Kharaar Allah didd balad Muwaab
2
1 Wa daahu Allah gaal :
« Be sabab naas balad Muwaab
iso talaata wa arbaʼa marraat,
ana abadan ma nikhalli
al‑kharaar al‑chiltah didduhum.
Achaan harrago udaam malik Adoom
lahaddi bigo rumaad.
2 Wa fi chaan da,
ana ninazzil naar
fi balad Muwaab
al‑taakul kulla gusuur madiinat Kharyuut.
Wa kulla naas balad Muwaab yumuutu
fi ust al‑haraka
wa korooraak al‑harib
wa hiss al‑buug.
3 Wa ana nuguchch malik Muwaab min usuthum
wa kulla kubaaraatah naktulhum maʼaayah. »
Wa da,
Allah bas gaalah.
Kharaar Allah didd Bani Yahuuza
4 Wa daahu Allah gaal :
« Be sabab Bani Yahuuza
iso talaata wa arbaʼa marraat,
ana abadan ma nikhalli
al‑kharaar al‑chiltah didduhum.
Achaan abo churuut al‑Tawraat
wa ma yahfado gawaaniini.
Wa taabaʼo al‑kidib wa waddaro
wa da l‑kidib al‑abbahaathum taabaʼooh.
5 Wa fi chaan da,
ana ninazzil naar
fi balad Yahuuza
al‑taakul kulla gusuur Madiinat al‑Khudus. »
Kharaar Allah didd Bani Israaʼiil
6 Wa daahu Allah gaal :
« Be sabab Bani Israaʼiil
iso talaata wa arbaʼa marraat,
ana abadan ma nikhalli
al‑kharaar al‑chiltah didduhum.
Achaan baaʼo al‑saalih be sileeyaat
wa l‑fagraan be niʼeelaat.
7 Wa yidissu ruuse al‑daʼiifiin fi l‑turaab
wa yazulmu al‑masaakiin fi l‑chariiʼa.
Al‑walad wa abuuh yamchu le mara waahide
wa be da,
ma yihtarumu usmi al‑mukhaddas.
8 Wa yarugdu jamb ayyi madbah
fi l‑khulgaan al‑dammanoohum leehum.
Wa l‑khamar al‑chaalooh fi l‑hukum,
yacharbooh fi beeti ana Ilaahhum.
9 Wa ana bas al‑zamaan dammart al‑Amuuriyiin
fi chaan Bani Israaʼiil.
Wa l‑Amuuriyiin dool
tuwaal misil chadar al‑arz
wa chudaad misil chadar al‑balluut.
Wa ana dammartuhum misil al‑chadar
min furuuʼah lahaddi uruugah.
10 « Wa ana bas al‑zamaan maragtuku min balad Masir
wa gudtuku muddit 40 sana fi l‑sahara
le taglaʼo balad al‑Amuuriyiin.
11 Wa ana azalt waahidiin min iyaalku
le yabgo anbiya
wa waahidiin min subyaanku
le yikhassusuuhum leyi be nazir.
Wa da sahiih walla kidib,
ya Bani Israaʼiil ?
Wa da kalaam Allah.
12 Wa laakin charrabtu al‑khamar
le l‑mukhassasiin be l‑nazir
wa gultu le l‑anbiya :
‹ Ma titnabbaʼo ! ›
13 Wa be da,
ana narhakku
misil rahiik al‑kaarro
al‑chaayil maʼaach tagiil.
14 Wa be da,
al‑jarraay rijlah ma tinajjiih
wa l‑gaadir gudurtah ma tanfaʼah
wa l‑fahal kula ma yinajji nafsah.
15 Wa siid al‑nubbaal ma yagdar yasbit
wa l‑ajiil ma yasbug
wa siid al‑juwaad kula ma yinajji nafsah.
16 Wa fi l‑yoom da,
al‑fahal min al‑rujaal kula yiʼarrid aryaan. »
Wa da kalaam Allah.