Nihaayat Baabil garrabat
« Khuzzu raaye fi l‑jabal al‑amlas
wa naadu le l‑askar.
Wa wassufuuhum be iideeku
le yadkhulu al‑madiina
be biibaan al‑hukkaam.
3 Ana anteet amur le mukhassasiin hineeyi
wa battaan naadeet furraasi al‑yinaffuzu khadabi,
al‑yafraho be azamati. »
4 Asmaʼo al‑haraka al‑katiire fi l‑jibaal
misil chaʼab katiiriin !
Wa da hiss harakat al‑mamaalik
aywa,
harakat malammat al‑umam !
Allah al‑Gaadir yijahhiz
deechah al‑yihaarib.
5 Humman yaju min balad baʼiide
min aakhir al‑ard.
Allah wa silaah khadabah
yisabbubu damaar hana kulla l‑balad.
6 Abku be hizin achaan yoom Allah garrab
wa da yoom hana damaar chadiid
al‑jaayi min al‑Gaadir.
7 Wa be sabab da,
kulla l‑iideen yinrakhu
wa ayyi naadum galbah yingatiʼ.
8 Humman yinbahtu
wa yakrubhum wajaʼ wa talaga
wa yittanno
misil mara al‑gaaʼide titaalig.
Wa l‑waahid yichiif al‑aakhar
kulluhum munbahitiin
wa yisallulu uyuunhum min al‑khoof.
9 Daahu yoom Allah jaayi,
yoom hana khadab mukhiif wa zaʼal chadiid
al‑foogah Allah yakhrib al‑ard
wa yuguchch minha al‑muznibiin.
10 Wa be da,
nujuum al‑sama wa l‑Sabi al‑Makhmi
nuurhum ma yibiin.
Wa min taluuʼha,
al‑harraay tabga dalma
wa l‑gamar kula,
nuurah ma yidawwi.
11 Wa l‑Rabb gaal :
« Ana niʼaakhib al‑dunya fi chaan fasaalitha
wa l‑aasiyiin fi chaan khataahum.
Wa niwaggif istikbaar al‑mustakbiriin
wa ninazzil fachaar siyaad al‑unuf.
12 Wa nisawwi al‑insaan khaali ma yinlagi
misil al‑dahab al‑saafi.
Aywa,
Bani Adam yabga khaali ma yinlagi
misil dahab balad Ufiir.
13 « Wa be sabab da,
nihizz al‑sama
wa nirajjif al‑ard min asaasha.
Wa da min chiddit zaʼali ana Allah al‑Gaadir
fi yoom khadabi al‑muhrig.
14 Khalaas,
misil al‑khazaala al‑matruuda
wa misil al‑khanam al‑ma induhum raaʼi,
ayyi waahid yigabbil le chaʼabah
wa ayyi waahid yiʼarrid le baladah.
15 Wa ayyi waahid al‑yalgooh,
yatʼanooh
wa ayyi waahid al‑yakurbuuh,
yaktuluuh be l‑seef.
16 Wa atfaalhum yarhakoohum giddaamhum
wa yanhabo khumaam buyuuthum
wa yarugdu maʼa awiinhum be gu. »
17 Wa l‑Rabb gaal :
« Daahu nigawwim al‑Maadiyiin didduhum
al‑ma yifakkuru fi l‑fudda
wa l‑dahab kula ma yaʼajibhum.
18 Wa be nuchchaabhum,
yaktulu al‑chabaab
wa ma yarhamo al‑tifil
wa ma yihinnu fi l‑iyaal al‑dugaag. »
19 Zamaan,
madiinat Baabil jamaal al‑mamaalik
wa ziinat al‑Baabiliyiin.
Wa hassaʼ,
hi tabga
misil Saduum wa Amuura
al‑dammaraahum al‑Rabb.
20 Hi ma yaskunuuha ila l‑abad
wa min zurriiye le zurriiye kula,
ma yaskunuuha.
Al‑arab al‑yisiiru
ma yabnu khiyamhum hinaak
wa l‑ruʼyaan ma yisawwu
zaraayibhum hinaak.
21 Haywaanaat al‑kadaade yaskunuuha
wa tuyuur amguggum yamlo buyuutha.
Wa l‑naʼaam yaskunha
wa tuyuus al‑hajar yalʼabo foogha.
22 Al‑maraafʼiin yabku fi buyuutha al‑samhiin
wa l‑baʼaachiim fi gusuurha al‑kubaar.
Wakitha gariib yaji
wa ayyaamha mahsuubiin.