Amsaal aakhariin hana Suleymaan
25
1 Wa dool kula amsaal Suleymaan al‑lammoohum rujaal Hizkhiiya malik Yahuuza.
2 Majd al‑Rabb gaaʼid fi sirrah
wa majd al‑muluuk gaaʼide fi l‑sirr al‑yakchufuuh.
3 Al‑sama baʼiide wa l‑ard ariide
wa fikirt al‑muluuk kula ma akiide.
4 Amrug al‑wasakh min al‑fudda
wa be da,
al‑sayyaakhi yasnaʼ beeha maaʼuun sameh.
5 Amrug al‑aasi min jamb al‑malik
wa be da,
mulkah yasbit fi l‑adaala.
6 Ma tikoolif giddaam al‑malik
wa ma tiwassif nafsak fi ust al‑kubaaraat.
7 Akheer yuguulu leek :
« Taʼaal foog hini »
min yiʼayyubuuk giddaam al‑masʼuul.
8 Ma tissaʼjal wa tikallim fi l‑chariiʼa
be l‑chaafatah eenak.
Tisawwi chunu
kan fi l‑akhiir khasiimak yikhajjilak ?
9 Hill muchkiltak maʼa jaarak
wa laakin ma tamrug achiir al‑aakhariin.
10 Achaan kan simʼooh,
yiʼayyubuuk.
Wa kalaamak al‑marag min khachmak,
ma yigabbil.
11 Al‑kalaam al‑naafiʼ al‑hajjooh fi waktah,
da misil barraad hana dahab
fi sufra hana fudda.
12 Luwaamit al‑hakiim
fi adaan al‑yasmaʼ al‑kalaam
akheer min chinif aw khaatim
hana dahab saafi.
13 Al‑mursaal al‑indah amaan le l‑yirassuluuh
hu misil al‑buruuda fi wakt al‑gatiʼ.
Hu yibarrid jisim siyaadah.
14 Al‑gaal kalaam wa ma tammaah
misil al‑matar al‑chaal wa ma sabba.
15 Tuul al‑ruuh,
yikhayyir fikir al‑masʼuul
wa l‑kalaam al‑halu,
yaksir al‑adum.
16 Kan ligiit asal,
aakul minnah al‑yitimmak
achaan ma tachbaʼ minnah ziyaada wa baʼadeen yigaddifak.
17 Ma tikattir machiik le beet rafiigak
achaan hu yachbaʼ minnak wa baʼadeen yakrahak.
18 Al‑yachhad be kidib fi akhuuh
hu misil safaroog aw seef aw nuchchaab tariin.
19 Amaan al‑khaayin fi yoom al‑diige
hu misil sinn al‑machguuga wa l‑rijil al‑maksuura.
20 Al‑khine jamb al‑haznaan
misil taglaʼ khalag al‑naadum al‑bardaan
wa tusubb fi l‑uwaara taʼaam.
21 Kan aduuk jiiʼaan,
antiih yaakul
wa kan atchaan,
antiih yachrab.
22 Wa be da,
al‑eeb yakurbah
wa yabga misil jamur al‑sabbooh fi raasah
wa Allah yikaafiik be l‑kheer.
23 Al‑zaggaay al‑taji min al‑wati
tijiib al‑matar
wa l‑lisaan al‑yakchif al‑sirr
yijiib al‑khatar.
24 Akheer taskun wiheedak fi raas beetak
min tiʼiich maʼa l‑mara al‑tikhaalifak.
25 Al‑khabar al‑halu al‑jaayi min baʼiid
misil al‑almi al‑baarid
fi lisaan al‑ayyaan.
26 Kan al‑saalih yikhassid be haal al‑aasi,
da misil rahad almi al‑yatlaf
wa een almi al‑tiʼaffin.
27 Ma waajib taakul al‑asal be katara
wa ma waajib tidoor al‑naas yicharrufuuk fi kulla wakit.
28 Al‑raajil al‑ma yamluk nafsah,
hu misil madiina al‑ma indaha durdur yahmiiha.