Tajribat Ayyuub fi jismah
2
1 Wa yoom waahid,
malaaʼikat al‑Rabb macho le yigaabulu Allah wa Ibliis kula macha maʼaahum le mugaabalat Allah.
2 Wa Allah gaal le Ibliis :
« Inta jaayi min ween ?
» Wa Ibliis radda le Allah wa gaal :
« Laffeet fi kulla l‑ard wa rukht foogha. »
3 Wa Allah saʼalah le Ibliis wa gaal leyah :
« Inta ma chift abdi Ayyuub walla ?
Ma fi naadum mislah fi l‑ard.
Hu naadum kaamil wa adiil wa khaayif minni ana al‑Rabb wa mubaʼʼid min al‑fasaala.
Wa battaan munkarib gawi fi kamaalah hatta kan inta lazzeetni diddah le nidammirah bala sabab kula. »
4 Wa Ibliis radda le Allah wa gaal :
« Aywa !
Al‑nafis aziize !
Al‑insaan yanti kulla cheyy al‑indah le yinajji hayaatah
5 laakin kan inta tarfaʼ iidak wa tadurbah min lahamah lahaddi udaamah,
ana muʼakkid kadar hu yaʼasaak giddaamak. »
6 Wa Allah gaal le Ibliis :
« Daahu !
Hu fi iidak laakin fakkir fi hayaatah. »
7 Wa wakit Ibliis marag min giddaam Allah,
darab Ayyuub be jarab min raasah lahaddi rijileenah.
8 Wa khalaas,
Ayyuub chaal chigfe wa gaaʼid yuhukk beeha wa gaʼad fi l‑rumaad.
9 Wa martah gaalat leyah :
« Maalak lahaddi hassaʼ inta munkarib gawi fi kamaalak ?
Aʼasa al‑Rabb wa muut ! »
10 Wa Ayyuub gaal leeha :
« Inti gaaʼide tihajji misil matmuusa.
Kan al‑kheer al‑nalgooh yaji leena min al‑Rabb,
maala ma nakhbalo al‑charr al‑jaaye minnah ?
» Wa fi kulla l‑cheyy da,
Ayyuub ma aznab be kalaamah.
Rufgaan Ayyuub al‑talaata
11 Wa rufgaan talaata hana Ayyuub simʼo be kulla l‑bala al‑ja foogah.
Wa ayyi waahid ja min baladah wa humman Alifaaz min Teemaan wa Bildad min Chuuha wa Suufar min Naʼama.
Wa humman alwaaʼado le yaju sawa le yikalwudu leyah wa yisabburuuh.
12 Wa wakit chaafooh min baʼiid,
ma irfooh.
Wa gammo yabku chadiid.
Wa ayyi waahid charrat jallaabiiytah wa sabba rumaad fi raasah min al‑hizin.
13 Wa humman gaʼado maʼaayah fi l‑turaab sabʼa nahaar wa sabʼa leel.
Wa naadum gaal kilme ke,
ma fiih.
Achaan humman chaafo taʼabah da chadiid bilheen.