Al‑kubaaraat alʼaamaro didd Isa
14
1 Wa iid al‑Fisha wa iid al‑Khubza bala Tawwaara garrab.
Wa be yoomeen gubbaal al‑iid,
kubaaraat rujaal al‑diin wa l‑ulama gaaʼidiin yifakkuru kikkeef yakurbu Isa be khachch wa yaktuluuh.
2 Wa hajjo ambeenaathum wa gaalo :
« Ma nakurbuuh fi ayyaam al‑iid achaan akuun fitne tabga ambeenaat al‑chaʼab. »
Al‑mara sabbat itir fi raas Isa
3 Wa Isa gaaʼid fi beet Simʼaan al‑Mujaddim fi hillit Beet Anya.
Wa wakit hu gaaʼid yaakul,
mara waahide jaat leyah wa jaabat maaʼuun hana hajar malaan itir asli wa khaali bilheen al‑usmah naardiin.
Wa hi fakkat al‑maaʼuun da wa sabbat al‑itir kulla ke fi raas Isa.
4 Wa naas waahidiin ziʼilo wa hajjo ambeenaathum wa gaalo :
« Maala waddarat al‑itir al‑khaali da ?
5 Kan baaʼo al‑itir da,
yalgo minnah 300 diinaar* achaan yantuuh le l‑masaakiin.
» Wa khalaas harajooha.
6 Laakin Isa gaal :
« Maala tibachtunu al‑mara di ?
Hi sawwat leyi cheyy sameh.
7 Al‑masaakiin gaaʼidiin maʼaaku daayman wa tagdaro tisawwu leehum al‑kheer ayyi wakit al‑tidooruuh.
Laakin ana ma nagood maʼaaku daayman.
8 Wa hi sawwat al‑cheyy al‑gidratah.
Gubbaal ma numuut,
hi sabbat itir fi jismi achaan tijahhizni le l‑khabur.
9 Wa nuguul leeku al‑hagg,
yihajju fi l‑cheyy al‑hi sawwatah da wa yizzakkarooha fi ayyi bakaan fi l‑dunya al‑yiballukhu foogah al‑bichaara. »
Khiyaanat Yahuuza le Isa
10 Wa fi l‑bakaan da,
Yahuuza al‑Iskhariyooti waahid min al‑talaamiiz al‑atnaachar macha le kubaaraat rujaal al‑diin achaan yisallim leehum Isa.
11 Wa l‑kubaaraat simʼo kalaamah wa firho beyah wa gaalo yantuuh gurus.
Wa khalaas,
Yahuuza gaaʼid yifattich fursa achaan yisallim leehum Isa.
Jaahiziin al‑acha
12 Wa awwal yoom min ayyaam iid al‑Khubza bala Tawwaara ja.
Wa da l‑yoom al‑yadbaho foogah al‑hamal fi chaan acha iid al‑Fisha.
Wa l‑talaamiiz saʼalo Isa wa gaalo :
« Tidoor aniina namchu ween achaan nihassulu leek acha iid al‑Fisha ? »
13 Wa hu rassal naaseen min talaamiizah wa gaal :
« Amchu fi l‑madiina wa talgo naadum waahid chaayil jarr hana almi.
Taabuʼuuh.
14 Wa amchu fi l‑beet al‑hu yadkhul foogah wa hajju le siid al‑beet da wa guulu :
‹ Sayyidna al‑muʼallim gaal :
“Ween beet al‑diifaan al‑naakul foogah acha iid al‑Fisha maʼa talaamiizi ?” ›
15 Wa hu yiwassifku khurfa wasiiʼe wa jaahize foog fi l‑gasir.
Wa fi l‑bakaan da bas,
hassulu leena al‑acha. »
16 Wa l‑talaamiiz gammo wa macho fi l‑madiina wa ligo kulla cheyy misil hu gaalah leehum.
Wa hassalo acha iid al‑Fisha.
Al‑acha
17 Wa fi l‑makhrib,
Isa macha le l‑beet maʼa l‑talaamiiz al‑atnaachar.
18 Wa wakit gaaʼidiin yaakulu sawa,
Isa gaal :
« Nuguul leeku al‑hagg,
waahid minku yukhuunni.
Aywa,
naadum waahid al‑gaaʼid yaakul maʼaayi. »
19 Wa humman bigo haznaaniin.
Wa kulluhum saʼalooh,
al‑waahid baʼad al‑aakhar wa gaalo :
« Ana walla ? »
20 Wa gaal leehum :
« Al‑yukhuunni hu min al‑talaamiiz al‑atnaachar wa gaaʼid yidiss iidah maʼaayi fi l‑maaʼuun.
21 Wa akiid ana Ibn al‑Insaan numuut misil maktuub foogah fi l‑Kitaab.
Wa laakin al‑azaab yarja al‑raajil al‑yukhuunni ana Ibn al‑Insaan.
