2
1 Daahu kalaam al‑ruʼya al‑chaafha Ichaʼya wileed Ammuus,
fi chaan balad Yahuuza wa Madiinat al‑Khudus.
Al‑umam yamchu be katara
2 Fi aakhir al‑wakit,
jabal beet Allah
yasbit fi ruuse al‑jibaal
wa yabga aali min kulla l‑hujaar.
Wa kulla l‑umam yaju leyah be katara
misil almi al‑jaari.
3 Wa chuʼuub katiiriin yaju wa yuguulu :
« Taʼaalu natlaʼo fi jabal Allah,
fi beet Ilaah Yaakhuub.
Hu yiʼallimna derbah
wa aniina namchu foogah. »
Achaan min Sahyuun,
yamurgu churuut al‑Tawraat
wa min Madiinat al‑Khudus
yamrug kalaam Allah.
4 Allah yabga gaadi been al‑umam
wa yihaakim chuʼuub katiiriin.
Humman yuduggu suyuufhum jaraari
wa yuduggu huraabhum khanaajir.
Wa umma ma tarfaʼ suyuufha le umma
wa ma fi tadriib le l‑harib battaan.
5 Ya zurriiyit Yaakhuub,
taʼaalu
nuruukhu fi nuur Allah.
Yoom al‑Rabb hu yoom al‑chariiʼa
6 Ya Rabb !
Inta abeet chaʼabak
zurriiyit Yaakhuub
achaan humman malaaniin
be aadaat min al‑sabaah.
Yihajju be ilim al‑kheeb
misil al‑Filistiyiin
wa yistafugu maʼa l‑ajaanib.
7 Al‑balad malaane be l‑fudda wa l‑dahab
wa kanzaha katiir bala adad.
Al‑balad malaane be l‑kheel
wa arabaatha hana l‑harib katiiriin bala adad.
8 Al‑balad malaane be l‑ilaahaat
wa l‑naas yasjudu le l‑sanaʼooh be iideehum
aywa,
yasjudu le l‑sawwooh be asaabiʼhum.
9 Ya Rabb !
Al‑insaan yidangir
wa ayyi raajil yilmaskan.
Ma takhfir leehum !
10 Ya l‑naas adkhulu fi karaakiir al‑jibaal
wa allabbado fi l‑nugaar
baʼiid min khoof Allah al‑chadiid
wa nuur majdah.
11 Al‑insaan al‑fachchaar,
yidalli raasah
wa l‑naadum al‑mustakbir,
yidangir.
Wa fi l‑yoom da,
Allah wiheedah bas yiʼazzumuuh.
12 Achaan fi l‑yoom da,
Allah al‑Gaadir yugumm
didd kulla l‑mustakbiriin
wa didd kulla l‑yarfaʼo ruuseehum.
Hu yugumm
didd kulla l‑yikabburu nufuushum
wa hu yinazzilhum.
13 Wa yugumm
didd kulli chadar al‑arz hana Lubnaan
al‑mustakbir wa yarfaʼ raasah
wa didd kulla chadar al‑balluut hana Baachaan.
14 Aywa,
Allah yugumm
didd kulla l‑jibaal al‑aaliyiin
wa didd kulla l‑hujaar al‑kubaar.
15 Wa yugumm
didd kulla l‑buyuut al‑tuwaal hana l‑muraakhaba
wa didd kulla l‑daraadir al‑gawiyiin.
16 Allah yugumm didd
kulla l‑sufun hana Tarchiich
wa didd kulla l‑sufun
al‑chaayliin khumaam sameh.
17 Wa khalaas,
al‑insaan al‑fachchaar yidalli raasah
wa l‑naadum al‑mustakbir,
yidangir.
Wa fi l‑yoom da,
Allah wiheedah bas yiʼazzumuuh.
18 Kulla l‑ilaahaat yiwadduru.
19 Khalli yadkhulu fi karaakiir al‑jibaal
wa yillabbado fi l‑nugaar
min khoof Allah al‑chadiid
wa nuur majdah
wakit yugumm yirajjif al‑ard.
20 Wa fi l‑yoom da,
al‑insaan yidaffig
le l‑faar wa abunrigeeʼ
ilaahaatah hana l‑fudda
wa ilaahaatah hana l‑dahab
al‑sanaʼaahum le yasjud leehum.
21 Wa l‑naas yadkhulu fi karaakiir al‑jibaal
wa chuguug al‑hajar
min khoof Allah al‑chadiid
wa nuur majdah
wakit yugumm yirajjif al‑ard.
22 Khalli ma titwakkalo ale l‑insaan,
hu ma indah cheyy illa l‑nafas al‑foogah
wa ma indah khiima.