Allah yamla beetah be majd
2
1 Wa fi yoom 21 hana l‑chahar al‑saabiʼ,
Allah hajja be waasitat al‑nabi Haggaay wa gaal :
2 « Hajji le Zarubaabil wileed Chaltiyiil haakim balad Yahuuza wa le Yachuuʼ wileed Yuusaadikh kabiir rujaal al‑diin wa le l‑faddalo min al‑chaʼab wa guul :
3 ‹ Yaatu minku intu al‑gaaʼidiin hayyiin al‑yoom chaaf majd al‑beet da zamaan ?
Wa keef chiftuuh al‑yoom ?
Sahiih al‑beet da ma yaʼajibku ! ›
4 Wa hassaʼ,
daahu kalaam Allah :
‹ Ya Zarubaabil wa ya Yachuuʼ wileed Yuusaadikh kabiir rujaal al‑diin wa ya kulla chaʼab al‑balad,
chiddu heelku.
Wa da kalaam Allah.
Gummu le l‑khidme achaan ana maʼaaku !
Wa da kalaam Allah al‑Gaadir.
5 Wa hasab al‑waʼad al‑waaʼadtuku beyah wakit maragtu min balad Masir,
ruuhi gaaʼide fi usutku.
Ma takhaafo min cheyy !
› »
6 Wa daahu Allah al‑Gaadir gaal :
« Battaan wakit chiyya,
ana nirajjif al‑sama wa l‑ard
wa l‑buhuur wa kulla l‑dunya.
7 Ana nirajjif kulla l‑umam
wa l‑khuna hana kulla l‑umam
taji fi l‑bakaan da
wa ana namla kulla l‑beet da
be l‑majd.
Wa da,
Allah al‑Gaadir bas gaalah.
8 Achaan kulla l‑fudda hinti
wa l‑dahab kula hanaayi ana.
Wa da kalaam Allah al‑Gaadir.
9 Al‑majd hana l‑beet da yabga ziyaada
wa yufuut al‑majd hana l‑beet al‑awwal.
Wa da,
Allah al‑Gaadir bas gaalah.
Wa fi l‑bakaan da bas,
ana nisabbit al‑salaam. »
Wa da kalaam Allah al‑Gaadir.
Al‑chaʼab annajjaso
10 Wa fi yoom 24 hana l‑chahar al‑taasiʼ fi l‑sana al‑taaniye hana hukum Daariyuus,
Allah hajja le l‑nabi Haggaay.
11 Wa daahu Allah al‑Gaadir gaal :
« Asʼal rujaal al‑diin chunu fikirhum fi l‑gaanuun da.
12 Kan naadum chaayil laham mukhaddas fi chaarib khalagah wa allammas be chaarib khalagah da laham aw churba aw khamar aw dihin aw ayyi akil aakhar,
hal al‑akil da yilkhaddas walla ?
» Wa rujaal al‑diin gaalo :
« La.
Ma yilkhaddas. »
13 Wa Haggaay gaal battaan :
« Akuun naadum annajjas be sabab janaaza.
Kan al‑naadum da allammas al‑achya dool,
humman yinnajjaso walla ?
» Wa rujaal al‑diin gaalo :
« Aywa,
yinnajjaso. »
14 Wa Haggaay radda leehum wa gaal :
« Daahu kalaam Allah :
‹ Al‑chaʼab da wa l‑umma di,
kulluhum misil da giddaami ana.
Wa kulla khidmit iideehum wa ayyi cheyy al‑yigaddumuuh leyi kula nijis.
15 Hassaʼ da,
fakkuru adiil min al‑yoom le giddaam.
Gabul ma khatteetu hajar foog hajar le tabnu beet Allah,
16 haalitku kikkeef ?
Wakit macho yikiilu 20 kooro hana khalla min al‑dabanga,
ligo 10 bas.
Wa wakit macho yikiilu 50 liitir hana khamar min al‑assaara,
ligo 20 bas.
17 Wa ana darabt ziraaʼitku be l‑jafaaf wa l‑barad wa l‑nada al‑yisoofinha.
Wa be da kula,
intu ma gabbaltu leyi.
Wa da kalaam Allah.
18 Fakkuru adiil min al‑yoom le giddaam.
Al‑yoom da yoom 24 hana l‑chahar al‑taasiʼ,
al‑yoom al‑khatto foogah asaas beet Allah.
Fakkuruuh adiil.
19 Awwal ma faddal cheyy fi l‑dabanga wa chadar al‑inab wa l‑tiin wa l‑rummaan wa l‑zaytuun kula ma jaabo cheyy.
Wa laakin min al‑yoom da,
nibaarikku.
› »
Allah waaʼad Zarubaabil
20 Wa fi nafs al‑yoom,
Allah hajja battaan le Haggaay wa gaal :
21 « Guul le Zarubaabil haakim balad Yahuuza :
‹ Ana nirajjif al‑sama wa l‑ard.
22 Wa narmi karaasi al‑mamaalik wa nidammir khuwwaat mamaalik al‑umam.
Wa narmi arabaathum hana l‑harib wa l‑raakbiin fooghum.
Wa l‑kheel wa l‑raakbiin fooghum,
narmiihum tihit.
Ayyi waahid yumuut be seef akhuuh.
23 Wa da kalaam Allah al‑Gaadir.
Wa fi l‑yoom da,
ya abdi Zarubaabil wileed Chaltiyiil,
ana nichiilak wa nukhuttak misil khitim fi iidi achaan inta bas ana azaltak.
› » Wa da kalaam Allah al‑Gaadir.