Al‑Masiih anta akil le 5 000 naas
6
1 Wa baʼad da,
Isa gamma faat wa macha fi nuss al‑sabhaani hana bahar al‑Jaliil al‑maʼruuf kula be bahar Tibiriyaas.
2 Wa naas katiiriin bilheen gaaʼidiin yitaabuʼuuh achaan chaafo al‑ajaayib al‑sawwaahum le l‑mardaaniin.
3 Wa Isa talaʼ fi l‑hajar wa gaʼad tihit maʼa talaamiizah.
4 Wa fi l‑wakit da,
iid al‑Fisha garrab.
Wa da iid al‑Yahuud.
5 Wa Isa rafaʼ raasah wa chaaf naas katiiriin marra waahid jaayiin leyah.
Wa hu saʼal Filibbus wa gaal :
« Nibiiʼu khubza min ween achaan kulla l‑naas dool yaakulu ? »
6 Wa Isa yaʼarif tamaam al‑cheyy al‑yisawwiih laakin saʼal Filibbus achaan yijarrib iimaanah.
7 Wa Filibbus radda leyah wa gaal :
« Kan nachru khubza hana 200 diinaar* kula,
da ma yitimm leehum achaan ayyi waahid yalga lugma waahide bas ».
8 Wa tilmiiz waahid hajja leyah.
Wa hu Andareeyas akhu Simʼaan Butrus wa gaal :
9 « Hini fi wileed waahid wa hu indah khamsa khubza hana gameh abyad wa huut itneen dugaag.
Wa laakin da yanfaʼ chunu le l‑naas al‑katiiriin dool ? »
10 Wa Isa gaal leehum :
« Gaʼʼudu al‑naas dool tihit.
» Wa l‑bakaan da indah gechch katiir wa l‑naas gaʼado foogah.
Wa adad al‑naas hawaale 5 000 rujaal.
11 Wa Isa chaal al‑khubza wa chakar Allah.
Wa gassamoohum le l‑naas al‑gaaʼidiin.
Wa chaal al‑huut wa sawwa nafs al‑cheyy.
Wa kulla l‑naas akalo lahaddi chibʼo.
12 Wa baʼad kulluhum chibʼo,
Isa hajja le talaamiizah wa gaal :
« Limmu al‑akil al‑faddal achaan ma yiwaddir minnah cheyy ».
13 Wa lammooh wa malo 12 guffa min al‑fadle al‑faddalooha al‑naas min al‑khamsa khubza hana l‑gameh al‑abyad.
14 Wa l‑naas chaafo al‑ajab al‑Isa sawwaah wa bado yihajju ambeenaathum wa yuguulu :
« Akiid,
da bas al‑nabi al‑waajib yaji fi l‑dunya ! »
15 Wa Isa irif al‑naas yidooru yakurbuuh wa yukhuttuuh fooghum malik be gu wa achaan da,
khallaahum battaan wa macha wiheedah fi l‑hajar.
Al‑Masiih raakh fi raas al‑almi
16 Wa l‑wata bigat makhrib wa talaamiizah dallo min al‑hajar wa macho fi khachum al‑bahar.
17 Wa rikbo fi markaba wa bado yagtaʼo al‑bahar achaan yamchu le hillit Kafar Naahuum.
Wa l‑wata bigat leel wa Isa lissaaʼ ma ja leehum.
18 Wa riih chadiide gammat tusuug wa sabbabat challaal chadiid fi l‑almi.
19 Wa wakit al‑talaamiiz saago al‑markaba khamsa aw sitte kiilomitir min khachum al‑bahar,
humman chaafo Isa.
Hu raayikh min foog le l‑almi wa gaaʼid yigarrib le l‑markaba.
Wa humman khaafo khoof chadiid.
20 Laakin Isa hajja leehum wa gaal :
« Da ana bas.
Ma takhaafo ! »
21 Wa khalaas khallooh rikib fi l‑markaba.
Wa tawwaali,
wassalo fi l‑bakaan al‑yidooru yalhagooh.
Isa hu Khubz al‑Haya
22 Wa ambaakir,
al‑naas al‑gaʼado jamb al‑bahar fi nussah al‑sabhaani fakkaro wa irfo kadar awwal fiyah markaba waahide bas wa Isa ma rikib foogha maʼa talaamiizah wa talaamiizah faato wiheedhum.
