Al‑iimaan wa l‑waajibaat
17
1 Wa Isa hajja le talaamiizah wa gaal :
« Laabudda achya waahidiin yabgo wa be sababhum naas waahidiin yamurgu min al‑derib.
Wa laakin al‑azaab yarja al‑naadum al‑yisabbib al‑achya dool.
2 Aywa,
kan naadum yitallif iimaan hana waahid min al‑muʼminiin al‑dugaag dool,
al‑azaab al‑yarjaah yabga chadiid lahaddi akheer leyah kan rabato murhaaka fi ragabatah wa zagalooh fi lubb al‑bahar.
3 Achaan da,
khuttu baalku fi nufuusku.
« Kan akhuuk khiti,
aharjah.
Wa kan hu nidim fi l‑cheyy al‑sawwaah,
saamihah.
4 Kan fi l‑yoom al‑waahid hu yakhta foogak sabʼa marraat wa yigabbil leek sabʼa marraat wa yuguul :
‹ Ana tubt min al‑khata da ›,
waajib tisaamihah. »
5 Wa l‑rusul hajjo le l‑Rabb Isa wa gaalo :
« Ziid leena al‑iimaan. »
6 Wa l‑Rabb Isa gaal :
« Kan iimaanku sakhayyar misil habbat al‑kireeb kula,
tagdaro taamuru al‑chadara al‑kabiire di wa tuguulu :
‹ Gummi min hini wa maggini nafiski fi l‑bahar › wa hi tasmaʼ kalaamku.
7 « Ayyi naadum minku yisawwi chunu kan indah abid al‑gaaʼid yahrit leyah walla yasrah ?
Wakit abdah yigabbil min al‑kadaade,
hal siidah yuguul :
‹ Taʼaal aakul maʼaayi › ?
8 La,
ma ke.
Yuguul :
‹ Khayyir khalagak wa jahhiz leyi al‑acha.
Wa akhdim leyi lahaddi naakul wa nachrab.
Wa baʼad da bas,
inta kula taakul wa tachrab. ›
9 Hal hu yachkur abdah fi chaan hu sawwa al‑khidme al‑amarah beeha walla ?
La.
10 Wa nafs al‑cheyy intu kula.
Wakit sawweetu kulla cheyy al‑Allah amaraaku beyah,
waajib tuguulu :
‹ Aniina abiid bas wa ma sawweena ziyaada min al‑khidme al‑waajib nisawwuuha.
› »
Al‑naas al‑achara al‑induhum jidaam
11 Wa wakit Isa musaafir le Madiinat al‑Khudus,
hu faat be l‑huduud al‑been daar al‑Saamira wa daar al‑Jaliil.
12 Wa dakhal fi hille waahide wa achara rujaal al‑induhum jidaam gaabalooh.
Wa humman wagafo baʼiid minnah chiyya.
13 Wa sarakho leyah wa gaalo :
« Ya Isa !
Ya sayyidna !
Arhamna. »
14 Wa Isa chaafaahum wa gaal :
« Amchu wassufu nufuusku le raajil al‑diin. »
Wa macho.
Wa wakit humman fi l‑derib,
ligo al‑aafe wa bigo taahiriin.
15 Wa wakit waahid minhum irif kadar hu ligi al‑aafe,
gabbal le Isa wa gamma yachkur Allah be hiss aali.
16 Wa sajad giddaam Isa wa chakarah.
Wa l‑naadum al‑gabbal da,
hu Saamiri.
17 Wa Isa gaal :
« Al‑naas al‑ligo al‑aafe ma achara walla ?
Ween al‑tisʼa ?
18 Ma fi naadum aakhar al‑yidoor yachkur Allah,
illa l‑ajnabi da walla ? »
19 Wa gaal le l‑Saamiri :
« Gumm foog wa amchi fi derbak.
Ligiit al‑aafe be sabab iimaanak. »
Jayyit mamlakat Allah
20 Wa yoom waahid,
al‑Fariiziyiin saʼalo Isa fi jayyit mamlakat Allah.
Wa hu radda leehum wa gaal :
« Mamlakat Allah ma taji be alaamaat al‑tichiifuuhum.
21 Wa l‑naas ma yuguulu :
‹ Chiifu,
hi gammat hini › walla ‹ Hi hinaak ›.
Nuguul leeku mamlakat Allah gaaʼide ambeenaatku khalaas. »
22 Wa Isa hajja le talaamiizah wa gaal :
« Yaji wakit tabgo garmaaniin le tichiifu yoom waahid min ayyaam Ibn al‑Insaan wa laakin ma tichiifuuh.
23 Wa yuguulu leeku :
‹ Chiifu hu hini › walla ‹ Chiifu hu hinaak › laakin ma tamchu maʼaahum.
Ma titaabuʼuuhum.
24 Akiid al‑barraaga tabrug fi l‑sama min al‑nuss al‑waahid wa tinchaaf lahaddi fi l‑nuss al‑aakhar wa jayyit Ibn al‑Insaan kula tabga misil da wakit yigabbil.
25 Laakin awwal mukhaddar le Ibn al‑Insaan yatʼab taʼab chadiid wa l‑naas al‑fi wakitna da yaabooh.
26 « Wa haalat al‑naas fi yoom jayyit Ibn al‑Insaan tabga sawa sawa misil haalat al‑naas fi zaman Nooh.
27 Humman gaaʼidiin yaakulu wa yacharbo wa l‑rujaal yaakhudu awiin wa l‑awiin yaakhudan rujaal lahaddi l‑yoom al‑Nooh dakhal fi l‑safiina.*
Wa khalaas al‑almi ja wa akal kulla l‑naas.
28 « Wa bigi misil da fi zaman Luut kula.
Al‑naas gaaʼidiin yaakulu wa yacharbo wa yibiiʼu wa yachru wa yimaggunu chadar wa yabnu buyuut.
29 Laakin yoom al‑Luut marag min hillit Saduum,
Allah nazzal fooghum naar wa kibriit wa dammaraahum marra waahid.*
30 Wa yabga misil da wakit Allah yibayyin Ibn al‑Insaan.
31 « Fi l‑yoom da,
ayyi naadum al‑gaaʼid yinjamma fi raas beetah wa khumaamah daakhal fi l‑beet,
khalli yajri,
ma yidalli yichiilah.
Wa battaan ayyi naadum al‑yakhdim fi l‑zereʼ,
khalli yajri,
ma yigabbil beetah.
32 Fakkuru fi marit Luut.*
33 Ayyi naadum al‑yifattich yinajji nafsah,
yiwaddirha.
Laakin al‑naadum al‑ma yifakkir fi nafsah,
yanja.
34 Nuguul leeku kadar fi l‑leele diik,
fi naaseen fi sariir waahid,
al‑waahid yinrafiʼ wa l‑aakhar ma yinrafiʼ.
35 Wa fi awiin itneen gaaʼidaat sawa yarhakan khalla,
al‑waahide tinrafiʼ wa l‑aakhara ma tinrafiʼ.
36 Wa fi rujaal itneen gaaʼidiin yakhdumu fi nafs al‑zereʼ,
al‑waahid yinrafiʼ wa l‑aakhar ma yinrafiʼ. »
37 Wa talaamiizah saʼalooh wa gaalo :
« Ya sayyidna,
da yabga ween ?
» Wa radda leehum wa gaal :
« Al‑rimme tinaadi al‑suguura. »