Wasiiye le kabiir al‑khannaayiin : Le yikhannuuh be jigindiiye, le Asaaf
81
1 Iitu min al‑farah
le Ilaahna,
al‑hu gudritna !
Afraho be Ilaah Yaakhuub.
2 Arfaʼo hiss al‑musiikha
wa adurbu al‑tambal
wa l‑jigindiiye al‑haluuwe
wa amsibeybe.
3 Adurbu al‑buug
fi awwal yoom fi l‑chahar
wa fi ust al‑chahar fi yoom iidna.
4 Wa da yukuun chart le Bani Israaʼiil
wa gaanuun min Ilaah Yaakhuub.
5 Allah chaal kharaar fi zurriiyit Yuusuf
wakit hu gamma didd Masir.
Ana simiʼt hiss al‑ma iriftah
wa l‑kalaam da yuguul :
6 « Ana chilt al‑tagala min kitfak
wa iideenak nazzalo al‑soosal.
7 Wakit inta gaaʼid tasrakh min al‑taʼab,
ana khallastak
wa raddeet leek be sirr fi l‑raʼad
wa jarrabtak jamb almi Mariiba.*
Wagfa.
8 « Ya chaʼabi,
asmaʼooni adiil !
Ya Bani Israaʼiil,
nihazzirku kan tasmaʼooni.
9 Khalli ma yinlagi fi bakaanku ilaah ajnabi
wa ma tasjudu giddaam ilaah aakhar.
10 Ana bas Allah Ilaahku
al‑maragtuku min balad Masir.
Aftaho khuchuumku kubaar
wa ana namlaahum.
11 « Laakin chaʼabi ma simʼo hissi
wa Bani Israaʼiil ma dawwarooni.
12 Wa khalaas,
ana khalleethum
be ruuseehum al‑gawiyiin
wa macho hasab niiyithum.
13 « Aywa,
kan chaʼabi simʼooni
wa Bani Israaʼiil taabaʼo derbi,
14 ana be surʼa niʼayyib udwaanhum
wa narfaʼ iidi didd khusmaanhum.
15 « Al‑yakraho Allah yinhaano
wa ikhaabhum yukuun daayman wa ila l‑abad.
16 Wa niʼakkil Bani Israaʼiil be gameh adiil
wa narwiihum be asal al‑kadaade. »