al‑naas yiʼayyuruuna,
aniina nibaarukuuhum.
Wakit yitaʼʼubuuna,
aniina nasburu.
13 Wa wakit yihajju leena kalaam murr,
aniina nuruddu leehum be nafas baarid.
Wa aniina bigiina misil afana al‑kulla naas yakrahooha wa misil wasakh al‑yidaffuguuh barra.
14 Ana ma katabt al‑kalaam da le niʼayyibku.
Laakin katabtah le nihazzirku achaan intu misil iyaali al‑nihibbuku.
15 Akuun induku naas katiiriin al‑yidooru yirabbuuku fi derib al‑Masiih laakin ma induku abbahaat katiiriin.
Aywa,
ana wiheedi bigiit abuuku achaan ana ballakht leeku bichaarat al‑Masiih wa beyi ana bas,
intu dakhaltu fi alaakhitku maʼa l‑Masiih Isa.
16 Achaan da nichajjiʼku.
Taabuʼu derbi ana.
17 Wa fi chaan da bas,
ana rassalt leeku Timuutaawus al‑bigi leyi wileedi mahbuub wa amiin fi l‑Rabb.
Hu yizakkirku be hayaati fi derib Isa al‑Masiih wa di bas al‑haya al‑niʼallimha le ummat al‑Masiih fi ayyi bakaan.
18 Waahidiin minku bigo mustakbiriin.
Akuun fi fikirhum ana abadan ma namchi leeku.
19 Laakin kan Rabbina gaal aamiin,
namchi leeku gariib.
Wa fi l‑yoom da,
naʼarif al‑mustakbiriin dool.
Ma nidoor nasmaʼ kalaamhum.
Nidoor nichiif gudrithum bas.
20 Achaan mamlakat Allah ma mabniiye be kalaam al‑naas.
La !
Hi mabniiye be gudrat Allah.
21 Wa tidooru chunu ?
Tidooru najiiku be asa walla najiiku be mahabba wa nafas baarid ?