Ichaʼya atnabbaʼ didd balad al‑Habacha
18
1 Al‑azaab le l‑balad al‑foogha
sufun al‑induhum chiraaʼ
fi tuul buhuur al‑Habacha !
2 Di l‑balad al‑tirassil sufara be l‑bahar
fi maraakib hana birdi
al‑yamchi ajala fi l‑almi.
Ya rusul,
amchu ajala !
Amchu le l‑umma
al‑naasha tuwaal wa mulus,
le l‑chaʼab al‑mukhiifiin fi ayyi bakaan.
Aywa,
hi umma gawiiye tarhak kulla cheyy
wa buhuur yuchuggu baladha.
3 Asmaʼo,
intu kulluku
al‑gaaʼidiin fi l‑aalam,
intu al‑saakniin fi l‑ard !
Wakit al‑raaye yarfaʼooha
fi ruuse al‑jibaal,
chiifuuha !
Wa wakit yadurbu al‑buug,
asmaʼooh !
4 Achaan daahu Allah gaal leyi :
« Min bakaani,
ana nichiif wa nagood saakit
misil al‑harraay al‑chadiide fi l‑nahaar
wa misil sahaabaayit al‑karany fi hamu wakit al‑gatiʼ. »
5 Wa gabul al‑gatiʼ,
wakit al‑inab nawwar khalaas
wa wakit al‑nuwwaar bigi inab najiid,
al‑Rabb yagtaʼ al‑furuuʼ be l‑sakkiin
wa yamrug al‑khusuun
wa yukhuttuhum taraf.
6 Wa misil da,
naas al‑Habacha
yikhalluuhum le suguura al‑jibaal
wa le haywaanaat al‑kadaade.
Al‑suguura yaakuluuhum fi wakt al‑seef
wa haywaanaat al‑kadaade fi wakt al‑chite.
7 Wa fi l‑wakit da,
tijiib hadaaya le Allah al‑Gaadir,
al‑umma al‑naasha tuwaal wa mulus
wa chaʼabha mukhiifiin fi ayyi bakaan.
Wa hi umma gawiiye tarhak kulla cheyy
wa buhuur yuchuggu baladha.
Wa hi tijiib hadaaya fi jabal Sahyuun
fi l‑bakaan al‑gaaʼid foogah usum Allah al‑Gaadir.