Al‑Masiih sallamooh le Bilaatus
27
1 Wa wakit al‑wata asbahat kubaaraat rujaal al‑diin wa l‑chuyuukh lammo battaan wa achchaawaro fi Isa le yahkumu leyah be l‑moot.
2 Wa rabatooh wa saagooh wa sallamooh le Bilaatus al‑waali al‑Roomaani.
Moot Yahuuza
3 Wa wakit Yahuuza al‑khaan Isa irif hakamo Isa khalaas,
nidim fi l‑cheyy al‑sawwaah.
Wa macha gabbal al‑talaatiin hajar fudda le kubaaraat rujaal al‑diin wa l‑chuyuukh.
4 Wa gaal :
« Ana khaati achaan ana sallamt leeku naadum bari wa gariib yaktuluuh.
» Wa raddo leyah wa gaalo :
« Aniina ma lammaana,
inta bas sawweetah. »
5 Wa Yahuuza rama al‑fudda fi beet Allah wa marag wa macha chanag nafsah.
6 Wa kubaaraat rujaal al‑diin laggato al‑fudda wa gaalo :
« Al‑gurus da nijis achaan da ujra hana katil naadum.
Ma halaal leena nidissuuh fi sanduug beet Allah. »
7 Wa baʼad achchaawaro,
chaalo al‑fudda wa charo beeha zereʼ min haddaadi waahid achaan yabga bakaan yadfunu foogah al‑ajaanib.
8 Achaan da,
usum al‑zereʼ yinaaduuh Zereʼ al‑Damm lahaddi l‑yoom.
9 Wa be misil da,
al‑kalaam al‑Allah gaalah be khachum al‑nabi Irmiya tamma.
Hu gaal :
﴾Chaalo talaatiin hajar fudda.
Da bas tamanah al‑Bani Israaʼiil astafago foogah.
10 Wa be l‑gurus da,
charo al‑zereʼ hana l‑haddaadi
misil Allah amaraani beyah.﴿*
Al‑Masiih giddaam Bilaatus
11 Wa Isa wagaf giddaam al‑waali Bilaatus wa l‑waali saʼalah wa gaal :
« Inta malik al‑Yahuud walla ?
» Wa Isa radda leyah wa gaal :
« Misil inta gultah. »
12 Wa kubaaraat rujaal al‑diin wa l‑chuyuukh khatto tuham fi Isa laakin Isa gaʼad saakit wa ma radda leehum.
13 Wa Bilaatus saʼalah wa gaal :
« Inta ma simiʼt al‑kalaam al‑yuguuluuh foogak walla ? »
14 Laakin Isa ma radda le l‑waali kilme waahide kula wa l‑waali alʼajjab bilheen.
15 Wa fi ayyi iid al‑Fisha,
al‑waali fi aadtah yamrug min al‑sijin masjuun waahid al‑naas yidooruuh.
16 Wa fi l‑wakit da,
masjuun waahid maʼruuf gaaʼid fi l‑sijin wa usmah Baraabaas.
17 Wa wakit al‑naas lammo,
Bilaatus saʼalaahum wa gaal :
« Tidooru natlig leeku yaatu ?
Natlig Baraabaas walla Isa al‑yuguulu leyah al‑Masiih ? »
18 Wa Bilaatus gaal al‑kalaam da achaan hu irif al‑kubaaraat sallamo leyah Isa be sabab husudhum.
19 Wa wakit hu gaaʼid fi kursi al‑hukum,
martah rassalat leyah kalaam wa gaalat :
« Angariʼ,
ma tisawwi cheyy fasil le l‑naadum al‑bari da.
Achaan al‑yoom ana hilimt beyah wa tiʼibt bilheen fi chaanah. »
20 Wa laakin kubaaraat rujaal al‑diin wa l‑chuyuukh harracho al‑naas al‑lammo achaan yasʼalo Bilaatus yamrug Baraabaas wa yaktul Isa.
21 Wa Bilaatus saʼalaahum wa gaal :
« Tidooru yaatu min al‑itneen dool namurgah leeku ?
