Buulus giddaam Akhriibaas
26
1 Wa Akhriibaas gaal le Buulus :
« Indak izin achaan tidaafiʼ le nafsak.
» Wa Buulus sawwa ichaara be iidah achaan al‑naas yasmaʼooh wa bada kalaamah.
Hu gaal :
2 « Ya l‑malik Akhriibaas,
ana farhaan bilheen achaan al‑yoom giddaamak inta bas nidaafiʼ le nafsi min kulla tuham al‑Yahuud al‑wajjahoohum leyi.
3 Wa akiid,
inta taʼarif adiil kulla aadaat al‑Yahuud wa kulla munaakhachathum.
Wa natlub minnak tasmaʼ kalaami be sabur.
4 Kulla l‑Yahuud yaʼarfu haali min ana sakhayyar wa yaʼarfu kikkeef ana icht,
awwal maʼa naas hilliti wa baʼad da,
fi Madiinat al‑Khudus.
5 Min zamaan yaʼarfuuni.
Wa kan humman dawwaro yachhado leyi,
yagdaro yiʼooruuk kadar ana tabbagt taʼliim al‑Fariiziiya wa ma fi Yahuud kaarbiin al‑diin ziyaada min al‑Fariiziyiin.
6 « Wa l‑yoom,
ana gaaʼid fi l‑mahkama achaan ana muʼmin be l‑buʼaas al‑Allah waaʼad beyah juduudna.
7 Wa gabaayilna al‑atnaachar gaaʼidiin yaʼabudu Allah be chidde leel wa nahaar achaan humman muʼminiin be l‑buʼaas wa yidooru Allah yitimm leehum kalaamah.
Wa hassaʼ,
be sabab kalaami fi l‑buʼaas bas,
al‑Yahuud gaaʼidiin yathamooni,
ya l‑sayyid al‑malik.
8 Wa maala tuguulu mustahiil Allah ma yabʼas al‑maytiin ?
9 « Sahiih,
awwal ana zaati fakkart kadar waajib nakhdim be kulla gudurti achaan al‑naas ma yiʼaamunu be usum Isa al‑min al‑Naasira.
10 Wa khaalaftuhum fi Madiinat al‑Khudus.
Wa be izin kubaaraat rujaal al‑diin,
karabt katiiriin min al‑saalihiin wa dasseethum fi l‑sijin.
Wa wakit al‑majlas hakam leehum be l‑moot,
ana kula mukhassid.
11 Wa ana gaaʼid nitaʼʼibhum bilheen fi kulla buyuut al‑sala wa jabartuhum achaan yakfuru be Isa.
Wa ana zaʼlaan minhum zaʼal chadiid lahaddi maragt min baladna kula le nitaʼʼibhum fi hillaal al‑barra min baladna.
Buulus yihajji be munaadaatah
12 « Wa khalaas yoom waahid,
ana gammeet macheet le madiinat Dimachkh be izin kubaaraat rujaal al‑diin,
chaayil awaamirhum fi jawaabaat.
13 Ya l‑sayyid al‑malik,
fi l‑duhur wakit ana maachi fi l‑derib,
chift nuur jaayi min al‑sama,
chadiid misil al‑harraay wa l‑nuur gamma daawa foogi wa foog al‑naas al‑maʼaayi.
14 Wa kullina wagaʼna fi l‑turaab wa ana simiʼt hiss hana naadum yihajji leyi be kalaam ibraani wa gaal :
‹ Ya Chaawuul,
ya Chaawuul !
Maalak titaʼʼibni ?
Inta gaaʼid tikhaalifni wa da gaasi leek. ›
15 « Wa gult :
‹ Ya l‑sayyid,
inta yaatu ?
› Wa l‑Rabb gaal :
‹ Ana Isa al‑inta gaaʼid titaʼʼibah.
16 Wa hassaʼ gumm foog wa niʼooriik maala ana bayyant leek nafsi.
Ana azaltak achaan tabga leyi khaddaam wa chaahid.