23 Wa maraakib waahidiin min hillit Tibiriyaas jo fi l‑bakaan al‑foogah al‑Rabb Isa chakar Allah wa l‑naas akalo al‑khubza.
24 Wa wakit al‑naas irfo Isa ma fiih wa talaamiizah ma fiihum,
humman rikbo fi l‑maraakib wa macho fi hillit Kafar Naahuum achaan yifattuchu Isa.
25 Wa gataʼo al‑bahar wa ligo Isa.
Wa saʼalooh wa gaalo :
« Sayyidna,
jiit hini mata ? »
26 Wa Isa radda leehum wa gaal :
« Asmaʼo nuguul leeku al‑hagg,
intu ma fattachtuuni achaan chiftu al‑ajaayib laakin fattachtuuni achaan akaltu al‑khubza wa bigiitu chabʼaaniin.
27 Ma tijaahudu achaan talgo al‑akil al‑yatlaf wa laakin jaahudu achaan talgo al‑akil al‑ma yatlaf wa yantiiku al‑haya al‑abadiiye.
Da bas al‑akil al‑Ibn al‑Insaan yantiih leeku.
Hu al‑naadum al‑Allah abuuh chahad leyah wa akkad hu radyaan beyah khalaas. »
28 Wa saʼalooh wa gaalo :
« Waajib nisawwu chunu achaan nisawwu al‑amal al‑Allah yidoorah ? »
29 Wa Isa radda leehum wa gaal :
« Daahu al‑cheyy al‑Allah yidoorah.
Waajib tiʼaamunu be l‑naadum al‑Allah rassalah. »
30 Wa saʼalooh wa gaalo :
« Ween al‑alaama min Allah al‑tiwassifha leena achaan nichiifuuha wa niʼaamunu beek ?
Weenu al‑ajab al‑tisawwiih inta ?
31 Zamaan,
juduudna akalo al‑manna fi l‑sahara wa maktuub fi l‑Kitaab :
﴾Hu antaahum akil min al‑sama.﴿
»*
32 Wa Isa gaal leehum :
« Asmaʼo nuguul leeku al‑hagg,
al‑antaaku al‑akil min al‑sama ma Muusa.
Laakin abuuyi Allah bas yantiiku al‑akil al‑sahiih al‑naazil min al‑sama.
33 Achaan al‑akil al‑Allah yantiiku da,
hu al‑naazil min al‑sama wa yanti al‑haya le kulla l‑naas. »
34 Wa gaalo leyah :
« Ya sayyidna,
antiina al‑akil da kulla yoom. »
35 Wa Isa gaal :
« Ana bas Khubz al‑Haya.
Ayyi naadum al‑yaji leyi ma yabga jiiʼaan wa ayyi naadum muʼmin beyi ma yabga atchaan.
36 Wa ana ooreetku kadar intu chiftuuni laakin ma aamantu beyi.
37 Kulla l‑naas al‑abuuyi yikallifni beehum,
yaju leyi wa ayyi naadum al‑yaji leyi,
ana abadan ma naturdah.
38 Ana nazalt leeku min al‑sama achaan nisawwi hasab al‑yidoorah Allah al‑rassalaani wa ma achaan nisawwi hasab al‑nidoorah ana.
39 Wa hu yidoor ana ma nikhalli naadum waahid yiwaddir min al‑naas al‑kallafaani beehum.
Wa nigawwimhum kulluhum min al‑moot fi l‑yoom al‑akhiir.
40 Da bas al‑cheyy al‑abuuyi yidoorah,
kulla naadum al‑yichiif Ibn Allah wa yiʼaamin beyah yalga al‑haya al‑abadiiye wa ana nigawwimah fi l‑yoom al‑akhiir. »
41 Wa fi chaan da,
al‑Yahuud gammo yihajju ambeenaathum wa yachku minnah achaan hu gaal hu al‑akil al‑nazal min al‑sama.
42 Wa gaalo :
« Da ma Isa wileed Yuusuf walla ?
Abuuh wa ammah naʼarfuuhum.
Kikkeef yuguul :
‹ Ana nazalt min al‑sama › ? »
43 Wa Isa radda leehum wa gaal :
« Ma tachku minni ambeenaatku.
44 Naadum ma yagdar yaji leyi illa kan abuuyi al‑rassalaani yijiibah leyi.
Wa l‑naadum al‑yaji leyi nigawwimah min al‑moot fi l‑yoom al‑akhiir.