Akheer le l‑raajil da kan ma wildooh ! »
22 Wa wakit gaaʼidiin yilʼachcho,
Isa chaal khubza waahide wa chakar Allah wa kasarha wa antaaha leehum wa gaal :
« Chiiluuh.
Da jismi. »
23 Wa chaal kaas wa chakar Allah wa antaah leehum wa kulluhum chirbo minnah.
24 Wa Isa gaal leehum :
« Da dammi hana l‑muʼaahada al‑jadiide al‑yidaffig fi chaan naas katiiriin.
25 Wa nuguul leeku al‑hagg,
min al‑yoom ana ma nachrab battaan asiir al‑inab lahaddi l‑yoom al‑nachrab asiir al‑inab al‑jadiid fi mamlakat Allah. »
26 Wa khanno khine min al‑Zabuur wa marago min al‑madiina wa macho jabal al‑Zaytuun.
Al‑Masiih gaal Butrus yankurah
27 Wa Isa gaal leehum :
« Akiid kulluku tafchulu achaan maktuub fi l‑Kitaab :
﴾Nadrub al‑raaʼi wa l‑khanam yichittu.﴿*
28 Wa laakin baʼad ana baʼast,
namchi giddaamku fi daar al‑Jaliil. »
29 Wa Butrus radda leyah wa gaal :
« Kan kulla l‑aakhariin yikhalluuk kula,
ana ma nikhalliik ! »
30 Wa Isa radda leyah wa gaal :
« Nuguul leek al‑hagg,
al‑leele di gubbaal al‑diik ma yiʼooʼi marrateen,
inta tankurni talaata marraat. »
31 Wa Butrus ziʼil wa gaal :
« Ana kan numuut maʼaak kula,
abadan ma nankurak !
» Wa kulla l‑talaamiiz gaalo nafs al‑cheyy.
Duʼa Isa al‑Masiih fi Jasiimaani
32 Wa khalaas Isa wa talaamiizah macho fi bakaan usmah Jasiimaani.
Wa gaal leehum :
« Agoodu hini wakit ana gaaʼid nisalli. »
33 Wa chaal maʼaayah Butrus wa Yaakhuub wa Yuuhanna wa galbah barjal wa bada yatʼab bilheen.
34 Wa gaal leehum :
« Ana haznaan marra waahid lahaddi nidoor al‑moot.
Agoodu hini waaʼiyiin. »
35 Wa macha giddaam chiyya wa sajad fi l‑ard wa saʼal Allah achaan al‑taʼab da ma yaji foogah kan da mumkin.
36 Wa gaal :
« Abba !
Ya abuuyi !
Ma fi cheyy gaasi leek.
Baʼʼid minni kaas al‑taʼab da !
Laakin khalli yabga misil inta tidoorah wa ma misil ana nidoorah. »
37 Wa gabbal le l‑talaamiiz wa ligiihum naaymiin wa gaal le Butrus :
« Ya Simʼaan,
inta naayim walla ?
Saaʼa waahide kula ma gidirt tagood waaʼi ?
38 Agoodu waaʼiyiin wa asʼalo Allah achaan al‑taʼab ma yijarrib iimaanku wa yitallifah.
Aywa,
asʼalo Allah achaan al‑insaan indah niiye laakin ma indah gudra. »
39 Wa tarraf minhum battaan wa saʼal Allah be nafs al‑kalaam misil awwal.
40 Wa baʼadeen hu gabbal le l‑talaamiiz wa battaan ligiihum naaymiin achaan al‑noom chaalaahum marra waahid.
Wa ma irfo al‑kalaam al‑yuguulu leyah.
41 Wa taalit marra hu ja leehum wa gaal :
« Intu lissaaʼku naaymiin walla ?
Tidooru tinjammo ?
Khalaas,
al‑wakit tamma.
Ibn al‑Insaan khaanooh wa yisallumuuh le l‑muznibiin !
42 Gummu namchu !
Chiifu,
al‑yukhuunni jaayi ! »
Isa al‑Masiih karabooh
43 Wa Isa lissaaʼ ma kammal kalaamah bas,
Yahuuza al‑min al‑talaamiiz al‑atnaachar ja.
Wa jaab maʼaayah naas katiiriin induhum suyuuf wa isay.
Al‑rassaloohum kubaaraat rujaal al‑diin wa l‑ulama wa l‑chuyuukh.
44 Wa l‑khaayin antaahum alaama min awwal wa gaal :
« Al‑naadum al‑nihibbah,
da bas hu.
Khalli al‑askar yakurbuuh wa yiwadduuh. »
45 Wa wakit hu wassal fi l‑bakaan da,
hu macha ajala ke le Isa wa gaal :
« Sayyidna !
» Wa habbaah.
46 Wa khalaas Isa karabooh.
47 Wa waahid min al‑naas al‑gaaʼidiin maʼa Isa salla seefah wa darab abid hana kabiir rujaal al‑diin wa gataʼ adaanah.
48 Wa Isa hajja wa gaal :
« Kikkeef intu jiitu takurbuuni be suyuuf wa isay ?