Tihajji le l‑naas be l‑cheyy al‑bayyantah leek wa be kulla cheyy al‑nibayyinah leek baʼadeen.
17 Nahfadak min naasak al‑Yahuud wa min al‑umam al‑aakhariin.
Nirassilak leehum
18 le taftah uyuunhum achaan yamurgu min al‑dalaam wa yadkhulu fi l‑nuur wa yamurgu min hukum Ibliis wa yutuubu le Allah.
Wa Allah yakhfir leehum zunuubhum wa humman yawrusu bakaan fi lubb al‑naas al‑khaassiin be sabab iimaanhum beyi. ›
19 « Wa khalaas,
ya l‑malik Akhriibaas,
ana ma abeet kalaam al‑ruʼya al‑jaat min Allah.
20 Wa awwal cheyy,
ana gammeet nikallim le l‑naas al‑fi Dimachkh wa baʼadeen le l‑naas al‑fi Madiinat al‑Khudus wa l‑fi kulla daar al‑Yahuudiiya.
Wa baʼad da,
gammeet nikallim le l‑umam al‑aakhariin.
Wa gult leehum waajib yikhallu zunuubhum wa yutuubu le Allah wa yisawwu al‑amal al‑waajib le l‑naas al‑taabo be l‑sahiih.
21 Wa fi chaan al‑kalaam da bas,
al‑Yahuud karabooni fi beet Allah wa dawwaro yaktuluuni.
22 Laakin lahaddi al‑yoom,
Allah gaaʼid yahfadni wa achaan da bas,
ana waagif hini wa gaaʼid nachhad giddaam kulla l‑naas al‑kubaar wa l‑sukhaar.
Wa abadan ma nuguul cheyy illa l‑cheyy al‑Muusa wa l‑anbiya gaalo laabudda yukuun.
23 Wa l‑kalaam da,
hu laabudda al‑Masiih yatʼab wa yabga awwal naadum le yabʼas min ust al‑maytiin.
Wa be l‑sabab da,
hu yiballikh kalaam hana nuur Allah le chaʼabah wa le kulla l‑umam. »
Buulus kallam le Akhriibaas
24 Wa wakit Buulus gaaʼid yidaafiʼ le nafsah misil da,
Fastus hajja be hiss aali wa gaal :
« Buulus !
Inta muchootin !
Gareet katiir lahaddi aglak laffa ! »
25 Wa Buulus radda leyah wa gaal :
« Ya l‑sayyid Fastus,
ana ma muchootin.
Kalaami sahiih wa kalaami maʼguul.
26 Al‑kalaam da,
al‑malik yaʼarfah adiil wa ana niwajjih leyah kalaami bala khoof.
Ana muʼakkid kadar al‑cheyy al‑bigi da,
al‑malik yaʼarfah achaan ma bigi be achiir.
27 Ya l‑malik Akhriibaas,
inta muʼmin be kalaam al‑anbiya walla ?
Naʼarif inta muʼmin beehum. »
28 Wa Akhriibaas radda le Buulus wa gaal :
« Fi fikrak,
ajala ke tagdar tisawwiini Masiihi walla ? »
29 Wa Buulus gaal :
« Kan ajala walla kan baʼad wakit tawiil kula,
ana nasʼal Allah achaan inta wa kulla l‑naas al‑gaaʼidiin yasmaʼo kalaami al‑yoom,
tabgo Masiihiyiin misli laakin bala l‑janaaziir al‑foogi dool ! »
30 Wa khalaas,
al‑malik gamma achaan yamchi.
Wa l‑waali wa Barniis wa l‑naas al‑gaaʼidiin maʼaayah taabaʼooh.
31 Wa wakit marago min al‑bakaan,
hajjo ambeenaathum wa gaalo :
« Al‑naadum da ma sawwa jariime al‑waajib leyah al‑moot wa la sijin. »
32 Wa Akhriibaas hajja le Fastus wa gaal :
« Awwal kan al‑naadum da ma talab izin achaan yidaafiʼ le nafsah giddaam al‑sultaan,
tagdar tatilgah. »