Masal al‑khanamaay al‑muwaddire
15
1 Wa l‑naas al‑yilimmu al‑miiri wa muznibiin aakhariin jaayiin le Isa achaan yasmaʼo kalaamah.
2 Wa l‑Fariiziyiin wa l‑ulama gammo yihajju ambeenaathum wa yachku minnah wa gaalo :
« Al‑naadum da yakhbal al‑muznibiin wa yaakul maʼaahum. »
3 Wa Isa hajja leehum be masal wa gaal :
4 « Kan raajil minku indah miya khanam wa waddar waahide minhum,
hu yisawwi chunu ?
Hu yikhalli al‑tisʼa wa tisʼiin fi l‑kadaade wa yamchi yifattich al‑muwaddire lahaddi yalgaaha.
5 Wa wakit ligiiha khalaas,
hu yukhuttaha fi kataafeeh wa yichiilha be farah.
6 Wa wakit yaji beetah,
hu yinaadi rufgaanah wa jiiraanah wa yuguul leehum :
‹ Afraho maʼaayi achaan ana ligiit khanamaayti al‑muwaddire. ›
7 Wa nuguul leeku yabga misil da fi l‑sama kula.
Malaaʼikat Allah yafraho be l‑muznib al‑waahid al‑taab min zunuubah ziyaada min yafraho be l‑saalihiin al‑tisʼa wa tisʼiin al‑ma waajib leehum al‑tooba.
Masal al‑riyaal al‑muwaddir
8 « Wa mara waahide indaha achara hajar fudda wa kan waddarat waahid minhum,
hi tisawwi chunu ?
Hi tiwalliʼ al‑faanuus wa tuguchch al‑beet wa tifattichah marra waahid lahaddi talgaah.
9 Wa wakit ligatah khalaas,
hi tinaadi rafiigaatha wa jaaraatha wa tuguul leehum :
‹ Afraho maʼaayi achaan ana ligiit al‑hajar fudda al‑awwal waddartah. ›
10 Wa nuguul leeku malaaʼikat Allah yafraho be farha misil da kan muznib waahid yutuub min zunuubah. »
Masal al‑wileed al‑muwaddir
11 Wa Isa gaal :
« Fiyah raajil waahid indah awlaad itneen.
12 Wa yoom waahid,
al‑sakhayyar gaal le abuuh :
‹ Ya abuuyi,
antiini warasati.
› Khalaas abuuh gamma gassam maalah le awlaadah al‑itneen.
13 Wa baʼad ayyaam,
al‑wileed al‑sakhayyar baaʼ kulla cheyy al‑abu antaah wa saafar baʼiid le balad aakhara.
Wa fi l‑balad di,
bigi faasid wa tallaf kulla gursah.
14 « Wa wakit gursah kammal khalaas,
juuʼ chadiid dakhal fi l‑balad di wa l‑wileed ma indah cheyy.
15 Wa macha yakhdim le raajil waahid min al‑balad di.
Wa l‑raajil da chaalah le yirayyis khanaaziirah.
16 Wa l‑wileed taʼbaan lahaddi yidoor yaakul akil al‑khanaaziir.
Wa naadum ma antaah cheyy.
17 « Khalaas gamma yifakkir ke wa gaal :
‹ Fi beet abuuyi kulla l‑khaddaamiin chabʼaaniin lahaddi l‑akil yifaddil.
Wa hini ana mayyit min al‑juuʼ.
18 Hassaʼ da,
khalli nigabbil fi beet abuuyi wa nuguul leyah :
“Ya abuuyi,
ana sawweet khata le Allah wa khata leek inta.
19 Wa hassaʼ da,
ma waajib battaan tajʼalni misil wileedak.
Laakin ajʼalni misil waahid min khaddaamiinak.” ›
20 « Wa gamma maachi beet abuuh.
Wa wakit al‑wileed lissaaʼ jaayi fi l‑derib,
abuuh chaafah min baʼiid wa hanna foogah bilheen.
Wa jara laagaah wa hadanah wa habbaah.
21 Wa fi l‑bakaan da,
al‑wileed gaal le abuuh :
‹ Ya abuuyi,
ana sawweet khata le Allah wa khata leek inta.
Wa hassaʼ da,
ma waajib battaan tajʼalni wileedak. ›
22 « Laakin abuuh naada abiidah wa gaal :
‹ Ajala,
jiibu leyah ajmal khalag wa labbusuuh leyah.
Wa dissu leyah khaatim fi iidah wa naʼaal fi rijileenah.
23 Wa jiibu al‑ijil al‑samiin wa adbahooh.
Khalli naakulu wa nafraho !
24 Aywa,
wileedi da,
hu awwal jaʼaltah mayyit wa hassaʼ hu hayy.
Hu waddar wa ana ligiitah.
› Wa khalaas gammo yafraho.
25 « Wa fi l‑wakit da,
al‑wileed al‑kabiir gaaʼid yakhdim fi l‑zereʼ.
Wakit mugabbil,
ja gariib le l‑beet wa simiʼ haraka hana nuggaara.
26 Wa naada khaddaam waahid wa saʼalah chunu al‑kaan.
27 Wa l‑khaddaam radda leyah wa gaal :
‹ Akhuuk bas gabbal.
Wa abuuk dabah leyah al‑ijil al‑samiin achaan ligi akhuuk tayyib. ›
28 « Wa khalaas al‑wileed al‑kabiir ziʼil,
ma yidoor yadkhul fi l‑beet.
Wa abuuh marag leyah wa talab minnah achaan yadkhul.
29 Laakin hu aba wa gaal le abuuh :
‹ Asmaʼ.
Tawwal ana gaaʼid nakhdim leek misil abid.
Abadan ana ke ma khaalaft kalaamak.
Wa be da kula,
inta abadan ma dabaht leyi khanamaay sakhayre achaan nafrah maʼa rufgaani.
30 Wa laakin wileedak da tallaf kulla gursak maʼa l‑charaamiit wa wakit hu ja,
inta dabaht leyah al‑ijil al‑samiin ! ›