Al‑chariiʼa giddaam Fiiliks
24
1 Wa baʼad khamsa yoom,
Hanaaniiya kabiir rujaal al‑diin wa chuyuukh waahidiin macho fi Geesariiya wa jaabo maʼaahum muhaami waahid usmah Tartulus.
Wa macho le l‑waali wa gaddamo chakwithum didd Buulus.
2 Wa l‑waali naada Buulus min al‑sijin wa Tartulus bada yiwajjih leyah al‑tuhma.
Wa hu gaal :
« Ya l‑sayyid Fiiliks al‑muhtaram,
min khattook waali foogna,
kulla cheyy bigi leena halu wa ichna fi l‑salaam mudda tawiile.
Wa be sabab hukmak,
haalat chaʼabna bigat akheer marra waahid.
3 Wa khalaas aniina kullina daayman farhaaniin fi kulli bakaan al‑aniina gaaʼidiin foogah be kulla cheyy al‑inta sawweetah wa nachkuruuk katiir.
4 Wa ma nidooru kalaamna yichiil leek wakit katiir.
Min fadlak,
natulbu minnak achaan tasmah leena wa nihajju maʼaak chiyya.
5 « Naʼarfu al‑raajil da,
hu fasil marra waahid.
Wa hu gaaʼid yisawwi fitne fi ust al‑Yahuud fi kulla buldaan al‑dunya.
Wa hu min kubaaraat majmuuʼat al‑Nasaara.*
6 Wa dawwar kamaan yinajjis beet Allah wa laakin aniina karabnaah.
Dawwarna nichaaruʼuuh ale hasab chariiʼitna.
7 Wa laakin Liisiyaas al‑khaayid ja leena wa be gu chadiid chaalah min usutna.
8 Wa gaal leena kadar ayyi naadum al‑yidoor yatham Buulus,
waajib yaji leek.
Wa inta,
asʼalah adiil,
wa be da,
tagdar tiʼakkid min kulla l‑kalaam al‑gulnaah foogah. »
9 Wa kulla l‑Yahuud gaaʼidiin yathamo Buulus wa yuguulu kalaam al‑muhaami sahiih.
10 Wa be izin al‑waali,
Buulus gamma hajja wa gaal :
« Naʼarif inta haakim fi chaʼabna min mudda tawiile wa nidaafiʼ le nafsi giddaamak be farha.
11 Ana jiit fi Madiinat al‑Khudus min 12 yoom bas,
achaan naʼabud Allah wa inta be suhuula tagdar tiʼakkid min kalaami da.
12 Wa wakit humman ligooni,
ana ma gaaʼid nikhaalit maʼa ayyi naadum wa ma gaaʼid niharrich al‑naas.
Wa la fi beet Allah wa la fi buyuut al‑sala wa la fi ayyi bakaan fi l‑madiina.
13 Wa humman ma yagdaro yisabbutu al‑kalaam al‑tahamooni beyah.
14 « Laakin cheyy waahid bas sahiih min al‑kalaam al‑gaalooh giddaamak.
Wa daahu.
Ana aabid Allah Rabb juduudna hasab derib Isa al‑Masiih al‑humman yuguulu ma adiil.
Wa laakin ana muʼmin be kulla cheyy al‑maktuub fi l‑Tawraat wa kutub al‑anbiya.
15 Ana kula muʼmin be Allah.
Wa misilhum narja be acham al‑buʼaas.
Wa naʼarif Allah yabʼas kulla l‑naas,
al‑naas al‑adiiliin wa l‑naas al‑ma adiiliin.
16 Wa achaan da,
ana naʼasir galbi achaan niʼiich daayman be niiye mukhlisa giddaam Allah wa giddaam al‑naas.
17 « Wa ana ma fiini fi Madiinat al‑Khudus min muddit siniin.
Wa jiit achaan nanti sadakha le masaakiin ummati wa achaan naʼabud Allah be gaddimiin dahiiye.
18‑19 Wa da bas al‑cheyy al‑gaaʼid nisawwiih wakit Yahuud waahidiin min balad Aasiya ligooni fi beet Allah.
Wa wakit humman ligooni,
ana dahaabah kammalt tihaarti.
Ana ma gaaʼid niharrich al‑naas wa la nisawwi kalaam.
Wa dool bas al‑naas al‑waajib yathamooni giddaamak al‑yoom kan sahiih induhum foogi chakwa.
20 Walla khalli al‑naas al‑gaaʼidiin hini hassaʼ yuguulu leena ayyi cheyy fasil al‑ligooh foogi wakit ana gaaʼid giddaam al‑majlas.
21 Cheyy ma fiih,
illa wakit ana waagif fi usuthum,
ana kallamt be hiss aali wa gult :
‹ Yidooru yichaaruʼuuni al‑yoom achaan ana muʼmin be l‑buʼaas.
› »
22 Wa Fiiliks irif kalaam katiir fi derib Isa al‑Masiih wa wakit simiʼ kalaam Buulus,
hu battal al‑malamma wa gaal :
« Nilizz al‑chariiʼa giddaam lahaddi Liisiyaas al‑khaayid al‑kabiir yaji. »
23 Wa amar masʼuul al‑askar achaan yaharsu Buulus wa anta izin le rufgaanah achaan yisallumuuh wa yisaaʼuduuh.
24 Wa baʼad ayyaam,
Fiiliks ja maʼa martah.
Usumha Duruusila wa hi Yahuudiiye.
Wa naada Buulus achaan dawwar yasmaʼ kalaamah fi l‑iimaan be l‑Masiih Isa.
25 Wa wakit Buulus gaaʼid yifassir leyah kalaam fi l‑adaala wa sabbitiin al‑nafs wa yoom al‑Hisaab al‑jaayi,
Fiiliks ankharaʼ wa gaal :
« Khalaas.
Hassaʼ da,
gabbil fi haraastak.
Yoom aakhar bas kan indi fursa ninaadiik. »
26 Fi fikrah,
akuun Buulus yantiih gurus achaan yatilgah wa naadaah yaji leyah iddat marraat wa wannas maʼaayah.
27 Laakin baʼad santeen,
Fiiliks hawwalooh wa khatto Burkiyuus Fastus waali fi badalah.
Wa Fiiliks ma talag Buulus min al‑sijin achaan dawwar al‑Yahuud yardo beyah.