Gassim maalak le tahfadah
11
1 Armi khubzitak fi l‑almi
achaan yoom waahid talgaaha.
2 Gassim maalak
ale sabʼa aw tamaane bakaan
achaan inta ma taʼarif al‑fasaala
al‑taji fi l‑ard.
3 Wakit al‑sahaab yichiil almi,
al‑matara tusubb fi l‑ard.
Wa kan chadara wagaʼat
ale l‑wati aw ale l‑munchaakh,
fi bakaanha al‑wagaʼat foogah da bas,
hi tagood.
4 Al‑harraati al‑yichiif al‑riih
yaʼarif al‑wakit al‑ma waajib yiteerib.
Wa l‑harraati al‑yichiif al‑sahaab
yaʼarif al‑wakit al‑ma waajib yagtaʼ.
5 Misil inta ma taʼarif wijh al‑riih
wa kikkeef yilkawwano udaam al‑sakhiir fi batun ammah,
khalaas ma tagdar tafham
kikkeef al‑Rabb yisawwi kulla cheyy.
6 Be fajur,
teerib
wa be achiiye,
ma tinjamma.
Achaan inta ma taʼarif weenu al‑yanjah,
da walla daak,
walla kan al‑itneen kulluhum adiiliin.
7 Nuur al‑sabaah halu
wa adiil le l‑uyuun yichiifu al‑harraay.
8 Kan naadum yiʼiich siniin katiiriin,
khalli yafrah be ayyi waahid minhum.
Wa laakin khalli yizzakkar
kadar ayyaam al‑moot aktar.
Wa kulla cheyy al‑yaji zaayil saakit.
Afrah wa fakkir fi l‑hisaab
9 Ya l‑sabi !
Afrah be ayyaam subaak
wa khalli galbak yafrah be ayyaam chabaabak.
Taabiʼ kalaam galbak
wa l‑yichiifuuh uyuunak.
Laakin aʼarif kadar fi kulla l‑cheyy da,
al‑Rabb yihaasibak.
10 Baʼʼid al‑hizin min galbak
wa baʼʼid al‑taʼab min jismak.
Achaan al‑suba wa l‑gudra zaayliin saakit.