Kalaam al‑mahbuub
4
1 Inti jamiile,
ya habiibti,
inti jamiile.
Wa uyuunki misil al‑hamaam
khaadi le laffaahitki.
Wa chaʼarki misil danab al‑faras
al‑naazle min jabal Gilʼaad.
2 Wa sunuunki buyud
misil laban al‑khanam
wa misil al‑riheew al‑barradah al‑matar.
Ayyi sinn be gabiilitha,
ma fi waahide kula wagaʼat.
3 Wa chalaaliifki zurug misil al‑kheet al‑azrag
wa khachumki jamiil.
Wa khuduudki misil al‑rummaanaat
khaadi le laffaahitki.
4 Wa ragabatki tawiile
misil beet al‑muraakhaba hana Dawuud.
Wa ziinitha tichaabih al‑alif darag
al‑muʼallagiin fi l‑beet da
roog baʼad roog.
5 Wa duyuudki misil tiimaan al‑khazaal
al‑raatʼiin fi l‑nuwwaar.
6 Wa gabul buruudit al‑leel
wa wakit al‑dalaam yisidd,
ana namchi le jabal al‑sandal
wa le hajar al‑lubaan.
7 Inti kulliki jamiile,
ya habiibti,
ma indiki ayyi eeb.
8 Taʼaali maʼaayi min Lubnaan,
ya aruusi.
Dalli maʼaayi min jibaalha.
Anzili min raas jabal al‑Amaana
wa min raas jabal Saniir wa Harmuun,
bakaan dungur al‑diidaan
wa margad al‑numuura.
9 Inti malakti galbi,
ya akhti,
ya aruusi.
Inti malakti galbi be nazra waahide
wa be zaytuunaay waahide min ribigki.
10 Hubbiki halu,
ya akhti,
ya aruusi.
Hubbiki halu min asiir al‑inab !
Wa riihitki haluuwe
min kulla itir al‑dunya.
11 Wa chalaaliifki haluwiin min al‑asal,
ya aruusi,
wa lisaanki indah asal wa laban.
Wa riihit khulgaanki
misil sandal Lubnaan.
12 Inti jineene mazruuba,
ya akhti,
ya aruusi.
Inti biir magfuula
wa een almi makhtuuma.
13 Wa nabaat jineenitki rummaan
al‑fawaakihah haluwiin.
Wa fi jineenitki fiyah nabaataat hana dukhkhaan
misil al‑hinne wa l‑naardiin.
14 Aywa,
fi naardiin wa zaʼfaraan
wa dufur wa girfa
wa samukh lubaan
wa hatab sandal wa gamaari
wa kulla dukhkhaan al‑riihtah haluuwe.
15 Wa fiyah een almi fi lubb al‑jineene di
wa hi biir almi al‑saafi
al‑yisiil min jibaal Lubnaan.
Kalaam al‑mahbuuba
16 Gummi,
inti riih al‑munchaakh.
Taʼaali,
inti riih al‑junuub.
Hijji jineenti
wa khalli riihitha al‑haluuwe tisiil.
Wa khalli habiibi yadkhul foogi ana jineentah
wa yaakul min fawaakihha al‑haluwiin.