Madiinat Niinawa tagaʼ
2
1 Ya sukkaan Niinawa,
fi muhaajimiin jaayiin leeku !
Aharsu bakaanku al‑gawi
wa raakhubu fi l‑duruub.
Arbutu sulubku
wa abgo gawiyiin le l‑harib.
2 Hatta kan al‑mukharribiin kharrabo zurriiyit Yaakhuub
wa dammaro chadarhum kula,
Allah yigabbil leehum charafhum
misil yigabbil charaf Bani Israaʼiil.
3 Wa darag furraasah al‑adu
mamsuuh be buhya hamra
wa askarah laabsiin khulgaan humur.
Wa wakit jaahiziin le l‑harib,
arabaatah yamurgu charaar
wa l‑huraab yinhazzo.
4 Wa arabaat al‑harib yajru fi l‑chawaariʼ be chidde
wa jaariyiin fi ust al‑madiina
misil deyy al‑barraaga al‑tachlaʼ.
5 Wa malik Niinawa naada khuyyaadah
wa laakin humman yittartaʼo fi machiihum.
Yajru le l‑durdur
wa yijahhuzu nufuushum le yahmuuh.
Sukkaan Niinawa yiʼarrudu
6 Tawwaali,
al‑sadd al‑laazmiin beyah almi al‑bahar ankasar
wa gasir al‑malik wagaʼ.
7 Wa l‑malika sallabooha wa chaalooha
wa khaddaamaatha kaarbaat duyuudhin
wa yunuuhan hissihin misil al‑hamaam.
8 Wa Niinawa bigat
misil khazzaan almi al‑yinaggit
wa sukkaanha arrado
misil almi al‑jaari.
Wakit yuguulu leehum :
« Agiifu !
Agiifu » kula,
ma fi naadum minhum yinlafit.
9 Anhabo al‑fudda
wa anhabo al‑dahab !
Khuna al‑madiina abadan ma yikammil
wa khumaamha al‑khaali kula katiir.
10 Niinawa bigat nagaʼa faadiye
wa kharaab.
Wa naasha guluubhum angataʼo
wa rijleehum barado.
Wa butuunhum kula yarjufu
wa wujuuhhum bigo dulum.
Furraas Niinawa taradoohum
11 Wa ween marbat al‑diidaan
wa margad iyaalhum ?
Kan al‑duud wa martah marago kula,
naadum ma yibachtin iyaalhum.
12 Al‑duud yagnus le iyaalah
wa yakhnig le martah.
Wa yamla marbatah be l‑seed al‑hu katalah
wa be l‑rimam al‑hu charrataahum.
13 Wa daahu kalaam Allah al‑Gaadir :
« Akiid nugumm diddiki,
ya madiinat Niinawa.
Aywa,
arabaatki hana l‑harib,
nisawwiihum rumaad.
Wa furraaski al‑misil al‑diidaan,
al‑seef yaktulhum.
Wa ana niwaggif ganiiski fi l‑balad
wa hiss rusulki battaan ma yinsamiʼ. »