Al‑naadum al‑indah chawaatiin
5
1 Wa khalaas gataʼo al‑bahar wa wassalo balad al‑Garaasiyiin.
2 Wa wakit Isa dalla min al‑markaba tawwaali naadum waahid muchootin ja laagaah.
Wa l‑naadum da,
ja leyah min al‑khubuur.
3 Wa hu saakin fi l‑khubuur wa ma fi naadum al‑yagdar yarbutah battaan.
Kan be jinziir kula ma yinrabit.
4 Daayman rabato iideenah wa rijileenah be guyuud min hadiid wa janzarooh.
Wa laakin al‑janaaziir hu gattaʼaahum wa l‑guyuud hu daayman kassaraahum.
Wa ma fi insaan al‑yagdar yisabbitah.
5 Leel wa nahaar hu gaaʼid yiʼiit fi ust al‑khubuur wa fi l‑jibaal wa yajrah nafsah be hujaar.
6 Wa min baʼiid hu chaaf Isa wa jara leyah wa sajad giddaamah.
7 Wa be hiss chadiid aat wa gaal :
« Ya Isa Ibn Allah al‑Aali.
Tidoor minni chunu ?
Nachhadak be usum Allah,
ma tiʼazzibni ! »
8 Wa gaal al‑kalaam da achaan awwal Isa gaal leyah :
« Ya cheetaan,
amrug minnah ! »
9 Wa khalaas Isa saʼalah wa gaal :
« Usmak yaatu ?
» Wa l‑muchootin radda leyah wa gaal :
« Ana usmi Deech achaan aniina chawaatiin katiiriin ».
10 Wa l‑chawaatiin chahado Isa be chidde achaan ma yatrudhum fi bakaan baʼiid.
11 Wa fi l‑bakaan da,
fi khanaaziir katiiriin gaaʼidiin yasraho fi taraf al‑hajar.
12 Wa l‑chawaatiin chahado Isa wa gaalo :
« Rassilna fi l‑khanaaziir dool wa khalliina nindasso fooghum ».
13 Wa Isa antaahum izin.
Wa khalaas al‑chawaatiin marago min al‑muchootin wa dakhalo fi l‑khanaaziir.
Wa adad al‑khanaaziir gariib 2 000.
Wa kulluhum jaro min taraf al‑hajar wa wagaʼo fi l‑bahar wa khalaas al‑almi akalaahum.
14 Wa ruʼyaan al‑khanaaziir arrado wa macho khabbaro kulla l‑naas al‑fi l‑hille wa fi l‑ziraaʼa.
Wa kulla l‑naas marago min al‑hille achaan yichiifu al‑cheyy al‑bigi.
15 Wa jo le Isa wa chaafo al‑muchootin aglah aafe.
Hu gaaʼid saakit wa laabis khulgaan.
Wa irfo da bas al‑naadum al‑awwal deech al‑chawaatiin gaaʼid foogah.
Wa khaafo marra waahid.
16 Wa l‑naas al‑chaafooh,
khabbaro al‑naas al‑aakhariin be l‑cheyy al‑bigi le l‑muchootin wa l‑khanaaziir.
17 Wa khalaas chahado Isa yamrug min baladhum.
18 Wa wakit Isa yidoor yarkab fi l‑markaba,
al‑naadum al‑awwal muchootin chahad Isa achaan yamchi maʼaayah.
19 Laakin Isa aba.
Wa gaal leyah :
« Gabbil beetak wa oori naasak be kulla cheyy al‑Allah sawwaah leek wa be kikkeef hu rahamaak ».
20 Wa khalaas al‑naadum da,
macha wa bada yiballikh le naas al‑Mudun al‑Achara wa ooraahum be kulla cheyy al‑Isa sawwaah leyah.
Wa kulla l‑naas alʼajjabo.
Bineeyit Jaayrus wa l‑mara
21 Wa Isa rikib fi l‑markaba battaan wa gataʼ al‑bahar be nussah al‑aakhar.
Wa naas katiiriin lammo foogah.
Wa hu gaaʼid fi khachum al‑bahar.
22 Wa fi l‑bakaan da,
naadum waahid ja leyah wa hu min masaaʼiil beet al‑sala wa usmah Jaayrus.
