Yaji malik aadil min zurriiyit Dawuud
11
1 Wa yaji waahid min zurriiyit Yassa
misil firiʼ al‑yabzur min dumbur
wa min gaʼarah tugumm
bizre al‑tisawwi iyaal.
2 Wa fi l‑naadum da,
yanzil Ruuh Allah
wa da ruuh al‑hikma wa l‑maʼrafa
wa l‑choora wa l‑fahaaliiye
wa l‑ilim wa l‑khoof min Allah.
3 Wa hu yafrah be l‑khoof min Allah
wa ma yahkim be l‑chaafatah eenah
wa ma yikharrir be l‑simʼatah adaanah.
4 Wa yahkim le l‑fagraaniin be l‑adaala
wa yikharrir be l‑adil le masaakiin al‑balad.
Wa kalaamah,
misil be asa yadrub al‑balad
wa be kilme waahide,
yaktul al‑aasi.
5 Wa l‑adaala misil hizaam sulbah
wa l‑sahiih misil hizaam batnah.
Ma fi damaar fi jabal Allah
6 Wa l‑baʼachoom yaskun maʼa l‑hamal
wa l‑nimir yargud jamb al‑sakhal.
Wa l‑ijil wa farkh al‑duud yaakulu sawa
wa wileed sakhayyar yuguudhum.
7 Wa l‑bagara wa l‑dubb yasraho sawa
wa iyaalhum yarugdu bakaan waahid.
Wa l‑duud yabga misil al‑toor,
yaakul al‑gechch.
8 Al‑tifil yalʼab be uchch abundarag
aywa,
al‑sakhiir yidiss iidah fi nugrat al‑daabi.
9 Wa ma tukuun fasaala wa la damaar
fi kulla jabali al‑mukhaddas
achaan al‑ard tinmali be maʼrafat Allah
misil al‑bahar yinmali be almi.
Gabbiliin kulla Bani Israaʼiil
10 Wa fi l‑yoom da,
irig Yassa yabga misil raaye le l‑chuʼuub.
Wa l‑umam yifattuchuuh
wa bakaanah al‑yinjamma foogah aziim.
11 Wa fi l‑yoom da,
al‑Rabb yimidd iidah le taani marra
le yafda al‑faddalo min chaʼabah
al‑gaaʼidiin fi buldaan Achuur wa Masir
wa Fatruus wa l‑Habacha wa Ilaam
wa Chinʼaar wa Hamaat
wa fi jazaayir al‑bahar.
12 Hu yarfaʼ raaye le l‑umam
wa yilimm Bani Israaʼiil al‑matruudiin
wa yajmaʼ Bani Yahuuza al‑muchattatiin
fi l‑arbaʼa jiihaat hana l‑ard.
13 Wa husud Afraayim yabga ma fiih
wa khusmaan Yahuuza yikammulu.
Wa Afraayim ma yahsid Yahuuza battaan
wa Yahuuza ma yabga abadan
khasiim Afraayim.
14 Wa humman yinsabbo
fi l‑Filistiyiin fi l‑kharib
wa sawa yanhabo
al‑gaaʼidiin fi l‑sabaah.
Wa fi buldaan Adoom wa Muwaab,
yahkumu
wa le Bani Ammuun,
yamulkuuhum.
15 Wa Allah yiyabbis rijil bahar Masir
wa yarfaʼ iidah le yadrub bahar al‑Furaat
be chiddit nafkhatah.
Wa yigassimah sabʼa wudyaan dugaag
al‑yagdaro yagtaʼoohum be rijleehum.
16 Wa hinaak,
hu yisawwi derib
le l‑faddalo min chaʼabah fi balad Achuur
misil zamaan sawwa derib le Bani Israaʼiil
yoom marago min balad Masir.