29
1 Al‑raajil al‑fakko adaanah
wa gaaʼid yigawwi raasah,
yinrahik marra waahid
wa battaan ma yalga ilaaj.
2 Kan al‑saalih yanjah,
al‑chaʼab yafraho
laakin kan al‑aasi yahkim,
al‑chaʼab yaguntu.
3 Al‑yihibb al‑hikma yifarrih abuuh
wa laakin al‑yamchi le l‑charaamiit yiwaddir maalah.
4 Al‑malik al‑yahkim be l‑adaala yaʼamir baladah
wa l‑yikattir al‑miiri fi chaʼabah yidammirha.
5 Al‑yukhuchch rafiigah be kalaam halu,
da misil yukujj charak tihit rijileenah.
6 Isyaan al‑raajil al‑fasil da misil charak
wa laakin al‑saalih yiragrig wa yafrah.
7 Al‑saalih yaʼarif huguug al‑daʼiifiin
wa laakin al‑aasi ma yidoor yaʼarifhum.
8 Al‑chammaatiin yigawwumu al‑fitne fi l‑hille
wa laakin al‑induhum hikma yibarrudu al‑zaʼal.
9 Kan al‑hakiim yagood fi l‑chariiʼa didd al‑munaafikh
hu ma yalga raaha
achaan al‑munaafikh yazʼal
wa yichchammat.
10 Kattaaliin al‑dimam yakraho al‑raajil al‑tamaam
wa laakin al‑adiiliin yahmu hayaatah.
11 Al‑matmuus yuguul kula kalaam galbah
wa laakin al‑hakiim yisabbit nafsah.
12 Al‑haakim kan yukhutt adaanah le l‑kalaam al‑kidib,
kulla masaaʼiilah yabgo fasliin.
13 Al‑daʼiif wa l‑zaalim humman sawa sawa
achaan Allah bas antaahum al‑haya.
14 Al‑malik al‑yahkim le l‑masaakiin be l‑hagg,
mulkah yuduum ila l‑abad.
15 Al‑darbe wa l‑luwaama yijiibu al‑hikma
wa laakin al‑ma muʼaddab yiʼayyib ammah.
16 Kan kitro al‑aasiyiin,
yaktaro al‑zunuub
wa laakin al‑saalihiin yichiifu wagiʼiinhum.
17 Addib wileedak achaan talga raaha
wa nafsak tinmali be l‑farha.
18 Al‑chaʼab kan ma induhum ruʼya le l‑mustakhbal,
ma induhum huduud.
Wa laakin mabruuk
le l‑yahfado wasaaya Allah.
19 Ma tiʼaddib al‑abid be l‑kalaam bas.
Hu yafham wa laakin ma yitabbig.
20 Akheer tukhutt achamak fi l‑matmuus
min al‑naadum al‑yurudd ajala bala fikir.
21 Ma tijalliʼ abdak min hu sakhayyar
achaan fi l‑akhiir,
hu yaʼasaak.
22 Al‑zaʼʼaal yijiib al‑huraaj
wa siid al‑khadab yikattir al‑fasaala.
23 Al‑yiʼazzim nafsah,
yarmuuh
wa l‑yimaskin nafsah,
yicharrufuuh.
24 Rafiig al‑sarraag adu nafsah.
Yaʼarif al‑ikhaab wa be da kula,
yilabbid al‑jariime.
25 Al‑khoof min al‑insaan,
da misil charak.
Wa laakin Allah yahfad al‑yitwakkal aleyah.
26 Naas katiiriin yifattuchu rida al‑malik
wa laakin Allah bas al‑haakim fi l‑naas.
27 Al‑saalihiin yiharrumu al‑zulum
wa l‑aasiyiin yiharrumu al‑derib al‑adiil.