Azamat amal al‑Rabb
37
1 Wa fi chaan da,
galbi rajaf
lahaddi misil yamrug min sadri.
2 Asmaʼo hissah al‑misil al‑raʼad !
Asmaʼo al‑dagdaag al‑chadiid al‑yamrug min khachmah !
3 Al‑Rabb yatlig barraagtah tihit kulla l‑sama
wa yirassilha lahaddi aakhir al‑ard.
4 Wa baʼad da,
hissah al‑mukhiif yamrug
wa hiss majdah yabga misil raʼad.
Wa barraagtah ma tagiif
wakit hissah gaaʼid yinsamiʼ.
5 Hiss al‑Rabb yidagdig wa yikhawwif
wa yisawwi ajaayib kubaar al‑aniina ma nafhamoohum.
6 Hu yuguul le l‑talaj :
« Daffig fi l‑ard ! »
Wa yuguul le l‑tchaktchaaka :
« Abge matar !
Aywa,
subbi matar chadiid ! »
7 Wa fi l‑wakit da bas,
yiwaggif khidmit kulla insaan
achaan kulluhum yaʼarfu
da amalah hu.
8 Khalaas,
ayyi haywaan yamchi le nugurtah
wa yargud fi maskanah.
9 Riih al‑zaggaay taji min al‑junuub
wa l‑barid yaji min al‑munchaakh.
10 Nafkhat al‑Rabb tikawwin al‑talaj
wa tijammid almi al‑bahar.
11 Hu yamla al‑sahaab be buruuda
wa yichattit al‑sahaab be barraaga jaay wa jaay.
12 Hu bas al‑yiliff al‑sahaab
le yitabbig kulla awaamirah fi kulla wijh al‑ard.
13 Wa yirassilhum fi l‑ard le yiʼaakhib al‑naas
aw yibayyin rahmatah.
Suʼaal Aliihu le Ayyuub
14 Ya Ayyuub,
khutt adaanak le l‑kalaam da !
Askut wa chiif ajaayib al‑Rabb !
15 Inta taʼarif kikkeef al‑Rabb yahkim al‑sahaab
wa kikkeef al‑sahaab yisawwi al‑barraaga walla ?
16 Wa inta taʼarif kikkeef al‑Rabb khatta al‑sahaab
al‑mutaharrik been al‑sama wa l‑ard ?
Wa taʼarif ajaayib al‑Rabb
wa ilmah al‑tamaama walla ?
17 Wakit al‑ard saabte tihit riih al‑junuub,
khulgaanak yabgo haamiyiin min hamuuha.
18 Al‑Rabb khalag al‑sahaab wa gawwaah
misil amchawwaafa hint hadiid magtuuʼ.
Wa inta tagdar tisawwi mislah ?
19 Khalaas,
allimna
al‑waajib nuguuluuh le l‑Rabb.
Ma naʼarfu cheyy
wa gaaʼidiin fi l‑dalaam.
20 Wakit nikallim,
waajib nikhabbir al‑Rabb walla ?
Misil da,
naadum ma yitmanna
le nafsah al‑halaak walla ?
21 Ma nagdaro nichiifu deyy al‑harraay
fi lubb al‑sahaab al‑katiir.
Wa laakin baʼad al‑riih tichiil al‑sahaab da,
nuurha yibiin.
22 Min al‑munchaakh yaji deyy misil al‑dahab
wa nuur jalaal al‑Rabb yabhatna.
23 Hu al‑Gaadir,
ma nagdaro nigarrubu leyah
wa khuwwatah kabiire.
Wa indah al‑hagg wa l‑adaala be katara
wa laakin ma yazlum insaan.
24 Fi chaan da,
waajib al‑naas
yakhaafo minnah.
Wa laakin hu ma lammaah
be l‑yisawwu nufuushum hakiimiin.