Fi madiinat Tasaluuniiki
17
1 Wa Buulus wa Siila faato giddaam wa chaggo hillit Amfibuulis wa hillit Abuluuniya wa wislo fi madiinat Tasaluuniiki.
Wa fi l‑hille di,
al‑Yahuud induhum beet al‑sala.
2 Wa fi muddit talaata usbuuʼ,
Buulus gaaʼid yadkhul fi beet al‑sala kulla yoom al‑sabt misil fi aadtah.
Wa gaaʼid yinaakhich maʼa l‑Yahuud fi kalaam al‑Kitaab.
3 Wa gaaʼid yiwaddihah wa yisabbitah leehum kadar laabudda al‑Masiih yatʼab wa yabʼas min ust al‑maytiin.
Wa gaal leehum :
« Isa al‑niballikh leeku beyah da,
hu bas al‑Masiih al‑intu gaaʼidiin tarjooh. »
4 Wa waahidiin min al‑naas simʼo al‑kalaam da adiil wa aamano beyah wa lammo maʼa Buulus wa Siila.
Wa katiiriin min al‑naas al‑aamano humman min al‑Yuunaaniyiin al‑yaʼabudu Allah maʼa l‑Yahuud.
Wa beenhum awiin katiiraat muhimmaat fi l‑hille.
5 Wa be da,
al‑Yahuud al‑ma aamano,
hasadoohum le Buulus wa Siila.
Wa naado al‑naas al‑ma naafʼiin al‑raaykhiin fi l‑chawaariʼ wa lammoohum fi bakaan waahid.
Wa gammo harrachoohum lahaddi barjaal kabiir bigi fi lubb al‑hille.
Wa hajamo beet Yaasuun achaan yidooru yamurgu Buulus wa Siila fi giddaam al‑naas.
6 Wa wakit ma ligoohum,
karabo Yaasuun wa waahidiin min al‑akhwaan.
Wa l‑naas karroohum min al‑beet wa waddoohum giddaam hukkaam al‑hille.
Wa aato be hiss aali wa gaalo :
« Al‑naas dool gaaʼidiin yisawwu machaakil fi ayyi bakaan wa hassaʼ jo hini fi hillitna kula !
7 Wa Yaasuun da dayyafaahum.
Humman ma yitaabuʼu wasiiyat sultaan al‑Roomaaniyiin wa yiballukhu le l‑naas be malik aakhar usmah Isa ! »
8 Wa wakit naas al‑hille wa hukkaamhum simʼo al‑kalaam da,
barjalo bilheen.
9 Wa l‑hukkaam talabo min Yaasuun wa min al‑akhwaan al‑maʼaayah yikaffu gurus le damaanithum wa khalaas talagoohum.
Fi hillit Biriiya
10 Wa wakit bigi fi leel,
al‑akhwaan rassalo Buulus wa Siila fi hillit Biriiya.
Wa wakit wislo,
macho fi beet al‑sala hana l‑Yahuud.
11 Wa l‑Yahuud al‑fi Biriiya kariimiin min al‑Yahuud al‑gaaʼidiin fi Tasaluuniiki.
Humman simʼo kalaam Allah be farha wa gammo yagru fi l‑Kitaab kulla yoom achaan yaʼarfu kan taʼliim hana Buulus sahiih walla ma sahiih.
12 Wa katiiriin minhum aamano be Isa.
Wa been al‑naas al‑aamano fi Yuunaaniyiin kula.
Wa beenhum fi awiin muhimmaat fi l‑hille wa rujaal katiiriin.
13 Wa l‑Yahuud al‑gaaʼidiin fi Tasaluuniiki simʼo Buulus gaaʼid yiballikh kalaam Allah fi Biriiya.
Wa macho wa bado yiharruchu naas al‑hille achaan yazʼalo min Buulus.
14 Wa tawwaali,
al‑akhwaan chaalo Buulus min al‑hille wa waddooh le khachum al‑bahar.
Wa Siila wa Timuutaawus gaʼado fi l‑hille.
15 Wa l‑akhwaan raafago Buulus lahaddi wislo fi madiinat Atiina wa khalaas gabbalo hillithum.
Wa Buulus wakkalaahum achaan Siila wa Timuutaawus yaju leyah ajala.
Buulus fi madiinat Atiina
16 Wa wakit Buulus gaaʼid yarjaahum fi madiinat Atiina,
hu chaaf asnaam fi ayyi bakaan.
Wa da bigi leyah gaasi bilheen.
