Allah aba al‑chaʼab al‑khaanooh
5
1 « Ya rujaal al‑diin,
asmaʼo al‑kalaam da !
Ya Bani Israaʼiil,
khuttu baalku !
Ya naas beet al‑malik,
khuttu adaanku !
Al‑chariiʼa di muwajjihe leeku intu
achaan fi Misfa,
kajjeetu charak le chaʼabi
wa fi jabal Taabuur,
khatteetu leehum amkajjaama.
2 Aywa,
intu nakattu nugra kabiire le naas Chittiim
wa laakin ana niʼaddibku kulluku.
3 Ana naʼarif tamaam gabiilat Afraayim,
aywa,
Bani Israaʼiil ma mulabbadiin leyi.
Ya naas Afraayim,
intu achcharmattu,
aywa,
Bani Israaʼiil annajjaso. »
4 Wa amalhum al‑hawaan
ma yikhalliihum yigabbulu le Ilaahhum
achaan ruuh al‑charmata gaaʼide fi guluubhum
wa humman ma yaʼarfu Allah.
5 Istikbaar Bani Israaʼiil yachhad fooghum.
Bani Israaʼiil wa naas Afraayim
yittartaʼo fi chaan khataahum
wa Bani Yahuuza kula
yittartaʼo maʼaahum.
6 Yamchu yigaddumu
bagarhum wa khanamhum dahaaya
le yifattuchu Allah
wa laakin ma yalgooh
achaan hu khallaahum khalaas.
7 Humman khaano Allah
achaan wildo iyaal zina.
Wa fi wakit gisayyir bas,
yiddammaro,
humman wa arduhum.
Allah yiʼaakhib Israaʼiil wa Yahuuza
8 Allah gaal :
« Adurbu al‑buug fi Gibeeʼa
wa adurbu al‑burunji fi l‑Raama.
Iitu le Beet Iil al‑fasle
wa chiifu waraaku,
ya naas Banyaamiin !
9 Fi yoom al‑ikhaab,
naas Afraayim yakhrabo.
Wa l‑khabar al‑niballikhah leeku,
ya gabaayil Israaʼiil,
hu khabar akiid.
10 Kubaaraat Yahuuza
misil naas al‑yihawwulu al‑kalanki.
Ana ninazzil khadabi fooghum
misil almi al‑seel.
11 Zalamo naas Afraayim
wa awwajo chariiʼithum
achaan humman yiriidu yajru
wara l‑riih.
12 Wa ana nabga misil arda le naas Afraayim
wa misil suusa le Bani Yahuuza.
13 Naas Afraayim chaafo maradhum
wa Bani Yahuuza chaafo uwaarhum.
Wa dawwaro musaaʼada min balad Achuur
wa rassalo naas le l‑malik al‑kabiir.
Laakin al‑malik da ma yagdar yachfiihum
wa ma yagdar yidaawi uwaarhum.
14 Achaan ana nabga misil duud didd naas Afraayim
wa misil farkh al‑duud didd Bani Yahuuza.
Ana bas nadrubhum wa nicharrithum
wa nukurruhum wa niwaddiihum
wa ma fi naadum al‑yinajjiihum minni.
15 Ana namrug wa nigabbil fi bakaani
lahaddi yiʼtarufu be khataahum
wa yiwajjuhu aleyi.
Wa fi diigithum di,
yifattuchuuni. »