3
1 Wa Allah al‑Gaadir gaal :
« Daahu nirassil rasuuli wa hu yiʼaddil al‑derib giddaami.
Wa tawwaali,
al‑Rabb al‑intu gaaʼidiin tifattuchu be acham yadkhul fi beetah al‑mukhaddas.
Daahu jaayi rasuul al‑muʼaahada al‑gaaʼidiin tarjooh. »
2 Yaatu yagdar yahmal yoom jaytah ?
Wa yaatu yagdar yagiif be tuulah wakit yibiin ?
Achaan hu misil naar
al‑tagtaʼ al‑hadiid le yisaffuuh
wa hu misil al‑saabuun
al‑yikhassil nadiif.
3 Hu misil al‑sayyaakhi
al‑yagtaʼ wa yisaffi al‑fudda.
Yitahhir al‑Laawiyiin
misil yisaffi al‑fudda wa l‑dahab.
Wa humman yabgo hineey Allah
wa yigaddumu leyah dahaaya be l‑adaala.
4 Wa khalaas,
Allah yarda be dahaaya
hana naas balad Yahuuza
wa sukkaan Madiinat al‑Khudus
misil fi l‑ayyaam al‑faato
wa l‑siniin al‑zamaan.
5 « Wa ana nigarrib leeku le l‑chariiʼa.
Wa tawwaali,
nachhad fi l‑sahhaariin wa l‑zannaayiin wa l‑yahalfu be kidib wa l‑yazulmu al‑khaddaam wa l‑armala wa l‑atiim wa l‑yakhto fi l‑ajnabi.
Wa humman dool kulluhum ma yakhaafo minni.
» Wa da,
Allah al‑Gaadir bas gaalah.
Gabbulu le Allah
6 « Ana Allah ma nikhayyir.
Wa be da,
intu kula ya zurriiyit Yaakhuub,
ma tikammulu.
7 Min wakit abbahaatku,
intu baʼʼadtu min churuuti wa ma tabbagtuuhum.
Gabbulu leyi wa ana kula nigabbil leeku.
» Wa da,
Allah al‑Gaadir bas gaalah.
Wa intu gultu :
« Kikkeef nigabbulu leek ? »
8 Wa Allah gaal :
« Hal insaani yagdar yukhuchch al‑Rabb walla ?
Wa laakin intu khachcheetuuni wa gultu :
‹ Kikkeef aniina khachcheenaak ? ›
« Wa da achaan ma kaffeetu al‑uchuur wa l‑zaka.
9 Wa be da,
intu gaaʼidiin tihit al‑laʼana achaan khachcheetuuni ana,
intu kulla l‑umma.
10 Wa jiibu al‑uchuur tamaamiin fi makhazan beeti achaan akil katiir yinlagi fi l‑beet da.
Wa be da,
jarrubuuni wa chiifu kikkeef naftah leeku biibaan al‑sama wa ninazzil leeku al‑baraka al‑ma indaha hadd.
» Wa da,
Allah al‑Gaadir bas gaalah.
11 « Wa fi chaanku,
ana nidammir al‑hacharaat wa abadan ma yaakulu intaaj arduku wa jineenaat inabku kula yantu intaajhum.
Wa da,
Allah al‑Gaadir bas gaalah.
12 Wa kulla l‑umam yinaaduuku al‑mubaarakiin achaan intu taskunu fi balad al‑farah.
» Wa da,
Allah al‑Gaadir bas gaalah.
Yoom Allah yiwassif adaaltah
13 Wa Allah gaal :
« Kalaamku diddi bigi chadiid. »
Wa laakin intu gultu :
« Chunu al‑kalaam al‑gulna diddak ? »
14 Wa intu gultu battaan :
« Ibaadat al‑Rabb ma indaha faayde.
Chunu naksabooh kan nitabbugu wasiiyaatah wa nuruukhu be hizin giddaam Allah al‑Gaadir ?
15 Wa hassaʼ,
aniina ninaadu al‑mustakbiriin bas al‑mubaarakiin.
Aywa,
al‑yisawwu al‑fasaala yanjaho.
Humman jarrabo al‑Rabb wa be da kula,
cheyy ma ja leehum. »
16 Wa fi l‑wakit da,
al‑naas al‑yakhaafo min Allah hajjo ambeenaathum.
Wa Allah simiʼ kalaamhum adiil.
Wa giddaamah,
katabo fi kitaab al‑zikra asaame hana l‑naas al‑yakhaafo min Allah wa yikarrumu usmah.