17 Wa bada yadkhul fi beet al‑sala wa yinaakhich maʼa l‑Yahuud wa l‑Yuunaaniyiin al‑yaʼabudu Allah.
Wa kulla yoom,
hu gaaʼid yinaakhich fi l‑suug maʼa ayyi naadum al‑yalgaah hinaak.
18 Wa ulama waahidiin hana l‑falsafa min al‑Abiguuriyiin wa min al‑Riwaagiyiin gammo yinaakhuchu maʼa Buulus.
Wa waahidiin gaalo :
« Chunu kalaam hana l‑hajjaay al‑jaahil da ?
Maʼanaatah chunu ?
 » Wa waahidiin gaalo :
« Akuun yikallim be ilaahaat hana buldaan aakhariin.
 » Humman hajjo misil da achaan simʼo Buulus yibachchir be Isa wa buʼaasah.
19 Wa waddo Buulus fi majlas al‑hille.
Wa saʼalooh wa gaalo :
« Ooriina be l‑kalaam al‑jadiid al‑jibtah da.
20 Simiʼna minnak kalaam ajiib wa nidooru nafhamooh adiil. »
21 Wa kulla naas Atiina wa l‑ajaanib al‑saakniin maʼaahum yiriidu bilheen yinaakhuchu fi ayyi raay jadiid.
22 Wa Buulus gamma fi ust al‑majlas wa gaal :
« Ya naas Atiina.
Ana naʼarif kadar fi kulla cheyy intu naas al‑tiriidu al‑adyaan.
23 Wa wakit ana gaaʼid nuruukh fi hillitku,
chift madaabihku.
Wa ligiit madbah waahid wa gareet al‑kalaam al‑maktuub foogah buguul :
‹ Le l‑ilaah al‑ma maʼruuf.
 › Wa khalaas,
ana niʼooriiku be Allah,
al‑ilaah al‑taʼabuduuh wa ma taʼarfuuh.
24 Allah khalag al‑dunya wa kulla cheyy al‑gaaʼid foogha.
Hu Rabb al‑samaawaat wa l‑ard.
Wa Allah ma saakin fi buyuut hana l‑ibaada al‑yabnuuhum al‑naas.
25 Hu ma hawjaan khidmit al‑naas achaan cheyy ma mugassir leyah.
Hu bas al‑yanti al‑haya wa l‑nafas le kulla l‑naas wa hu bas al‑yantiihum kulla cheyy.
26 « Wa min naadum waahid,
hu khalag kulla l‑gabaayil wa gassam leehum al‑buldaan al‑yaskunu fooghum fi kulla l‑ard.
Wa min al‑awwal,
hu haddad leehum muddit al‑wakit al‑gaaʼidiin foogah wa haddad huduud diyaarhum.
27 Wa Allah sawwa misil da achaan al‑naas yifattuchuuh wa akuun yalgooh.
Laakin be l‑akiid,
hu ma baʼiid min ayyi waahid minnina
28 achaan beyah hu bas,
niʼiichu wa nuruukhu wa nukuunu.
Wa misil waahidiin min chuʼaraaku kula gaalo :
‹ Aniina zurriiytah. ›
29 Wa kan aniina zurriiyit Allah,
ma waajib nifakkuru kadar Allah bichaabih dahab wa la fudda wa la hajar.
Wa la bichaabih ayyi sanam al‑naas sanaʼooh be gudrithum walla be afkaarhum.
30 « Allah ma haasab al‑naas fi zaman al‑jahal wa laakin hassaʼ Allah yinaadi kulla l‑naas fi ayyi bakaan achaan yutuubu min zunuubhum.
31 Wa Allah gataʼ leena yoom achaan yihaasib foogah kulla naas al‑dunya be l‑adaala.
Wa Allah kallaf al‑hisaab da le l‑raajil al‑hu azalah.
Wa l‑raajil da,
Allah baʼasah min ust al‑maytiin achaan kulla l‑naas yaʼarfu da bas al‑raajil al‑hu azalah. »
32 Wa wakit simʼo be l‑buʼaas,
waahidiin minhum achchammato le Buulus laakin waahidiin gaalo :
« Nidooru inta tihajji leena battaan be l‑kalaam da. »
33 Wa be da,
Buulus marag min malammithum.
34 Wa waahidiin minhum macho maʼa Buulus wa aamano.
Wa beenhum fi raajil waahid usmah Diyuuniis.
Hu naadum min majlas madiinat Atiina.
Wa fi mara waahide usumha Damaariis.
Wa naas aakhariin kula aamano.