Taʼliim min Asaaf
74
1 Ya Rabb,
maala khalleetna ila l‑abad ?
Wa maala khadabak yahrigna,
aniina khanamak al‑tasrah beena ?
2 Azzakkar mujtamaʼak al‑inta azaltah min zamaan
wa l‑gabiila al‑fadeetha le tukuun warasatak.
Azzakkar jabal Sahyuun,
al‑bakaan al‑inta sawweetah maskanak.
3 Amchi chiif al‑damaar al‑kaamil
fi beetak al‑mukhaddas,
al‑adu fatfat kulla cheyy.
4 Udwaanak ragrago
fi lubb al‑bakaan al‑nilimmu maʼaak foogah
wa hinaak khatto alaamithum.
5 Humman bigo misil al‑yarfaʼo faashum
le yagtaʼo chadar al‑khaaba.
6 Humman kassaro suwar manguuchiin hana khachab
wa daggoohum be faas wa mitraga.
7 Wa dasso naar fi beetak al‑mukhaddas.
Aywa,
al‑bakaan al‑khatteet foogah usmak,
ramooh wa ma jaʼalooh mukhaddas.
8 Wa gaalo ambeenaathum :
« Yalla !
Nidammuruuhum kulluhum ! »
Wa fi l‑balad,
harrago kulla l‑bakaanaat
al‑nilimmu fooghum maʼa l‑Rabb.
9 Aniina ma chifna battaan alaamaat al‑Rabb
wa ma fi anbiya.
Wa fi usutna,
ma fi naadum
al‑yaʼarif al‑cheyy da yagood le mata.
10 Lahaddi mata,
ya Rabb,
al‑mudaayigiin yiʼayyuruuk ?
Al‑udwaan yahguru usmak daayman walla ?
11 Maala karabt iidak ?
Maala karabt zeenaaytak ?
Arfaʼha wa kammilhum !
12 Ya Rabb !
Inta maliki min zamaan
wa inta bas al‑tijiib al‑naja fi l‑balad.
13 Wa be gudurtak,
inta chaggeet al‑bahar itneen
wa fi l‑almi,
kassart raas khuul al‑bahar.
14 Aywa,
inta rihikt ruuse Luyaataan
wa sawweetah akil le l‑chaʼab
al‑yaskunu fi l‑sahara.
15 Inta bas jarreet uyuun almi wa wudyaan
wa inta bas yabbast buhuur al‑ma yikammulu.
16 Al‑leel wa l‑nahaar kula
humman hineeyak inta.
Wa l‑gamar wa l‑harraay kula,
inta khatteet ayyi waahid fi bakaanah.
17 Inta bas al‑khatteet huduud al‑ard
wa l‑seef wa l‑chite kula,
inta bas sawweethum.
18 Ya Allah,
azzakkar !
Al‑adu ayyarak
wa l‑chaʼab al‑matmuus hagar usmak !
19 Ma tisallim chaʼabak le l‑adu
misil gimriiye al‑tantiiha le l‑haywaanaat.
Wa ma tansa daayman
hayaat masaakiinak.
20 Fakkir fi l‑muʼaahada
achaan al‑balad malaane be bakaanaat dulum
wa dool bas bakaanaat al‑unuf.
21 Khalli al‑mazluumiin ma yakhjalo
wa khalli al‑masaakiin wa l‑daʼiifiin yachkuru usmak.
22 Gumm,
ya Rabb,
daafiʼ le hadafak
wa fakkir fi l‑muʼyaar al‑jaayi leek
daayman min al‑mataamiis.
23 Ma tansa harakat udwaanak
wa aayit al‑yugummu diddak be chidde.