Ana mujrim walla ?
49 Kulla yoom ana gaaʼid ambeenaatku fi fadaayit beet Allah wa gaaʼid niʼallim al‑naas wa intu ma karabtuuni.
Laakin khalli yabga misil maktuub fi l‑Kitaab. »
50 Wa khalaas kulla talaamiizah khallooh wa jaro.
51 Wa fi sabi waahid al‑taabaʼ Isa fi l‑bakaan da wa hu ma laabis lubaas illa khalag waahid hana gumaach khaali.
Wa l‑sabi da karabooh.
52 Wa laakin hu anbalas minhum khalla khalagah fi iideehum wa jara minhum aryaan.
Isa al‑Masiih giddaam al‑majlas
53 Wa Isa waddooh fi beet hana kabiir rujaal al‑diin.
Wa kulla kubaaraat rujaal al‑diin wa l‑ulama wa l‑chuyuukh laammiin fi l‑beet da wa gaaʼidiin yarjooh.
54 Wa Butrus taabaʼ Isa min baʼiid wa andassa fi hooch beet hana kabiir rujaal al‑diin.
Wa gaʼad tihit maʼa l‑askar jamb al‑naar.
Wa Butrus gaaʼid yiddaffa fi usuthum.
55 Wa kubaaraat rujaal al‑diin wa kulla naas hana l‑majlas fattacho chahaada achaan yahkumu le Isa be l‑moot.
Wa ma ligooha.
56 Wa naas katiiriin gammo wa chahado foogah be kidib laakin chahaadaathum kula chig chig.
57 Wa waahidiin gammo wa chahado foogah be kidib wa gaalo :
58 « Aniina simiʼnaah gaal :
‹ Beet Allah al‑banooh al‑naas da,
ana nikassirah.
Wa fi talaata yoom nabniih aakhar wa l‑yabnuuh,
ma naas.
› »
59 Laakin al‑chuhuud dool kula,
fi l‑kalaam da,
chahaadithum ma waahide.
60 Wa kabiir rujaal al‑diin gamma foog fi ust al‑malamma wa saʼal Isa wa gaal :
« Ma turudd leena walla ?
Ma simiʼt chahaadat al‑naas dool foogak walla ? »
61 Wa Isa gaaʼid saakit bas wa ma radda leyah kalaam.
Wa battaan kabiir rujaal al‑diin saʼalah wa gaal :
« Hal inta al‑Masiih,
Ibn Allah al‑waajib leyah kulla l‑chukur ? »
62 Wa Isa gaal :
« Ana hu.
Wa tichiifu Ibn al‑Insaan fi kursi jamb Allah al‑Gaadir fi nussah al‑zeenaay* wa tichiifuuh jaayi fi sahaab al‑sama. »*
63 Wa kabiir rujaal al‑diin gamma charrat khalagah min al‑zaʼal wa gaal :
« Battaan ma nidooru chaahid aakhar.
64 Intu zaatku simiʼtuuh hu achrak.
Kharaarku chunu ?
» Wa kulluhum gaalo waajib yahkumu leyah be l‑moot.
65 Wa waahidiin minhum gammo yibazzukhu foogah wa rabato wijhah wa darabooh wa gaalo :
« Ooriina yaatu al‑darabak !
» Wa l‑askar daggooh.
Butrus nakar al‑Masiih
66 Wa Butrus gaaʼid barra fi l‑hooch wa bineeye waahide min khaddaamaat hana kabiir rujaal al‑diin garrabat leyah.
67 Wa chaafat Butrus gaaʼid yiddaffa.
Wa chaafatah adiil wa akkadat wa gaalat :
« Inta kula maʼa Isa,
al‑min al‑Naasira ! »
68 Wa Butrus nakar wa gaal :
« Kalaamki da ma naʼarfah.
Kalaamki ma indah maʼana.
» Wa l‑diik ooʼa.
Wa Butrus marag wa macha ale khachum al‑hooch.
69 Wa l‑bineeye chaafatah battaan.
Wa hajjat le l‑naas al‑gaaʼidiin hinaak wa gaalat :
« Al‑naadum da kula minhum. »
70 Wa battaan hu nakar.
Wa baʼad chiyya al‑naas al‑waagfiin hinaak jo leyah wa gaalo :
« Akiid inta minhum achaan inta kula min daar al‑Jaliil ! »
71 Wa Butrus gamma halaf wa gaal :
« Khalli Allah yalʼanni kan kalaami ma sahiih !
Abadan ana ma naʼarif al‑raajil al‑tihajju beyah da. »
72 Wa tawwaali al‑diik ooʼa battaan.
Wa Butrus fakkar fi l‑kalaam al‑Isa gaalah leyah :
« Gubbaal al‑diik ma yiʼooʼi marrateen,
inta tankurni talaata marraat.
» Wa Butrus baka baki chadiid.