Duʼa hana l‑Masiih
17
1 Wa wakit Isa gaal kulla l‑kalaam da khalaas,
hu rafaʼ raasah wa chaaf foog fi l‑sama wa gaal :
« Ya Abuuyi,
al‑wakit ja.
Anti majd leyi ana Ibnak achaan ana Ibnak nimajjidak.
2 Misil inta anteetni sulta fi kulla l‑naas,
ana nanti al‑haya al‑abadiiye le kulla l‑naas al‑inta anteethum leyi.
3 Wa l‑haya al‑abadiiye hi,
yaʼarfuuk inta Allah al‑Waahid al‑sahiih wa yaʼarfu Isa al‑Masiih al‑inta rassaltah.
4 Ana kammalt al‑amal al‑inta kallaftini beyah wa be da,
ana majjadtak fi l‑ard.
5 Wa hassaʼ,
ya Abuuyi,
antiini majd fi jambak wa da nafs al‑majd al‑indi jambak gabul bidaayit al‑dunya.
6 « Ana arraft usmak le l‑naas al‑inta naadeethum min usut naas al‑dunya achaan tantiihum leyi.
Awwal humman hineeyak wa kallaftini beehum wa humman taabaʼo kalaamak.
7 Wa hassaʼ yaʼarfu kadar kulla cheyy al‑inta anteetni ja minnak
8 achaan ana anteethum al‑kalaam al‑inta anteetni.
Wa humman khiblooh wa yaʼarfu akiid ana jiit minnak wa aamano kadar inta rassaltini.
9 « Wa ana nasʼalak leehum.
Ana ma nasʼalak le naas al‑dunya laakin le l‑naas al‑inta kallaftini beehum achaan humman hineeyak.
10 Wa kulla l‑naas al‑hineeyak,
humman hineeyi.
Wa fiihum humman,
yibiin majdi.
11 Ana ma nagood fi l‑dunya laakin humman gaaʼidiin fi l‑dunya wa ana namchi leek.
Ya Abuuyi al‑Khudduus,
ahfadhum be usmak al‑anteetni,
achaan humman yabgo waahid misil inta wa ana waahid.
12 Wakit ana gaaʼid maʼaahum ana hafadtuhum be usmak,
al‑usum al‑inta anteetni.
Ana harastuhum wa ma fi naadum minhum hilik,
illa l‑naadum al‑laabudda yahlak achaan al‑kalaam al‑maktuub fi l‑Kitaab yitimm.
13 « Wa hassaʼ namchi leek.
Wa wakit ana lissaaʼ fi l‑dunya,
nuguul al‑kalaam da achaan humman yafraho farha chadiide misil ana nafrah.
14 Ana ooreet naasi be kalaamak wa naas al‑dunya kirhoohum achaan naasi ma hana l‑dunya misil ana kula ma hana l‑dunya.
15 Ana ma nasʼalak achaan tamrughum min al‑dunya.
Nasʼalak achaan tahfadhum min Ibliis al‑chariir.
16 Humman ma naas hana l‑dunya misil ana kula ma hana l‑dunya.
17 Khalli al‑hagg yisawwiihum khaassiin leek.
Kalaamak bas al‑hagg.
18 Ana rassaltuhum fi l‑dunya misil inta awwal rassaltini fi l‑dunya.
19 Wa fi chaanhum ana nikhassis nafsi achaan humman kula yabgo khaassiin leek be l‑sahiih.
20 « Ana ma gaaʼid nasʼalak le talaamiizi wiheedhum.
Laakin ana nasʼalak le l‑naas al‑yasmaʼo kalaamhum wa yiʼaamunu beyi.
21 Ya Abuuyi,
ana gaaʼid nasʼalak leehum achaan kulluhum yabgo waahid misil inta fiyi wa ana fiik.
Khalli humman kula yabgo waahid maʼaana achaan kulla naas al‑dunya yiʼaamunu kadar inta rassaltini.
22 « Al‑majd al‑inta anteetah leyi,
ana anteetah leehum achaan humman yabgo waahid misil inta wa ana waahid
23 yaʼni ana fiihum wa inta fiyi.
Khalli wihdathum tukuun kaamile wa be da,
kulla l‑naas yaʼarfu kadar inta rassaltini wa tihibbuhum misil tihibbini.
24 « Ya Abuuyi,
nidoor kadar al‑naas al‑anteethum leyi yagoodu maʼaayi fi l‑bakaan al‑ana nagood foogah.
Achaan hinaak yichiifu al‑majd al‑inta anteetni.
Wa da be sabab mahabbitak leyi min gubbaal bidaayit al‑dunya.
25 Ya Abuuyi al‑aadil,
naas al‑dunya ma irfook.
Laakin ana iriftak wa l‑naas dool yaʼarfu kadar inta rassaltini.
26 Ana arraftuhum be usmak wa niʼarrifhum beyah ziyaada achaan mahabbitak leyi tabga fiihum humman kula wa ana zaati nukuun fiihum. »