Bani Yahuuza atwakkalo ale l‑khachch
7
1 Wa daahu kalaam Allah al‑gaalah le Irmiya :
2 Amchi wa agiif fi madkhal beet Allah wa guul al‑kalaam da :
« Ya naas Yahuuza al‑tadkhulu be l‑madkhal da le tasjudu giddaam Allah.
Intu kulluku,
asmaʼo kalaam Allah.
3 Wa daahu Allah al‑Gaadir Ilaah Bani Israaʼiil gaal leeku :
‹ Salluhu haalku wa amalku wa be da,
nikhalliiku taskunu fi l‑balad di.
4 Ma tisaddugu al‑kalaam al‑khachch al‑buguul :
“Daahu hini beet Allah,
beet Allah,
beet Allah.
Cheyy ma yajiina.”
5 Badal al‑kalaam da,
salluhu haalku wa amalku wa sawwu al‑adaala been al‑naas.
6 Wa ma tazulmu al‑ajnabi wa la l‑atiim wa la l‑armala wa la tidaffugu damm al‑bari fi l‑ard di.
Wa ma tajru wara ilaahaat aakhariin wa tijiibu al‑fasaala fi nufuusku.
7 Wa be da,
khalaas nikhalliiku taskunu hini fi l‑balad al‑ana anteetha le juduudku daayman wa ila l‑abad.
8 « ‹ Wa laakin daahu intu saddagtu be l‑kalaam al‑khachch da,
al‑ma indah faayde.
9 Intu tasurgu wa taktulu wa tazno wa tahalfu be kidib wa tiharrugu bakhuur le ilaah Baʼal wa tajru wara ilaahaat aakhariin al‑awwal ma taʼarfuuhum.
10 Wa kikkeef taju giddaami fi beeti al‑foogah usmi wa tuguulu :
“Cheyy ma yajiina.”
Wa baʼad da,
battaan tisawwu kulla l‑muharramaat dool !
11 Wa l‑beet al‑foogah usmi,
intu tichiifuuh misil karkuur hana saraariig walla ?
Tamaam,
ana kula nichiifah misil da !
Wa da kalaam Allah.
12 « ‹ Khalaas,
gummu amchu fi bakaani al‑zamaan gaaʼid fi Chiilooh* wa da l‑bakaan al‑awwal ana khatteet foogah usmi.
Wa chiifu al‑damaar al‑ana jibtah fi l‑bakaan da,
be sabab al‑fasaala al‑sawwooha chaʼabi Bani Israaʼiil.
13 Wa hassaʼ intu kula sawweetu nafs al‑fasaala di.
Wa ana kallamt leeku beeha daayman wa intu ma simiʼtuuni.
Wa ana naadeetku kula wa intu ma raddeetu leyi.
Wa da kalaam Allah.
14 Wa khalaas,
ana nijiib nafs al‑damaar al‑jibtah fi Chiilooh fi beeti al‑foogah usmi al‑intu titwakkalo aleyah wa da l‑beet al‑ana anteetah le juduudku wa leeku intu.
15 Ya Bani Yahuuza,
ana natrudku baʼiid minni misil taradt akhwaanku min Bani Israaʼiil.
› »
Al‑chaʼab iso amur Allah
16 « Wa inta,
ya Irmiya,
ma tasʼalni fi chaan al‑chaʼab da wa ma tarfaʼ al‑duʼa wa tachhadni fi chaanhum.
Ma tiddarraʼ leyi !
Ana ma nasmaʼak.
17 Inta ma gaaʼid tichiif al‑cheyy al‑gaaʼidiin yisawwuuh fi hillaal balad Yahuuza wa chawaariʼ Madiinat al‑Khudus walla ?
18 Al‑iyaal yilaggutu hatab wa l‑abbahaat yigabbudu naar wa l‑awiin yiʼajjinan dagiig le yisawwan kaʼak al‑yigaddumuuh le sanam al‑usmah malikat al‑sama.