Wa wakit chaaf Isa,
hu sajad giddaamah.
23 Wa chahad Isa ziyaada wa gaal :
« Bineeyti sakhayre garrabat le l‑moot !
Taʼaal khutt iideenak foogha wa hi talga al‑aafe wa ma tumuut. »
24 Wa Isa gamma macha maʼaayah.
Wa naas katiiriin marra waahid maachiin maʼaayah wa gaaʼidiin yiʼassuruuh min kulli jiihe.
25 Wa fi mara waahide fi ust al‑naas.
Wa indaha 12 sana dammaha yidaffig.
26 Wa hi awwal machat le dakaatiir katiiriin wa tiʼibat katiir min ilaajhum.
Wa hi dafaʼat leehum kulla maalha wa laakin ma ligat al‑aafe.
Wa maradha zaad min awwal.
27 Wa hi simʼat be Isa.
Wa machat leyah fi ust al‑naas wa garrabat leyah min wara wa maddat iidha wa limsat khalagah.
28 Wa gaalat fi galibha :
« Kan nalmas khalagah bas,
nalga al‑aafe. »
29 Wa tawwaali dammaha wagaf.
Wa hi irfat fi nafisha kadar ligat al‑aafe.
30 Wa tawwaali Isa irif fi nafsah kadar gudra maragat minnah.
Wa allaffat fi ust al‑naas al‑katiiriin al‑maachiin maʼaayah wa saʼalaahum wa gaal :
« Yaatu al‑limis khalagi ? »
31 Wa talaamiizah gaalo :
« Sayyidna,
fi naas katiiriin muhawwigiinak wa gaaʼidiin yiʼassuruuk.
Maala tasʼalna yaatu al‑limisaak ? »
32 Wa Isa gaaʼid yillaffat achaan yichiif al‑naadum al‑limisah.
33 Wa l‑mara irfat al‑cheyy al‑bigi foogha wa gaaʼide tarjif min al‑khoof.
Wa jaat le Isa wa sajadat giddaamah wa ooratah be kulla cheyy al‑bigi leeha.
34 Wa Isa hajja leeha wa gaal :
« Ya bineeyti,
iimaanki beyi najjaaki.
Amchi be l‑salaam wa alge al‑aafe al‑kaamile ».
35 Wa wakit Isa gaaʼid yihajji leeha,
fi naas waahidiin jo min beet al‑masʼuul al‑bineeytah mardaane wa gaalo :
« Bineeytak maatat khalaas.
Khalli al‑muʼallim yinjamma ».
36 Wa laakin Isa aba ma yasmaʼ kalaamhum wa hajja le l‑masʼuul wa gaal :
« Ma takhaaf.
Aamin beyi bas ».
37 Wa hu ma khalla ayyi naadum yamchi maʼaayah illa Butrus wa Yaakhuub wa Yuuhanna akhu Yaakhuub.
38 Wa wassalo fi beet al‑masʼuul wa Isa chaaf al‑naas gaaʼidiin yisawwu haraka katiire.
Wa humman gaaʼidiin yabku be hiss aali haznaaniin le l‑bineeye al‑maatat.
39 Wa hu dakhal fi l‑beet wa hajja leehum wa gaal :
« Maala tabku be hiss aali misil da ?
Al‑bineeye ma maatat.
Hi naayme bas ».
40 Wa dihko leyah be chamaate wa hu maragaahum kulluhum min al‑beet.
Wa chaal maʼaayah abu al‑bineeye wa ammaha wa l‑naas al‑maʼaayah wa dakhalo fi lubb al‑beet fi l‑bakaan al‑bineeye raagde foogah.
41 Wa karab iidha wa hajja leeha be l‑lukhkha al‑araamiiye wa gaal :
« Talisa kuumi » wa maʼanaatah :
« Ya bitti,
gummi. »
42 Wa tawwaali al‑bineeye gammat wa raakhat.
Wa hi umurha 12 sana.
Wa kulla l‑naas alʼajjabo marra waahid.
43 Wa Isa antaahum amur achaan ma yikallumu le naas be l‑cheyy al‑bigi.
Wa gaal leehum :
« Antuuha akil ».