Al‑nuwaah le Bani Israaʼiil
5
1 Ya Bani Israaʼiil,
asmaʼo al‑kalaam al‑ana nabki wa nunuuh beyah.
2 « Bani Israaʼiil al‑misil bineeye udriiye,
hi wagaʼat ma tagdar tugumm abadan.
Hi anbatahat fi ardaha
wa yaatu al‑yarfaʼha ? »
3 Wa daahu Allah al‑Rabb gaal :
« Bani Israaʼiil yamurgu min al‑madiina le l‑harib
wa laakin yakhsaro.
Kan marago alif,
yigabbulu miya bas
wa kan marago miya,
yigabbulu achara bas ! »
Sawwu al‑kheer le tahyo
4 Wa daahu Allah gaal le Bani Israaʼiil :
« Fattuchuuni
wa talgo al‑haya.
5 Wa laakin ma tifattuchuuni fi Beet Iil
wa la tamchu fi Gilgaal
wa la tiwajjuhu ale Biir Sabʼa.
Achaan naas Gilgaal,
yiwadduuhum fi l‑khurba
wa Beet Iil tabga kharaab. »
6 Fattuchu Allah
wa talgo al‑haya.
Wa kan abeetu kamaan,
tiddammaro misil akalatku naar,
ya zurriiyit Yuusuf.
Al‑naar taakul Beet Iil
wa ma fi al‑yagdar yaktulha.
7 Wa l‑hagg,
sawweetuuh murr misil al‑hamdal
wa l‑adaala,
zagaltuuha fi l‑turaab.
Allah khalag al‑samaawaat wa l‑ard
8 Wa Allah bas al‑khalag
nujuum al‑Tureyya
wa l‑Sabi al‑Makhmi.
Wa hu bas al‑sawwa al‑dalaam fajur
wa l‑nahaar leel.
Wa hu yitalliʼ almi al‑buhuur
wa yazgi beyah al‑ard
wa hu bas usmah Allah.
9 Hu yidammir al‑muluuk
wa yakhrib mudunhum al‑gawiyiin.
10 Intu tabkhudu al‑chaahid
al‑yuguul al‑sahiih fi l‑chariiʼa
wa tajʼal al‑naadum al‑yuguul al‑sahiih
misil muharram.
11 Intu titaʼʼubu al‑daʼiif
wa be gu,
tichiilu gamhah.
Wa achaan da,
al‑buyuut al‑samhiin
hana l‑hajar al‑baneetuuhum
abadan ma taskunu fooghum.
Wa chadar al‑inab al‑zaraʼtuuh
abadan ma tacharbo min khamarah.
12 Ana aalim be kulla khataayaaku
wa zunuubku al‑katiiriin.
Tazulmu al‑saalih wa tichiilu al‑rachwa
wa tadharo al‑fagri min haggah fi l‑chariiʼa.
13 Wa fi l‑wakit da,
al‑aagil yaskut
achaan da wakt al‑diige.
14 Ma tisawwu al‑charr.
Sawwu al‑kheer le tahyo.
Wa be da,
Allah al‑Ilaah al‑Gaadir
yukuun maʼaaku misil intu gultuuh.
15 Akraho al‑charr wa hibbu al‑kheer
wa ansuru al‑hagg fi l‑chariiʼa.
Wa be da,
akuun Allah al‑Ilaah al‑Gaadir
yihinn fi l‑faddalo min zurriiyit Yuusuf.
16 Wa fi chaan da,
daahu Allah al‑Ilaah hu al‑Rabb al‑Gaadir gaal :
« Fi kulla bakaan,
al‑naas yunuuhu
wa fi kulla l‑chawaariʼ,
yabku wa yuguulu :
‹ Ya khasaaritna,
ya khasaaritna ! ›
Wa yinaadu al‑masaakiin le l‑hizin
wa l‑nawwaahiin le yunuuhu.
17 Wa l‑nuwaah yabga fi kulla jineenaat al‑inab
wakit nuchugg fi usutku wa niʼaakhibku. »
Wa da,
Allah bas gaalah.
Al‑azaab fi yoom Allah
18 Al‑azaab le l‑naas
al‑yitmanno jayyit yoom Allah.
Yoom Allah da indah leeku chunu ?
Fi l‑yoom da,
ma talgo nuur illa l‑dalaam.
19 Da misil naadum muʼarrid min duud
wa wagaʼ fi maraafʼiin.
Wa wakit dakhal beetah,
arrakkaz be iidah fi l‑durdur
wa addaah daabi.
20 Wa yoom Allah da yoom dalaam
wa dalaamah chadiid
ma indah nuur.
Wa akiid da yoom azrag kurum,
ma indah ayyi deyy.
Allah kirih ibaadithum
21 « Ana Allah nakrah wa naaba kulli iid
al‑tiʼayyuduuh leyi.
Wa ma narda beyah
kan tilimmu wa tiʼayyuduuh.
22 Hatta kan gaddamtu leyi dahaaya muharragiin
wa hadaaya hana dagiig kula,
ma nakhbalhum.
Wa kan gaddamtu leyi dahaaya salaama
min ajjaalku al‑sumaan kula,
ma najʼalhum.
23 Baʼʼudu minni harakat khineeku hana l‑chukur
wa ma nidoor nasmaʼ daribiin jigindiiyitku.
24 Wa laakin khalli al‑hagg yisiil
misil al‑seel
wa l‑adaala tajri
misil al‑waadi al‑ma yagiif.
25 Ya Bani Israaʼiil,
fi muddit 40 sana fi l‑sahara,
gaddamtu dahaaya wa hadaaya leyi ana walla ?
26 Wa hassaʼ,
chiltu sanamku Sukkuut al‑gultu malikku
wa ilaahku najmat Kiyuun
al‑intu sanaʼtuuhum le nufuusku.
27 Wa be sabab da,
niwaddiiku fi l‑khurba
khaadi le madiinat Dimachkh. »
Wa da,
Allah bas gaalah wa usmah Allah al‑Ilaah al‑Gaadir.