Dakhuul al‑Masiih fi l‑madiina
11
1 Wa Isa wa talaamiizah garrabo le Madiinat al‑Khudus wa lihgo hillaal Beet Faaji wa Beet Anya al‑fi jabal al‑Zaytuun.
Wa Isa rassal giddaamah talaamiiz itneen
2 wa gaal leehum :
« Amchu fi l‑hille al‑giddaamna di.
Wa fi khachum al‑hille talgo dahach waahid marbuut.
Wa l‑dahach da naadum lissaaʼ ma rikib foogah.
Hilluuh wa jiibuuh leyi hini.
3 Wa kan naadum yasʼalku wa yuguul :
‹ Maala intu gaaʼidiin tihillu al‑dahach ?
› guulu leyah :
‹ Al‑Rabb yidoorah wa yigabbilah tawwaali.
› »
4 Wa macho wa ligo al‑dahach fi l‑chaariʼ marbuut giddaam beet waahid.
Wa hallooh.
5 Wa l‑naas al‑gaaʼidiin hinaak saʼaloohum wa gaalo :
« Gaaʼidiin tisawwu chunu ?
Maala halleetu al‑dahach ? »
6 Wa raddo leehum be l‑kalaam al‑Isa gaalah leehum wa khalaas khalloohum macho be l‑dahach.
7 Wa jaabo al‑dahach le Isa wa farracho khulgaanhum foogah wa hu rikib.
8 Wa naas katiiriin farracho khulgaanhum fi l‑chaariʼ al‑Isa jaayi foogah le yijammuluuh.
Wa aakhariin gataʼo warchaal min al‑chadar wa farrachooh fi l‑turaab.
9 Wa l‑naas al‑jaayiin maʼa Isa giddaamah wa waraayah kulluhum chakaro Allah be hiss aali wa gaalo :
« Al‑hamdulillah !
﴾Mabruuk le l‑naadum
al‑jaayi be usum Allah !﴿*
10 Mamlakat jiddina Dawuud jaaye
wa l‑hamdulillah !
﴾Ahmudu Allah fi l‑aali !﴿
»*
11 Wa Isa dakhal fi Madiinat al‑Khudus wa dakhal fi beet Allah wa chaaf kulla cheyy al‑gaaʼid foogah.
Wa l‑wakit akhkhar wa achaan da,
hu marag min al‑madiina wa macha le hillit Beet Anya maʼa talaamiizah al‑atnaachar.
Al‑chadara al‑Isa laʼanha
12 Wa ambaakir,
Isa wa talaamiizah jaayiin min hillit Beet Anya wa Isa jiiʼaan.
13 Wa chaaf giddaamah chiyya baʼiid chadarat tiin malaane warchaal.
Wa macha leeha achaan yagtaʼ minha iyaal.
Laakin wakit lihigha ma ligi foogha tiin,
illa l‑warchaal bas,
achaan wakitha lissaaʼ ma tamma.
14 Wa Isa hajja le l‑chadara wa gaal :
« Abadan ma yaakulu minki battaan !
» Wa talaamiizah simʼo kalaamah.
Al‑Masiih tarad al‑tujjaar
15 Wa wassalo fi Madiinat al‑Khudus wa Isa dakhal fi beet Allah wa gamma yatrud kulla l‑naas al‑gaaʼidiin yisaawugu fi l‑fadaay.
Wa chaglab taraabiiz al‑naas al‑yibaddulu gurus wa banaabir al‑naas al‑yisaawugu hamaam.
16 Wa fi naas chaayliin khumaamhum al‑yidooru yuchuggu fadaayit beet Allah wa Isa daharaahum.
17 Wa Isa allam al‑naas wa gaal :
« Fi l‑Kitaab,
Allah gaal :
﴾Beeti yisammuuh beet al‑sala le kulla l‑chuʼuub.﴿*
﴾Wa laakin intu chiftuuh misil karkuur hana saraariig !﴿
»*
18 Wa kubaaraat rujaal al‑diin wa l‑ulama simʼo kalaamah wa bado yichchaawaro kikkeef yaktuluuh.
Wa humman khaafo minnah achaan kulla l‑naas gaaʼidiin yasmaʼo kalaamah wa taʼliimah ajabaahum marra waahid.
19 Wa fi l‑makhrib Isa wa talaamiizah marago min al‑madiina.
Chadarat al‑tiin yibsat
20 Wa ambaakir fajur,
humman maachiin fi l‑derib wa chaafo battaan chadarat tiin.
Wa hi mayte wa yibsat marra waahid lahaddi uruugha.
21 Wa Butrus fakkar fi l‑kalaam al‑Isa gaalah.
Wa hajja leyah wa gaal :
« Sayyidna,
chiif.
Al‑chadara al‑inta laʼantaha yibsat. »
22 Wa Isa radda leehum wa gaal :
« Aamunu be Allah iimaan gawi.
23 Nuguul leeku al‑hagg,
ayyi naadum al‑yaamur al‑jabal da wa yuguul leyah :
‹ Amrug min hini wa agaʼ fi l‑bahar › da bas yukuun,
kan hu ma chakkak fi galbah wa saddag be niiye waahide kadar al‑cheyy al‑hu gaalah da yukuun.
24 Achaan da,
nuguul leeku kulla cheyy al‑tasʼalooh min Allah,
saddugu kadar ligiituuh khalaas wa talgooh.
25 Wa ayyi wakit tidooru tisallu,
saamuhu ayyi naadum al‑khiti foogku achaan abuuku Allah yisaamih leeku khataayaaku.
26 Wa kan intu ma saamahtu al‑naas al‑khito foogku,
abuuku Allah ma yisaamih leeku khataayaaku. »
Al‑Masiih saʼalooh yaatu al‑antaah izin
27 Wa Isa wa talaamiizah wassalo battaan fi Madiinat al‑Khudus.
Wa wakit Isa raayikh fi fadaayit beet Allah,
kubaaraat rujaal al‑diin wa l‑ulama wa l‑chuyuukh jo leyah.
28 Wa saʼalooh wa gaalo :
« Taradt al‑tujjaar be izin yaatu ?
Wa yaatu antaak izin ? »
29 Wa Isa radda leehum wa gaal :
« Wa ana kula indi suʼaal nasʼalku.
Ruddu leyi wa ana kula nikhabbirku yaatu al‑antaani izin achaan nisawwi al‑khidme di.
30 Yahya khattas al‑naas be izin Allah walla be izin al‑naas ?
Ruddu leyi ! »
31 Wa achchaawaro ambeenaathum wa gaalo :
« Kan gulna Yahya indah izin min Allah,
Isa yuguul leena :
‹ Wa maala ma aamantu beyah ? ›
32 Laakin ma nagdaro nuguulu indah izin min al‑naas.
» Wa hajjo misil da achaan humman khaafo min al‑chaʼab wa ma dawwaro yizaʼʼuluuhum.
Achaan fi fikir kulla l‑chaʼab,
akiid Yahya nabi.
33 Wa humman raddo le Isa wa gaalo :
« Da ma naʼarfuuh.
» Wa Isa radda leehum wa gaal :
« Khalaas,
ana kula ma niʼooriiku yaatu al‑antaani izin achaan nisawwi al‑khidme di. »