16
1 Al‑insaan yichiil al‑niiye fi galbah
wa laakin Allah bas siid al‑kharaar.
2 Kulla khidmit al‑insaan
samha fi uyuunah
wa laakin al‑fi galib al‑insaan,
Allah bas yawzinah.
3 Khutt khidimtak fi iideen Allah
wa kulla cheyy al‑titmannaah yilhaggag.
4 Allah khalag kulla cheyy le hadaf
hatta al‑aasi kula khalagah le yoom al‑ikhaab.
5 Allah harram al‑istikbaar.
Akiid siidah ma yajʼalooh bari.
6 Siid al‑kheer wa l‑amaan,
khataayah yisaamuhuuh
wa l‑khoof min Allah
yibaʼʼid min al‑fasaala.
7 Wakit Allah yarda be amal al‑insaan,
yisahhil leyah al‑salaam maʼa l‑udwaan.
8 Akheer talga chiyya be l‑adaala
min talga katiir bala hagg.
9 Galb al‑insaan
yifakkir fi l‑derib al‑yichiilah
wa laakin Allah bas
yuguud khatwaatah.
Al‑malik wa l‑adaala
10 Kalaam min Allah fi khachum al‑malik.
Fi l‑chariiʼa,
lisaanah ma yimiil.
11 Al‑miizaan al‑aadil,
Allah yarda beyah
wa l‑mikyaal al‑adiil,
hu bas sabbatah.
12 Al‑malik yiharrim amal al‑charr
achaan be l‑adaala bas,
hu yisabbit mulkah.
13 Al‑malik yarda be l‑kalaam al‑sahiih
wa yihibb al‑yikallim leyah be l‑hagg.
14 Khadab al‑malik yijiib al‑moot
wa l‑raajil al‑hakiim yisabbirah.
15 Farah al‑malik yijiib al‑haya
wa ridaayah misil sahaab al‑richaach.
Kikkeef tiʼiich maʼa l‑naas
16 Kan talga hikma,
da akheer min talga dahab
wa kan talga fihim,
da akheer min talga fudda.
17 Derib al‑naas al‑adiiliin
yibaʼʼid min al‑fasaala.
Al‑hafad derbah,
hafad nafsah.
18 Gabul al‑kharaab,
al‑istikbaar
wa gabul al‑wagaʼaan,
al‑kibriya.
19 Kan timaskin nafsak
wa tagood maʼa l‑masaakiin,
da akheer min tigassim al‑khaniime
maʼa l‑mustakbiriin.
20 Al‑yifakkir adiil fi l‑wasiiye yalga al‑kheer
wa mabruuk le l‑yitwakkal ale Allah.
21 Al‑galbah hakiim yinaaduuh faahim
wa l‑lisaan al‑halu yanti al‑ilim.
22 Agul adiil misil een almi,
tijiib al‑haya le siidha.
Wa laakin nifaakh al‑munaafikh
yiʼaddibah.
23 Galb al‑hakiim yiʼaddil kalaam khachmah
wa lisaanah yanti al‑ilim.
24 Al‑kalaam al‑halu misil al‑asal,
halu fi l‑lisaan wa chifa le l‑jisim.
25 Fiyah derib yinchaaf fi uyuunak adiil
wa laakin fi aakhirah,
talga al‑moot.
26 Al‑juuʼ yilizz al‑khaddaam fi l‑khidme
achaan khachmah yidoor yaakul lugma.
27 Al‑ma naafiʼ yijiib al‑charr
wa kalaamah haarr misil al‑naar.
28 Al‑kaddaab yazraʼ al‑khilaaf
wa l‑yangul al‑kalaam yifarrig al‑rufgaan.
29 Siid al‑unuf yukhuchch rafiigah
wa fi l‑tariig al‑fasil yuguudah.
30 Al‑yakhmiz be eenah yanwi fasaadah
wa l‑yiʼaddi challuuftah yisawwi al‑fasaala.
31 Al‑cheeb misil taaj charaf fi raas siidah,
ma yinlagi illa be l‑amal al‑saalih al‑daayim.
32 Al‑ma yazʼal ajala akheer min al‑faaris
wa l‑yamluk nafsah akheer min al‑yaglaʼ al‑madiina.
33 Al‑yikhattit yusubb al‑wadeʼ
wa laakin al‑yikharrir,
hu Allah.