Churuut dakhuul al‑beet al‑mukhaddas
44
1 Wa l‑raajil waddaani le beet al‑madkhal al‑sabhaani hana l‑beet al‑mukhaddas wa derbah al‑yaftah fi l‑fadaay al‑dakhlaaniiye da masduud.
2 Wa Allah gaal leyi :
« Al‑derib da yisidduuh wa battaan ma yufukkuuh.
Wa naadum ma yiʼaddi beyah achaan ana Allah Ilaah Bani Israaʼiil dakhalt be l‑derib da wa hassaʼ hu yukuun masduud.
3 Wa laakin al‑malik yagdar yagood foogah achaan hu malik wa yaakul giddaami ana Allah.
Hu yadkhul be khurfit al‑madkhal hana l‑beet da wa yamrug be nafs al‑derib al‑hu dakhal beyah. »
4 Wa baʼad da,
al‑raajil waddaani be beet al‑madkhal al‑munchaakhi lahaddi wisilna giddaam al‑beet al‑mukhaddas.
Wa daahu ana chift majd Allah mala beetah.
Wa khalaas,
ana wagaʼt be wijhi fi l‑ard.
5 Wa Allah gaal leyi :
« Ya ibn Adam,
khutt baalak wa aftah uyuunak wa chiif !
Wa khutt adaanak wa asmaʼ kulla l‑kalaam al‑nuguulah leek al‑bukhuss al‑churuut hana beeti ana Allah wa kulla gawaaniinah.
Wa fakkir tamaam fi churuut al‑dakhiliin wa l‑marigiin min al‑beet al‑mukhaddas.
6 « Wa guul le Bani Israaʼiil al‑aasiyiin :
‹ Daahu Allah al‑Rabb gaal :
“Ya Bani Israaʼiil !
Kafaaku min kulla muharramaatku !
7 Wakit gaddamtu leyi al‑chaham wa l‑damm hana l‑dahaaya misil akil,
fi l‑wakit da bas,
dakhkhaltu fi beeti al‑mukhaddas ajaanib al‑ma mutahhariin wa guluubhum kula ma taahiriin.
Wa be da,
ma ahtaramtu beeti wa battaan gataʼtu muʼaahadati be kulla muharramaatku.
8 Wa intu ma hafadtu khidimti al‑mukhaddasa wa laakin khatteetu ajaanib fi badalku le yahfado khidimti fi beeti al‑mukhaddas.”
9 Daahu Allah al‑Rabb gaal :
“Khalli ayyi ajnabi al‑ma mutahhar wa galbah kula ma taahir ma yadkhul fi beeti al‑mukhaddas hatta kan hu saakin fi usut Bani Israaʼiil kula.” ›
Churuut le l‑Laawiyiin wa rujaal al‑diin
10 « Wa kan le l‑Laawiyiin al‑baʼʼado minni wakit Bani Israaʼiil abooni wa gabbalo taabaʼo ilaahaathum,
hassaʼ humman yilhammalo natiijat khataahum.
11 Yagdaro yukuunu fi beeti al‑mukhaddas wa yahfado biibaan al‑beet wa yakhdumu fi lubb al‑beet.
Wa humman bas yadbaho al‑bahaayim hana l‑dahaaya al‑muharragiin wa l‑dahaaya al‑yigaddumuuhum al‑chaʼab.
Wa yagoodu jaahiziin le yakhdumu le l‑chaʼab.
12 Wa laakin awwal,
humman dabaho dahaaya al‑chaʼab le asnaamhum wa ramo Bani Israaʼiil fi l‑khata.
Wa be sabab da,
ana narfaʼ iidi didduhum wa humman yilhammalo natiijat khataahum.
Wa da kalaam Allah al‑Rabb.
13 Wa humman ma yigarrubu leyi le yisawwu khidmit rujaal al‑diin wa ma yigarrubu le kulla khidimti al‑mukhaddasa wa la le l‑bakaan al‑mukhaddas marra waahid.
Wa humman yilhammalo natiijat ihaanithum wa l‑muharramaat al‑sawwoohum.
14 Wa ana nikallifhum be khidme sakhayre bas fi beeti al‑mukhaddas wa humman yisawwu kulla khidimtah wa kulla cheyy al‑waajib yakhdumuuh.
