Butrus fassar al‑cheyy al‑sawwaah
11
1 Al‑rusul wa l‑akhwaan al‑fi daar al‑Yahuudiiya simʼo kadar al‑naas al‑ma Yahuud kula simʼo kalaam Allah wa aamano.
2 Wa wakit Butrus gabbal fi Madiinat al‑Khudus,
al‑Masiihiyiin al‑min al‑Yahuud gammo yaharjuuh
3 wa gaalo :
« Maala inta dakhalt fi beet al‑naas al‑ma mutahhariin wa akalt maʼaahum ? »
4 Wa Butrus gamma ooraahum be kulla cheyy al‑bigi min al‑awwal lahaddi l‑akhiir wa gaal :
5 « Awwal ana gaaʼid nisalli fi hillit Yaafa wa fi ruʼya jaat leyi.
Wa fi l‑ruʼya di,
ana chift cheyy misil gitʼe kabiire mafluula wa makruuba min jawaanibha al‑arbaʼa naazle min al‑sama.
6 Wa ana chiftaha adiil wa chift fi lubbaha kulla nafar al‑haywaanaat al‑fi l‑ard,
min haywaanaat al‑kadaade wa l‑zawaahif wa l‑tuyuur.
7 Wa simiʼt hiss gaaʼid yihajji leyi wa yuguul :
‹ Ya Butrus,
gumm !
Adbah wa aakul. ›
8 Wa raddeet leyah wa gult :
‹ La,
ya Rabbi !
Abadan ma dakhkhalt fi khachmi cheyy haraam wa la cheyy nijis. ›
9 Wa battaan al‑hiss kallam leyi min al‑sama wa gaal :
‹ Al‑cheyy al‑Allah tahharah,
ma tuguul nijis. ›
10 Wa l‑cheyy da bigi talaata marraat.
Wa baʼad da,
al‑gitʼe gabbalat fi l‑sama be kulla cheyy al‑foogha.
11 « Wa fi l‑wakit da bas,
talaata rujaal jo fi l‑beet al‑ana deef foogah wa rassaloohum leyi min Geesariiya.
12 Wa l‑Ruuh al‑Khudduus amaraani achaan namchi maʼaahum bala chakak.
Wa khalaas,
gammeet maʼaahum wa l‑akhwaan al‑sitte dool macho maʼaayi.
Wa wakit dakhalna fi beet al‑raajil da,
13 hu ooraana be kikkeef hu chaaf waahid min al‑malaaʼika waagif fi beetah.
Wa l‑malak gaal leyah :
‹ Rassil rujaal fi Yaafa achaan yinaadu Simʼaan al‑binaaduuh Butrus yaji leek.
14 Wa hu bas yiʼooriik al‑kalaam al‑beyah tanjo,
inta wa kulla naas beetak. ›
15 « Wa wakit ana gammeet achaan nikallim leehum,
al‑Ruuh al‑Khudduus nazal fooghum misil nazal foogna fi l‑awwal.
16 Wa fakkart fi l‑kalaam al‑Rabbina Isa gaalah leena.
Hu gaal :
‹ Yahya khattas al‑naas fi l‑almi wa laakin Allah yikhattisku be l‑Ruuh al‑Khudduus. ›
17 Wa Allah sawwa leehum nafs al‑cheyy al‑sawwaah leena wa nazzal fooghum nafs al‑baraka al‑nazzalaaha foogna wakit aniina aamanna be Rabbina Isa al‑Masiih.
Wa ana yaatu le niwaggif al‑cheyy al‑Allah yidoor yisawwiih ? »
18 Wa wakit al‑naas al‑yaharju Butrus simʼo al‑kalaam da,
sakato khalaas.
Wa chakaro Allah wa gaalo :
« Be misil da,
Allah fatah le l‑naas al‑ma Yahuud derib al‑tooba al‑yiwaddiihum le l‑haya al‑abadiiye. »
Al‑muʼminiin al‑fi Antaakiya
19 Wa baʼad moot Istifaan,
al‑muʼminiin chatto be sabab al‑taʼab al‑chadiid al‑ja fooghum.
Wa waahidiin macho baʼiid lahaddi Lubnaan wa jaziirat Khubrus wa hillit Antaakiya.
Wa ballakho al‑bichaara le l‑Yahuud laakin ma ballakhooha le l‑naas al‑aakhariin.
20 Wa laakin waahidiin minhum al‑min Khubrus wa l‑Khayrawaan macho fi Antaakiya wa ballakho bichaarat al‑Rabb Isa le l‑Yuunaaniyiin kula.
21 Wa gudrat Allah maʼaahum wa naas katiiriin aamano be l‑Rabb Isa wa chaalo derbah.
22 Wa ummat al‑Masiih al‑gaaʼide fi Madiinat al‑Khudus simʼat al‑khabar da wa rassalo Barnaaba fi Antaakiya.
23 Wa Barnaaba wisil fi Antaakiya wa chaaf al‑baraka al‑Allah antaahum.
Wa hu farhaan minhum wa chajjaʼaahum kulluhum achaan yagoodu saabtiin fi l‑Rabb be niiye waahide.
24 Wa Barnaaba raajil adiil wa malaan be l‑Ruuh al‑Khudduus wa iimaanah chadiid.
Wa naas katiiriin aamano be l‑Rabb Isa wa lammo maʼa l‑muʼminiin.
25 Wa Barnaaba gamma macha fi hillit Tarsuus achaan yifattich Chaawuul.
26 Wa ligiih wa gabbal beyah fi Antaakiya.
Wa muddit sana kaamile,
Barnaaba wa Chaawuul gaaʼidiin yilimmu maʼa jamaaʼat al‑muʼminiin wa yiʼallumu naas katiiriin.
Wa awwal marra fi Antaakiya bas al‑naas khatto le talaamiiz Isa,
usum al‑Masiihiyiin.
27 Wa fi l‑wakit da,
anbiya waahidiin jo fi Antaakiya min Madiinat al‑Khudus.
28 Wa waahid minhum usmah Akhaabuus gamma kallamaahum be kalaam jaayi min al‑Ruuh al‑Khudduus wa gaal juuʼ chadiid yanzil fi kulla l‑buldaan.
Wa sahiih,
al‑juuʼ da bigi wakit Kuluudi sultaan al‑Roomaaniyiin.
29 Wa l‑talaamiiz al‑fi Antaakiya chaalo niiye achaan ayyi naadum yanti musaaʼada ale hasab gudurtah wa yirassuluuha le l‑akhwaan al‑gaaʼidiin fi daar al‑Yahuudiiya.
30 Wa lammo kulla l‑musaaʼada wa antooha amaana le Barnaaba wa Chaawuul achaan yiwadduuha le kubaaraat al‑muʼminiin al‑fi Madiinat al‑Khudus.