Muwaab talab musaaʼadat Sahyuun
16
1 Wa kubaaraat Muwaab gaalo :
« Min madiinat Saalaʼ fi l‑sahara,
rassulu kharuuf
le haakim al‑balad
al‑gaaʼid fi jabal Sahyuun al‑misil bineeye. »
2 Wa fi maʼadd waadi Arnuun,
banaat Muwaab yabgan
misil tuyuur al‑muchattatiin
al‑taradoohum min uchchuhum.
3 Wa gaalan :
« Chaawir
wa chiil leena kharaar.
Be l‑nahaar,
khattiina be dullak
misil al‑dalaam yikhatti al‑leel.
Wa labbid naasna al‑muchattatiin
wa ma tibayyin al‑muʼarridiin.
4 Khalli al‑muchattatiin min Muwaab
yaskunu maʼaak
wa abga leehum maljaʼ
wa labbidhum min al‑yidammirhum. »
Al‑zulum yagiif wa l‑damaar yikammil
wa l‑zaalim yiwaddir min al‑balad.
5 Khalaas,
kursi al‑muluk yasbit be l‑rahma
wa yagood foogah haakim amiin
min zurriiyit Dawuud.
Wa hu yichaariʼ be l‑hagg
wa yahkim be l‑adaala.
Sahyuun ma tisaaʼid Muwaab
6 Wa laakin Ichaʼya gaal :
« Aniina simiʼna
be l‑istikbaar al‑chadiid hana Muwaab
wa fachaarha wa istikbaarha
wa khadabha al‑ma indah asaas
wa fachaarha al‑ma indah maʼana.
7 Wa fi chaan da,
al‑Muwaabiyiin yunuuhu
le baladhum Muwaab
wa kulluhum yunuuhu.
Aywa,
intu naas Muwaab tandamo
le kaʼak al‑inab hana hillit Khiir Haaras al‑bigi ma fiih
wa taguntu be hizin.
8 Achaan ziraaʼat Hachbuun yibsat
wa jineenit al‑inab fi hillit Sibma jaffat
hi al‑awwal khamarha yisakkir kubaaraat al‑umam.
Wa zamaan,
al‑inab da lihig hillit Yaʼziir
wa sarah fi l‑kadaade
wa furuuʼah lihgo
khaadi le l‑bahar al‑Mayyit.
9 Wa fi chaan da,
ana nabki maʼa Yaʼziir le inab Sibma
wa narwiiku be dumuuʼi,
ya Hachbuun wa Aliʼaala.
Achaan fi gatiʼku wa lammiinku hana l‑inab,
al‑khine hana l‑farah bigi ma fiih.
10 Wa l‑farha wa l‑suruur bigo ma fiihum
wa fi jineenaat al‑inab,
ma fi zakhraat wa la farha.
Wa l‑yagtaʼ al‑inab ma yaʼasirah fi l‑assaara
wa khine al‑farah bigi ma fiih.
11 Wa fi chaan da,
butuuni rajafo le Muwaab
misil hubaal al‑jigindiiye
wa galbi khaaf le hillit Khiir Haaras.
12 Wa Muwaab tiʼayyi nafisha saakit
fi l‑madbah fi l‑bakaan al‑aali.
Hi tamchi fi bakaanha hana l‑ibaada wa tachhad
wa laakin ma talga cheyy. »