Humman gaaʼidiin yigaddumu hadiiyat charaab le ilaahaat aakhariin wa be da,
yikhaddubuuni ana.
19 Hal da yikhaddibni walla ?
Al‑eeb yaji fooghum humman bas.
» Wa da kalaam Allah.
20 Wa fi chaan da,
daahu Allah al‑Rabb gaal :
« Khadabi al‑muhrig yanzil fi l‑bakaan da,
fi l‑naas wa l‑haywaanaat wa chadar al‑khaaba wa intaaj al‑ard.
Wa naar khadabi abadan ma tumuut. »
21 Wa daahu Allah al‑Gaadir Ilaah Bani Israaʼiil gaal :
« Chiilu dahaayaaku al‑muharragiin wa limmuuhum maʼa laham dahaayaaku al‑aakhariin wa aakuluuh intu.
22 Wa wakit ana maragt juduudku min balad Masir,
ana ma amartuhum be dahaaya muharragiin wa la be dahaaya aakhariin.
23 Wa laakin ana amartuhum be cheyy waahid bas wa gult :
‹ Asmaʼo kalaami !
Wa be da,
ana nabga Ilaahku wa intu tabgo chaʼabi.
Chiilu adiil al‑derib al‑naamurku beyah wa be da,
tafraho. ›
24 Wa laakin humman ma khatto adaanhum le yasmaʼooni wa sawwo hasab niiyithum al‑fasle wa galibhum al‑azrag.
Wa badal yiwajjuhu aleyi,
humman antooni duhuurhum.
25 Wa min wakit juduudku marago min balad Masir lahaddi l‑yoom,
ana gaaʼid nirassil leeku abiidi al‑anbiya daayman.
26 Wa laakin intu ma khatteetu adaanku wa simiʼtuuni wa gawweetu ruuseeku wa bigiitu fasliin ziyaada min juduudku.
27 « Wa inta,
ya Irmiya,
kan tifassir leehum kulla l‑kalaam da,
humman ma yasmaʼook wa kan tinaadiihum kula ma yuruddu leek.
28 Wa khalaas guul leehum :
‹ Intu bas al‑umma al‑ma tasmaʼ kalaam Allah Ilaahha wa ma takhbal wasiiytah.
Wa l‑sahiih angachcha min lisaanku wa bigi ma fiih.
› »
Tuufa waadi al‑janaazaat
29 Ya naas Yahuuza,
agtaʼo chaʼarku
wa azguluuh min al‑hizin
wa atlaʼo fi ruuse al‑jibaal wa nuuhu
achaan Allah aba al‑zurriiye al‑tikhaddibah.
30 Wa daahu kalaam Allah :
« Bani Yahuuza gaaʼidiin yisawwu al‑fasil giddaami wa yijiibu muharramaathum fi beeti al‑foogah usmi wa yinajjusuuh.
31 Wa fi waadi Bani Hinnuum fi Tuufa bano madbah le yiharrugu foogah awlaadhum wa banaathum.
Wa da fikir hana chunu !
Ana ma amartuhum beyah wa la fakkart foogah yoom waahid. »
32 Wa daahu kalaam Allah :
« Wa yaji yoom waahid,
battaan ma yinaaduuh Tuufa wa la waadi Bani Hinnuum.
Wa laakin yinaaduuh waadi al‑Janaazaat achaan yadfunuuhum fi Tuufa lahaddi tinmali be l‑janaazaat.
33 Wa l‑janaazaat dool yabgo akil le l‑suguura wa l‑maraafʼiin wa ma fi naadum al‑yaji yatrudhum.
34 Wa fi hillaal balad Yahuuza wa chawaariʼ Madiinat al‑Khudus,
ana niwaggif kulla l‑zakhraat wa l‑ragraag wa khine al‑ursaan.
Achaan al‑balad di takhrab. »