45 Wa maktuub fi kitaab al‑anbiya :
﴾Allah zaatah yiʼallimhum kulluhum.﴿*
Wa ayyi naadum al‑yasmaʼ kalaam abuuyi wa yilʼallam minnah,
yaji leyi.
46 Ma fi naadum chaaf abuuyi Allah.
Illa hu al‑jaayi min Allah,
hu wiheedah bas al‑chaaf abuuyi.
47 « Asmaʼo nuguul leeku al‑hagg,
al‑naadum al‑muʼmin beyi ligi al‑haya al‑abadiiye khalaas.
48 Ana Khubz al‑Haya.
49 Juduudku akalo al‑manna fi l‑sahara wa laakin humman maato.
50 Wa daahu al‑akil al‑naazil min al‑sama wa ayyi naadum al‑yaakul minnah ma yumuut.
51 Ana Khubz al‑Haya al‑nazal min al‑sama.
Wa ayyi naadum al‑yaakul min al‑akil da,
yiʼiich daayman.
Wa l‑akil al‑ana nantiih le naas al‑dunya achaan yiʼiichu,
hu laham jismi. »
52 Wa l‑Yahuud alkhaalato wa gaalo :
« Kikkeef al‑naadum da yagdar yantiina lahamah le naakuluuh ? »
53 Wa Isa gaal leehum :
« Asmaʼo nuguul leeku al‑hagg,
kan intu ma taakulu laham Ibn al‑Insaan wa ma tacharbo dammah,
ma talgo al‑haya.
54 Wa ayyi naadum al‑yaakul lahami wa yachrab dammi yalga al‑haya al‑abadiiye wa nigawwimah min al‑moot fi l‑yoom al‑akhiir.
55 Achaan lahami hu akil sahiih wa dammi charaab sahiih.
56 Wa ayyi naadum al‑yaakul min lahami wa yachrab min dammi yasbit foogi wa ana nasbit foogah.
57 Abuuyi al‑rassalaani indah al‑haya wa ana kula indi al‑haya min abuuyi.
Wa be misil da,
ayyi naadum al‑yaakul min lahami yahya achaan ana nantiih al‑haya.
58 Wa khalaas,
daahu al‑akil al‑nazal min al‑sama.
Hu ma misil al‑manna al‑juduudku akalooha.
Humman maato laakin al‑naadum al‑yaakul al‑akil al‑ana nantiih yahya ila l‑abad. »
59 Wa kulla l‑kalaam da Isa gaalah fi hillit Kafar Naahuum wakit hu gaaʼid yiʼallim al‑naas fi beet al‑sala.
Talaamiiz waahidiin khallo al‑Masiih
60 Wa talaamiiz katiiriin simʼo al‑kalaam da wa gaalo :
« Al‑kalaam da gaasi bilheen.
Yaatu al‑yagdar yahmalah ? »
61 Laakin Isa irif fi galbah talaamiizah gaaʼidiin yachku min kalaamah.
Wa hu hajja leehum wa gaal :
« Tichakkuku achaan gult al‑kalaam da walla ?
62 Tisawwu chunu kan tichiifu Ibn al‑Insaan taaliʼ fi l‑bakaan al‑awwal gaaʼid foogah ?
63 Ruuh Allah yanti al‑haya.
Wa l‑gudra al‑insaaniiye ma indaha faayde.
Al‑kalaam al‑gultah leeku jaayi min al‑Ruuh wa yantiiku al‑haya.
64 Laakin waahidiin minku ma yiʼaamunu.
» Achaan min al‑bidaaya,
Isa irif yaatumman al‑ma yiʼaamunu wa irif yaatu al‑naadum al‑yukhuunah.
65 Wa gaal leehum :
« Achaan da bas gult leeku naadum ma yagdar yaji leyi illa kan abuuyi Allah antaah izin. »
66 Wa min al‑yoom da,
talaamiiz katiiriin khallooh wa ma taabaʼooh battaan.
67 Wa Isa saʼal al‑talaamiiz al‑atnaachar wa gaal :
« Intu kula tidooru tikhalluuni walla ? »
68 Wa Simʼaan Butrus radda leyah wa gaal :
« Ya sayyidna,
namchu ween ?
Inta wiheedak indak kalaam al‑haya al‑abadiiye.
69 Aamanna beek wa naʼarfu inta bas al‑Khudduus al‑Allah rassalah. »