7
1 wa wakit nidoor nachfi Bani Israaʼiil,
khata Afraayim wa fasaalit al‑Saamira yibiinu
achaan fiʼilhum kulla khachch.
Al‑sarraag yadkhul fi l‑buyuut
wa rabbaatiin al‑duruub yagoodu fi l‑chawaariʼ.
2 Humman ma yahsubu
kadar ana nizzakkar kulla fasaalithum.
Hassaʼ aʼmaalhum hawwagoohum
wa gaaʼidiin giddaami daayman.
3 Be fasaalithum,
yifarruhu al‑malik
wa be kidibhum,
yifarruhu al‑kubaaraat.
4 Humman kulluhum zannaayiin
wa chahwithum misil furun mugabbad.
Siid al‑furun ma yiraakhibah
min ajjan dagiigah
lahaddi ajiinah yugumm.
5 Wa fi yoom iid malikna,
al‑kubaaraat yamrado min sakar al‑khamar
wa l‑malik yimidd iidah le l‑chammaatiin.
6 Wakit yigarrubu leyah,
guluubhum misil furun mugabbad
fi muʼaamarathum al‑yugummu beeha.
Fi tuul al‑leel,
zaʼalhum yargud
wa be fajur,
yugumm misil naar ambalbaala.
7 Kulluhum haamiyiin misil al‑furun
wa yaakulu hukkaamhum.
Kulla muluukhum yagaʼo
wa minhum ma fi waahid al‑yinaadiini.
8 « Wa naas gabiilat Afraayim yikhalbutu
maʼa chuʼuub aakhariin al‑ma yaʼarfu Allah.
Aywa,
naas Afraayim ma naafʼiin
misil kaʼak al‑ma chaglabooh.
9 Al‑ajaanib dool kammalo gudrithum
wa humman ma yaʼarfuuh.
Abchiyyeeb ja leehum
wa humman ma yaʼarfuuh.
10 Istikbaar Bani Israaʼiil yachhad fooghum.
Laakin ma gabbalo le Allah Ilaahhum
wa la fattachooh.
11 « Naas Afraayim bigo mukhaffaliin
misil hamaam al‑ma indah raas.
Humman yinaadu Masir le tafzaʼhum
wa yajru wara Achuur le tidaafiʼ leehum.
12 Wakit yamchu,
ana nazgul fooghum charaki
wa misil teer al‑sama,
nakrubhum.
Wa niʼaakhibhum
hasab al‑balaakh al‑simʼooh fi malammithum.
13 « Al‑azaab leehum achaan arrado minni !
Al‑damaar leehum achaan atmarrado diddi !
Ana chilt niiye le nafdaahum
wa laakin humman gaalo foogi kalaam kidib.
14 Humman ma yasrakho leyi min daakhal guluubhum
wakit yabku be hizin fi furaachhum.
Yijarruhu nufuushum
wa yinaadu ilaahaathum
le yantuuhum al‑gameh wa l‑khamar
wa laakin yibaʼʼudu minni ana.
15 Wa ana bas addabtuhum
wa gawweet duraaʼhum
wa laakin humman yichiilu niiyit al‑fasaala diddi.
16 Humman yigabbulu
wa laakin ma aleyi ana Allah al‑Aali.
Humman misil nubbaal aʼwaj
wa kubaaraathum yumuutu be l‑seef
be sabab lisaanhum al‑tariin diddi.
Wa daahu fi balad Masir,
al‑naas yichchammato fooghum. »