» Wa raddo leyah wa gaalo :
« Atlig leena Baraabaas ! »
22 Wa battaan saʼalaahum wa gaal :
« Wa Isa al‑yuguulu leyah al‑Masiih nisawwi leyah chunu ?
» Wa kulluhum raddo leyah wa gaalo :
« Aktulah fi l‑saliib ! »
23 Wa l‑waali saʼalaahum wa gaal :
« Maala ?
Chunu al‑fasil al‑sawwaah ?
» Wa aato be ziyaada wa gaalo :
« Aktuluuh fi l‑saliib ! »
24 Wa wakit Bilaatus chaaf kalaamah ma indah faayde wa l‑naas yidooru yisawwu fitne,
hu chaal almi wa khassal iideenah giddaamhum wa gaal :
« Ana bari min dimmit al‑naadum al‑saalih da.
Da fi raasku intu. »
25 Wa l‑naas kulluhum raddo leyah wa gaalo :
« Khalli dimmitah tagaʼ fi raasna wa fi raas iyaalna ! »
26 Wa Bilaatus marag leehum Baraabaas wa Isa jaladooh.
Wa khalaas sallamah le l‑askar achaan yaktuluuh fi l‑saliib.
Al‑askar achchammato le l‑Masiih
27 Wa askar al‑waali saago Isa wa waddooh fi gasir al‑waali wa lammo foogah kulla l‑askar.
28 Wa sallo khulgaanah wa labbasooh khalag ahmar tchu misil khalag al‑malik.
29 Wa sawwo leyah taaj hana chook madfuur wa khattooh fi raasah.
Wa massakooh asa fi iidah al‑zeene wa rakaʼo giddaamah wa achchammato leyah wa gaalo :
« Al‑salaam aleek,
ya malik al‑Yahuud ! »
30 Wa gaaʼidiin yibazzukhu foogah wa yudugguuh fi raasah be l‑asa al‑chaalooh minnah.
31 Wa wakit kammalo chamaatithum,
chaalo minnah al‑khalag wa labbasooh khulgaanah wa gammo yusuuguuh ale l‑bakaan al‑yaslubuuh foogah.
Al‑Masiih salabooh
32 Wa wakit al‑askar maachiin,
ligo raajil waahid min hillit al‑Khayrawaan,
usmah Simʼaan.
Wa assarooh le yichiil al‑saliib al‑yidooru yaktulu foogah Isa.
33 Wa lihgo al‑bakaan al‑usmah Juljusa,
maʼanaatah bakaan al‑jumjuma.
34 Wa gaddamo le Isa charaab hana khamar mukhalbat be maraara achaan yibarrid leyah al‑wajaʼ wa laakin wakit hu daakhah,
abaah ma chiribah.
35 Wa baʼad al‑askar taggooh fi l‑saliib wa rafaʼooh foog,
humman gassamo khulgaanah be amʼiyeedaat.
36 Wa gaʼado tihit achaan yaharsuuh.
37 Wa khatto maktuub al‑tuhma min foog le raasah wa katabo foogah :
« Da Isa,
malik al‑Yahuud. »
38 Wa fi nafs al‑wakit,
salabo mujrimiin itneen.
Al‑waahid taggooh fi saliib jamb Isa be nussah al‑zeenaay wa l‑taani fi saliib aakhar be nussah al‑israay.
Al‑Masiih fi l‑saliib
39 Wa l‑naas al‑maachiin fi l‑derib da gaaʼidiin yiʼayyuruuh wa yihizzu ruuseehum
40 wa yuguulu :
« Haay !
Inta al‑gult tikassir beet Allah wa tabniih battaan fi talaata yoom,
najji nafsak !
Wa kan inta Ibn Allah,
dalli tihit min al‑saliib ! »
41 Wa kubaaraat rujaal al‑diin wa l‑ulama wa l‑chuyuukh achchammato leyah wa gaalo :
42 « Hu najja naas aakhariin wa laakin ma yagdar yinajji nafsah !
Hu ma malik Israaʼiil walla ?
Khalli yidalli hassaʼ min al‑saliib wa khalaas niʼaamunu beyah !
43 Hu atwakkal ale Allah.
Khalli Allah yafzaʼah,
kan sahiih Allah yidoorah !
