Kalaam Allah al‑bukhuss al‑beet
66
1 Daahu Allah gaal :
« Al‑sama archi
wa l‑ard bakaan nukhutt rijileeni.
Hal tagdaro tabnu beet
al‑yichiilni walla ?
Walla tagdaro tabnu leyi
bakaan le l‑raaha ?
2 Achaan kulla l‑achya dool,
iidi bas sawwathum
wa misil da bas,
humman mawjuudiin.
Daahu al‑naadum al‑ana narda beyah,
hu al‑miskiin wa ruuhah muhattama
wa yarjif min kalaami. »
Wa da kalaam Allah.
3 « Wa laakin al‑yadbah toor dahiiye,
hu misil al‑yaktul insaan.
Wa l‑yigaddim khanamaay dahiiye,
hu misil al‑yaksir ragabat kalib.
Wa l‑yigaddim hadiiye hana dagiig,
hu misil al‑yigaddim hadiiye damm hana khinziir
wa l‑yiharrig bakhuur,
hu misil al‑yaʼabud sanam.
Al‑naas dool azalo deribhum
wa be muharramaathum dool,
humman farhaaniin.
4 Ana kula naʼazil leehum natiijat amalhum
wa nijiib fooghum al‑yikhawwifhum.
Achaan ana naadeethum
wa ma raddo leyi
wa kallamt leehum
wa ma simʼo kalaami.
Wa laakin humman sawwo al‑fasil giddaami
wa azalo al‑ma nidoorah. »
5 Asmaʼo kalaam Allah,
intu al‑tarjufu min kalaamah :
« Akhwaanku yakrahooku
wa yibaʼʼuduuku
fi chaan usmi ana Allah.
Wa yichchammato foogku
wa yuguulu :
‹ Khalli Allah yiwassif majdah
wa nichiifu farahku ! ›
Wa laakin humman bas
yalgo al‑eeb. »
6 Fi hiss hana aayit jaayi min al‑madiina
wa haraka jaaye min beet Allah.
Wa da hiss Allah al‑gaaʼid yijaazi udwaanah.
7 Gabul al‑talaga ma takrubha,
jabal Sahyuun wildat.
Wa gabul al‑wajaʼ ma yajiiha,
hi wildat jaabat wileed.
8 Yaatu al‑simiʼ be cheyy misil da ?
Wa yaatu al‑chaaf cheyy misil da ?
Fiyah balad al‑wildooha
fi yoom waahid walla ?
Fi umma yaldooha
fi wakit waahid walla ?
Laakin wakit gariib titaalig,
Sahyuun wildat awlaadha khalaas.
9 Wa Allah gaal :
« Ana naftah batun al‑amm
wa ma nikhalliiha talda walla ? »
Aywa,
Ilaahak gaal :
« Ana al‑niwallid,
nadhar al‑sakhiir ma yamrug walla ? »
10 « Afraho maʼa Madiinat al‑Khudus wa anbastu beeha,
intu kulluku al‑tihibbuuha !
Afraho maʼaaha be suruur,
intu kulluku al‑hizintu fi chaanha.
11 Achaan intu tardaʼo min deedha wa tarwo
wa talgo mahannitha.
Achaan tumussu wa tafraho
min darritha al‑malaane be laban. »
12 Wa daahu Allah gaal :
« Ana nanti al‑salaam le Madiinat al‑Khudus
misil almi al‑bahar.
Wa nijiib leeha majd al‑umam
misil waadi al‑jaari.
Wa yiradduʼuuku wa yichiiluuku fi huduunhum
wa yidaaduluuku fi l‑rikabbuhum.
13 Wa misil amm tisabbir wileedha,
ana kula nisabbirku.
Aywa !
Fi Madiinat al‑Khudus tasburu. »
14 Wa intu tichiifu wa guluubku yafraho
wa udaamku yigawwu misil al‑gechch al‑yikhaddir.
Wa abiid Allah yaʼarfu gudurtah
wa udwaanah yaʼarfu laʼantah.
15 Achaan daahu Allah jaayi fi l‑naar
wa arabaatah hint al‑harib misil amzoobaʼaane.
Yaji le yinazzil khadabah be zaʼal chadiid
wa tahdiidah fi naar amlahiib.
16 Achaan be l‑naar,
Allah yiʼaakhib
wa be seefah yihaakim kulla l‑naas
wa Allah yaktulhum katiiriin.
17 « Wa l‑naas al‑yikhassusu nufuushum
wa yittahharo le yadkhulu fi l‑jineenaat
le yamchu yaʼabudu al‑sanam al‑gaaʼid usut,
humman dool al‑yaakulu laham al‑khinziir wa l‑faar
wa kulla cheyy nijis marra waahid,
humman dool kulluhum yiddammaro ! »
Wa da kalaam Allah.
Allah yibiin le kulla l‑umam
18 « Ana naʼarif amalhum wa fikirhum.
Wa yaji wakit al‑yilimmu foogah kulla l‑umam wa kulla l‑lukhkhaat wa humman yaju wa yichiifu majdi.
19 Wa nukhutt fi lubbuhum alaama.
Wa min al‑faddalo,
nirassil naas waahidiin le l‑umam al‑yaʼarfu yistaʼmalo al‑nuchchaab yaʼni fi Tarchiich wa Fuul wa Luud.
Wa nirassilhum battaan le naas Tuubal wa balad Yawaan wa baʼiid fi l‑jazaayir fi bakaan al‑foogah abadan ma simʼo beyi wa la chaafo majdi.
Wa hinaak yiʼarrufu majdi le l‑umam dool. »
20 Wa Allah gaal :
« Al‑naas yigabbulu kulla akhwaanku min kulla l‑umam be kheel wa arabaat wa kaarro mukhattayiin wa bikhaal wa jumaal lahaddi Madiinat al‑Khudus fi jabali al‑mukhaddas.
Wa yigaddumuuhum misil hadiiye leyi ana Allah.
Wa da yabga misil Bani Israaʼiil yigaddumu hadaayaahum fi mawaaʼiin taahiriin le beet Allah.
21 Wa naʼazil waahidiin minhum rujaal diin wa Laawiyiin.
» Wa da,
Allah bas gaalah.
22 Wa daahu kalaam Allah :
« Misil al‑sama al‑jadiid wa l‑ard al‑jadiide
al‑ana sawweethum gaaʼidiin gawiyiin giddaami,
misil da,
zurriiyitku wa usumku kula
yagoodu saabtiin giddaami.
23 Wa awwal yoom fi kulli chahar
wa fi kulli yoom al‑sabt,
kulla l‑naas yaju yasjudu giddaami.
Wa da,
Allah bas gaalah.
24 Wa wakit yamurgu,
yichiifu janaazaat al‑naas al‑gammo diddi.
Wa l‑duud al‑yaakulhum ma yumuut
wa l‑naar al‑tahrighum kula ma tumuut
wa yabgo masal mukhiif le kulla l‑naas. »