Bani Israaʼiil misil jineenit al‑inab
5
1 Khalli nikhanni le mahbuubi.
Wa da khine le mahbuubi
wa le jineentah hana l‑inab.
Mahbuubi indah jineenit inab
fi gooz al‑yigawwim adiil.
2 Hu harat al‑ard wa marag hujaarha
wa chaal ahsan magan wa magganah.
Wa bana beet tawiil le l‑muraakhaba
fi lubb al‑jineene
wa fi l‑hajar,
sawwa assaara.
Indah acham yalga inab adiil
wa laakin jineentah antajat illa inab talfaan.
3 Khalaas,
gaal :
« Hassaʼ da,
ya sukkaan Madiinat al‑Khudus !
Wa ya naas Yahuuza !
Ahkumu beeni ana
wa been jineenti hana l‑inab.
4 Chunu nagdar nisawwiih le jineenti
ziyaada min al‑sawweetah ?
Ana gaaʼid narja be acham inab adiil
wa maala hi antajat inab talfaan ?
5 « Wa hassaʼ niʼooriiku
al‑nisawwiih le jineenti.
Ana namrug al‑zariibe
wa l‑bahaayim yaakuluuha
wa nigidd khurma fi l‑durdur
le yadkhulu yifajjukhuuha.
6 Al‑jineene di,
ana nakhribha
wa la niʼaddilha wa la nijankibha
wa l‑chook wa andireesa
yugummu foogha.
Wa nanti amur le l‑sahaab
ma yinazzil al‑matara foogha. »
7 Achaan jineenit Allah al‑Gaadir,
hi zurriiyit Bani Israaʼiil.
Wa naas Yahuuza,
humman magan al‑hu yihibbah.
Be acham hu yarja minhum al‑adaala
wa laakin ligi al‑zulum.
Hu yarja minhum al‑salaah
wa laakin simiʼ siraakh al‑mazluum.
Sitte waba fi kubaaraat Yahuuza
8 Al‑azaab le l‑yilimmu
beet fi beet wa zereʼ fi zereʼ
lahaddi yichiilu kulla l‑bakaan
wa yaskunu wiheedhum fi ust al‑balad.
9 Be udneeyi,
ana simiʼt
haliifit Allah al‑Gaadir,
hu gaal :
« Adad kabiir hana buyuut yakhrabo
aywa,
humman buyuut kubaar wa samhiin
wa yabgo faadiyiin min sukkaanhum.
10 Wa 10 habil hana jineenit inab
yantij illa 10 kooro hana asiir
wa l‑yiteerib 100 kooro hana gameh
yalga 10 kooro bas. »
11 Al‑azaab le l‑yugummu badri
wa yifattuchu al‑mariise
wa le l‑yidaffu jisimhum
be l‑khamar fi aakhir al‑leel.
12 Al‑jigindiiye wa amsibeybe
wa l‑tambal wa l‑suffaara,
humman dool yichajjuʼu sakarhum.
Laakin al‑naas dool,
ma gaaʼidiin yifakkuru fi amal Allah
wa la yichiifu cheyy al‑sawwatah iidah.
13 Fi chaan gillit al‑maʼrafa,
chaʼabi yiwadduuhum fi l‑khurba.
Wa l‑induhum charaf,
yumuutu min al‑juuʼ
wa katiiriin min naas al‑hille
yumuutu min al‑atach.
14 Wa fi chaan da,
al‑haawiye tiwassiʼ halguumha
wa khachumha,
taftahah wasiiʼ bala hadd.
Wa yanzulu foogha al‑induhum charaf
wa katiiriin min naas al‑hille
wa harakathum hana l‑farha kula
tanzil maʼaahum.
15 Wa kulla l‑naas yidanguru
wa ayyi raajil yilmaskan
wa l‑yichiifu be istikbaar
yidallu ruuseehum.
16 Wa Allah al‑Gaadir yibayyin adaaltah,
aywa,
al‑Ilaah al‑Khudduus
yiwassif adaaltah.
17 Al‑humlaan yasraho fi l‑hille al‑kharbaane
misil fi marʼaahum
wa l‑khanam al‑sumaan
yaakulu fi bakaanha al‑kharaab.
18 Al‑azaab leehum !
Humman al‑yukurru khataahum
be hubaal al‑kidib misil kaarro,
yukurru waraahum zunuubhum.
19 Wa yuguulu :
« Khalli Allah yisawwi khidimtah ajala
achaan nichiifuuha !
Wa Khudduus Israaʼiil,
khalli yigarrib
wa yihaggig niiytah
achaan naʼarfuuha ! »
20 Al‑azaab le l‑naas
al‑yuguulu al‑charr kheer
wa l‑kheer charr !
Wa yisawwu al‑dalaam nuur
wa l‑nuur dalaam.
Al‑yisawwu al‑murr halu
wa l‑halu murr.
21 Al‑azaab le l‑yichiifu nufuushum hakiimiin
wa yajʼalo nufuushum faahimiin !
22 Al‑azaab le l‑yaʼarfu charaab al‑khamar
aywa,
al‑induhum khibra fi khalbitiin al‑mariise !
23 Humman yibarru al‑khaati fi chaan al‑rachwa
wa ma yantu hagg le l‑saalih fi l‑chariiʼa.
24 Fi chaan da,
humman yabgo
misil gechch al‑taakulah al‑naar
wa misil ageeg al‑yiwaddir fi ambalbaala.
Wa uruughum yiʼaffunu
wa nuwwaarhum yabgo misil ajaaj.
Achaan humman ma tabbago
Tawraat Allah al‑Gaadir
wa hagaro
kalaam Khudduus Israaʼiil.
Allah nazzal khadab didd chaʼabah
25 Wa be sabab da,
khadab Allah yanzil
didd chaʼabah.
Hu yarfaʼ iidah didduhum
le yadrubhum.
Wa l‑jibaal yarjufu
wa janaazaat chaʼabah yabgo
misil wasakh fi ust al‑chawaariʼ.
Laakin be da kula,
ma khalla zaʼalah
wa iidah gaaʼide marfuuʼa le l‑ikhaab.
26 Hu yarfaʼ raaye le umam baʼiidiin
wa yisaffir le yinaadi al‑gaaʼidiin fi aakhir al‑ard.
Daahu !
Humman yugummu ajala
wa yaju be surʼa.
27 Wa l‑naas dool
wa la yaʼayo wa la yittartaʼo
wa la yanʼaso wa la yunuumu.
Humman wa la yihillu hizaamhum
wa la yifartugu niʼleehum.
28 Nachaachiibhum turaan
wa nubbaalhum jaahiz le yazurgu.
Dalaafe kheelhum misil al‑hujaar
wa rijle arabaathum ajiiliin
misil amzoobaʼaane.
29 Wa yabku misil al‑duud
aywa,
yabku misil furuukh al‑duud.
Yabku wa yakurbu fariisithum
wa ma fi naadum al‑yinajjiiha minhum.
30 Wa laakin fi l‑yoom da,
humman yikirru didd fariisithum
misil hiss al‑bahar al‑yugumm.
Wa fi l‑ard,
daahu fiyah illa l‑dalaam wa l‑diige
wa l‑nuur yabga dalaam be sabab al‑khamaam.