Taʼliim min Dawuud
32
1 Mabruuk le l‑naadum
al‑Allah marag minnah isyaanah
wa khafar leyah zunuubah.
2 Mabruuk le l‑naadum
al‑Allah ma yajʼalah khaati
wa ma indah khiyaana fi galbah.
3 Wakit ma aʼtaraft be zanbi,
al‑wajaʼ zaad fi udaami
wa ganatt tuul al‑yoom.
4 Achaan tuul al‑leel wa l‑nahaar,
nihiss be tugul iidak foogi
wa bigiit misil al‑gechch al‑yaabis,
gudra ma indi.
Wagfa.
5 Wa khalaas,
ana kallamt leek be zanbi
wa ma labbadt khataayi.
Wa gult :
« Ya Rabb,
ana aʼtaraft be isyaani. »
Wa inta,
ya Allah,
khafart leyi khataayi wa zanbi.
Wagfa.
6 Achaan da,
kulla muʼmin waajib yasʼalak fi wakt al‑diige
wa be da,
hu yanja akiid min al‑kharag al‑chadiid.
7 Inta maljaʼi wa fi l‑diige tahmiini
wa be khine al‑naja,
maleet galbi.
Wagfa.
8 Wa Allah gaal :
« Naʼam.
Ana niʼallimak
wa niwassifak al‑tariig al‑tichiilah
wa niwassiik wa nifakkir fiik.
9 Ma tabga misil al‑juwaad aw al‑bakhal al‑ma yafham
wa ma yagiif illa be l‑sariime wa l‑lijaam.
Wa balaahum ma yatbaʼak. »
10 Al‑azaab al‑ziyaada yarja al‑aasi
wa laakin al‑indah fi Allah damaan yalga al‑amaan.
11 Afraho be Allah wa khannu,
ya l‑saalihiin !
Wa wassufu farahku,
ya l‑aadiliin !