15 « Wa kan le rujaal al‑diin al‑Laawiyiin al‑min zurriiyit Saduukh,
humman hafado khidmit beeti al‑mukhaddas wakit Bani Israaʼiil abooni.
Wa hassaʼ,
humman dool bas yigarrubu leyi wa yakhdumu leyi.
Wa yagiifu giddaami wa yigaddumu leyi chaham wa damm al‑dahaaya.
Wa da kalaam Allah al‑Rabb.
16 Wa humman dool yadkhulu fi beeti al‑mukhaddas wa yigarrubu le tarabeezti le yakhdumu leyi wa yahfado khidimti.
17 « Wa khalaas wakit yadkhulu be buyuut madaakhil hana l‑fadaay al‑dakhlaaniiye,
humman yalbaso khulgaan hana kattaan.
Ma yalbaso khulgaan hana suuf wakit yakhdumu fi l‑fadaay al‑dakhlaaniiye wa fi l‑beet al‑mukhaddas.
18 Wa yukujju kadaamiil hana kattaan wa yalbaso saraawiil dugaag hana kattaan wa ma yalbaso ayyi cheyy al‑yijiib leehum al‑wakhar.
19 Wa wakit yidooru yamurgu fi l‑fadaay al‑barraaniiye ale l‑chaʼab,
yisillu al‑khulgaan al‑khadamo beehum wa yukhuttuuhum fi l‑khuraf jamb al‑beet al‑mukhaddas.
Wa yalbaso khulgaan aadiyiin achaan ma yikhassusu al‑chaʼab be khulgaanhum al‑mukhassasiin.
20 Wa ma yizayyunu ruuseehum wa la yikhallu chaʼarhum yabga tuwaal laakin yugussuuh be nizaam.
21 Wa ayyi raajil diin ma waajib yachrab khamar wakit yadkhul fi l‑fadaay al‑dakhlaaniiye.
22 Wa ma yaakhudu mara armala wa la mutallaga.
Yaakhudu illa banaat udriiyaat min gabiilat Bani Israaʼiil aw mara armala al‑raajilha raajil diin.
23 « Wa rujaal al‑diin yiʼallumu chaʼabi al‑faraga been al‑mukhaddas wa l‑ma mukhaddas wa yiʼarrufuuhum al‑faraga been al‑taahir wa l‑nijis.
24 Wa kan fi muchkila,
humman bas yabgo gudiya wa yichaaruʼu hasab chariiʼti.
Wa yitabbugu churuuti al‑fi l‑Tawraat wa gawaaniini wa yahfado kulla aʼyaadi wa yoomi hana l‑sabt,
yajʼalooh mukhaddas.
25 « Wa ayyi raajil diin ma yigarrib le naadum mayyit achaan da yisawwiih nijis.
Wa laakin yagdar yigarrib wa yabga nijis be janaazit abuuh aw ammah aw wileedah aw bittah aw akhuuh aw akhtah al‑lissaaʼha ma akhadat.
26 Wa baʼad yittahhar,
yagood sabʼa yoom hatta yaji.
27 Wa yoom hu yaji fi l‑fadaay al‑dakhlaaniiye hana l‑beet al‑mukhaddas,
hu yigaddim dahiiytah le kaffaarat al‑zanib gubbaal ma yisawwi khidmit al‑beet.
Wa da kalaam Allah al‑Rabb.
28 « Wa rujaal al‑diin yakhdumu leyi ana wa ana bas warasathum.
Intu ma tantuuhum ard fi balad Israaʼiil achaan ana bas warasathum.
29 Wa humman yaakulu al‑hadaaya wa l‑dahaaya le kaffaarat al‑zanib wa l‑dahaaya le kaffaarat al‑khata.
Wa kulla cheyy al‑yikhassusuuh leyi Bani Israaʼiil,
ana nantiih leehum.
30 Wa kulla l‑intaaj al‑awwal wa kulla zakaatku yabgo le rujaal al‑diin.
Wa antu le rujaal al‑diin awwal dagiigku wa be da,
buyuutku yukuunu mubaarakiin.
31 Wa ma waajib rujaal al‑diin yaakulu rimme wa la jiife kan tabga hint teer aw haywaan kula. »