Wasiiye le kabiir al‑khannaayiin : Le yikhannuuh be hiss al‑suffaara, taʼliim min Dawuud
53
1 Al‑mataamiis gaalo fi nufuushum :
« Ma fi Ilaah ! »
Humman tallafo wa sawwo amal muharram
wa ma fi naadum al‑yisawwi al‑kheer.
2 Min al‑sama,
al‑Rabb chaaf Bani Adam
le yichiif kan naadum waahid minhum aagil
al‑yifattichah hu al‑Rabb.
3 Kulluhum sawa baʼʼado wa waddaro,
ma fi naadum al‑yisawwi al‑kheer
wa la waahid.
4 Al‑yisawwu al‑zulum
ma induhum al‑maʼrafa walla ?
Humman yaakulu chaʼabi misil yaakulu al‑khubza
wa ma yachhado al‑Rabb.
5 Wa daahu humman gaaʼidiin yarjufu
fi bakaan al‑ma waajib yarjufu foogah
achaan al‑Rabb chattat udaam
al‑naas al‑yihaasuruuku intu chaʼabah.
Wa intu tiʼayyubuuhum
achaan al‑Rabb abaahum.
6 Yaatu min Sahyuun
yanti al‑naja le Israaʼiil ?
Wakit al‑Rabb yigabbil chaʼabah min al‑khurba,
zurriiyit Yaakhuub yinbastu
wa zurriiyit Israaʼiil yafraho.