Achaan hu gaal :
‹ Ana Ibn Allah.
› »
44 Wa l‑mujrimiin al‑salaboohum maʼaayah kula achchammato leyah be kalaam misil da.
Moot al‑Masiih
45 Wa min nuss al‑nahaar lahaddi l‑asur,
al‑wata bigat dalma fi kulla l‑balad.
46 Wa gariib al‑saaʼa talaata,
Isa aat be hiss aali be kalaam ibraani wa gaal :
« Iili Iili lama chabagtani » wa maʼanaatah ﴾Ilaahi,
Ilaahi maala khalleetni ?﴿*
47 Wa waahidiin min al‑naas al‑waagfiin hinaak simʼo kalaamah wa gaalo :
« Hu gaaʼid yinaadi al‑nabi Iliyaas ! »
48 Wa tawwaali waahid minhum jara wa chaal gitʼe wa ballaaha fi charaab haamud wa chaʼagha fi raas ageegaay wa gaddamah le Isa achaan yachrab minnah.
49 Wa laakin al‑aakhariin gaalo :
« Agiif,
khalliih !
Narjo nichiifu kan Iliyaas yaji achaan yinajjiih. »
50 Wa Isa sarakh battaan be hiss chadiid wa anta al‑ruuh.
51 Wa tawwaali al‑sitaar al‑fi beet Allah anchagga min foog lahaddi tihit wa l‑ard anhazzat wa l‑hujaar achchaggago.
52 Wa l‑khubuur anfataho wa min al‑saalihiin al‑maytiin,
katiiriin baʼaso.
53 Wa baʼad Isa baʼas,
humman marago min khubuurhum wa macho fi Madiinat al‑Khudus wa naas katiiriin chaafoohum.
54 Wa l‑askar al‑gaaʼidiin yaharsu Isa maʼa kabiirhum chaafo al‑ard anhazzat wa kulla cheyy al‑bigi wa khaafo bilheen wa gaalo :
« Be l‑sahiih,
al‑naadum da Ibn Allah ! »
55 Wa fiyah awiin katiiraat gaaʼidaat yichiifan min baʼiid.
Hinna deel awwal taabaʼan Isa min daar al‑Jaliil achaan yakhdiman leyah.
56 Mariyam al‑Magdaliiye wa Mariyam amm Yaakhuub wa Yuusuf wa amm awlaad Zabadi kula maʼaahin.
Janaazit al‑Masiih fi l‑karkuur
57 Wakit bigi achiiye,
raajil waahid ja wa hu siid al‑maal min hillit al‑Raama wa usmah Yuusuf.
Wa hu kula tilmiiz Isa.
58 Wa macha le Bilaatus wa saʼalah janaazit Isa wa Bilaatus oora askarah yantuuha leyah.
59 Wa Yuusuf chaal al‑janaaza wa kaffanaaha be kafan khaali.
60 Wa Yuusuf indah khabur jadiid al‑dahaabah nakatooh misil karkuur fi l‑hajar.
Wa foogah khatta janaazit Isa.
Wa dardag hajar kabiir wa sadda beyah khachum al‑khabur.
Wa khalaas faat.
61 Wa Mariyam al‑Magdaliiye wa Mariyam al‑aakhara gaaʼidaat fi l‑bakaan da mugaabilaat al‑khabur.
Al‑khabur harasooh
62 Al‑yoom al‑yijahhuzu foogah le yoom al‑sabt kammal wa khalaas ja yoom al‑sabt.
Wa kubaaraat rujaal al‑diin wa l‑Fariiziyiin lammo wa macho sawa le Bilaatus
63 wa gaalo :
« Ya sayyidna,
fakkarna fi l‑kalaam al‑gaalah al‑khachchaach da gubbaal ma yumuut.
Hu gaal :
‹ Fi talaata yoom nabʼas. ›
64 Wa khalaas,
rassil askarak yaharsu al‑khabur adiil lahaddi l‑yoom al‑taalit achaan talaamiizah ma yasurgu janaaztah wa ma yuguulu le l‑naas hu baʼas min ust al‑maytiin.
Kan sawwo misil da,
al‑kidib al‑taani yabga gaasi min al‑kidib al‑awwal. »