Alifaaz taham Ayyuub
22
1 Wa Alifaaz al‑min balad Teemaan chaal al‑kalaam wa gaal :
2 Hal al‑insaan naafiʼ le l‑Rabb walla ?
Achaan al‑insaan kan hakiim kula,
yanfaʼ nafsah bas.
3 Hal adaaltak tifarrih al‑Gaadir walla ?
Wa kan inta kaamil fi derbak kula,
hu yalga minnak chunu ?
4 Hal be sabab takhwaak,
hu yichaariʼak wa yiʼaakhibak walla ?
5 La !
Charrak ma bigi katiir walla ?
Wa zunuubak ma faato al‑hadd walla ?
6 Achaan bala sabab,
inta chilt damaan min akhwaanak
wa galaʼt khulgaanhum
wa khalleethum aryaaniin.
7 Inta ma anteet almi le l‑atchaan
wa la anteet akil le l‑jiiʼaan.
8 Al‑ard le siid al‑unuf
wa l‑mahbuub yaskun foogha.
9 Al‑araamil,
inta tatrudhin iideehin yaabsiin
wa zalamt al‑atiim al‑halkaan.
10 Wa fi chaan da,
al‑churukka hawwagook
wa l‑ruʼub karabak be khafla.
11 Inta ma tichiif al‑dalaam
wa la l‑almi al‑katiir
al‑gaaʼid yikhattiik walla ?
12 Al‑Rabb ma foog min al‑sama walla ?
Wa inta !
Chiif al‑nujuum humman aaliyiin !
13 Wa fi chaan da,
inta gult :
« Al‑Rabb yaʼarif chunu ?
Hu yagdar yihaakimna
min al‑dalaam al‑haalik walla ?
14 Wa l‑sahaab misil khita takhiin
yadharah ma yichiif
wakit yamchi
wa yihawwig al‑samaawaat. »
15 Hal inta tidoor tahfad al‑derib al‑zamaan,
al‑chaalooh al‑naas al‑fasliin walla ?
16 Humman dool maato gabul wakithum
misil beet al‑almi akal asaasah.
17 Humman gaalo le l‑Rabb :
« Baʼʼid minnina !
Inta al‑Gaadir ma tagdar
tisawwi leena cheyy ! »
18 Wa laakin hu bas
al‑mala buyuuthum be l‑kheer.
Wa choorit al‑aasiyiin di,
hi baʼiide minni.
19 Al‑saalihiin yichiifu kharaabhum wa yafraho
wa l‑bari yichchammat leehum.
20 « Al‑wagaf diddina ma addammar walla ?
Wa l‑naar ma akalat khumaamhum walla ? »
Waajib Ayyuub yigabbil le l‑Rabb
21 Sawwi suluh maʼa l‑Rabb
wa talga al‑salaam.
Wa be da,
al‑halu yigabbil
leek battaan.
22 Asmaʼ taʼliim al‑Rabb
wa akrub kalaamah fi galbak.
23 Gabbil le l‑Gaadir wa talga al‑sabaat
wa baʼʼid al‑zulum min kheemtak.
24 Armi dahabak fi l‑turaab
wa dahab Ufiir fi ust hashas al‑waadi.
25 Wa khalaas,
al‑Gaadir yabga dahabak
wa yabga leek kiimaan hana fudda.
26 Wa be da,
al‑Gaadir yabga farhitak
wa ale l‑Rabb,
tarfaʼ wijhak battaan.
27 Inta tachhadah wa hu yasmaʼak
wa tihaggig nazrak.
28 Wa kan chilt kharaar kula,
yilhaggag leek
wa l‑nuur yinawwir derbak.
29 Wa kan naas waahidiin yilmaskano,
inta tuguul :
« Gummu foog ! »
Achaan al‑Rabb yinajji al‑miskiin.
30 Aywa,
hu yinajji hatta al‑ma bari kula
wa hu kula yanja be sabab iideenak al‑saalimiin.