Al‑Yahuud yidaafuʼu le nufuushum
8
1 Wa fi nafs al‑yoom da,
al‑malik Achawiruuch antaaha le l‑malika kulla khumaam Hamaan adu al‑Yahuud.
Wa Mardakaay ja bakaan al‑malik achaan Astiir hajjat le l‑malik kadar hu min ahalha.
2 Wa l‑malik salla khaatmah al‑chaalah min Hamaan wa antaah le Mardakaay.
Wa Astiir darrajat Mardakaay muraakhib fi maal Hamaan.
3 Wa Astiir machat battaan le l‑malik wa wagaʼat tihit rijileenah be baki wa chahadatah achaan yiwaggif al‑fasaala wa l‑khitta al‑khattatha Hamaan al‑min zurriiyit Agaag didd al‑Yahuud.
4 Wa l‑malik madda le Astiir asaatah al‑dahbiiye al‑fi iidah.
Wa khalaas,
Astiir gammat wa wagafat giddaam al‑malik.
5 Wa gaalat :
« Kan bigi leek adiil,
ya l‑malik,
wa kan nalga minnak rida wa kan al‑cheyy da yiwaafig le l‑malik wa kan ana ajabtah,
khalli yaktubu jawaabaat le yibattulu jawaabaat khittat Hamaan wileed Hamdaata al‑min zurriiyit Agaag.
Wa l‑jawaabaat dool,
hu katabaahum le yidammuru al‑Yahuud fi kulla wulaayaat al‑mamlaka.
6 Wa kikkeef nagdar nahmal wa nichiif al‑fasaala al‑talhag chaʼabi ?
Wa kikkeef nagdar nahmal wa nichiif damaar ahali ? »
7 Wa l‑malik Achawiruuch radda le l‑malika Astiir wa le Mardakaay al‑Yahuudi wa gaal :
« Daahu ana anteet kulla maal Hamaan le Astiir wa hu kamaan,
allagooh fi raas al‑uud achaan hu dawwar yidammir al‑Yahuud.
8 Hassaʼ da,
aktubu le l‑Yahuud be usum al‑malik misil intu tidooruuh wa akhtumuuh be khitim al‑malik achaan al‑maktuub al‑katabooh be usum al‑malik wa khatamooh be khitim al‑malik,
ma yagdaro yibattuluuh. »
9 Wa fi nafs al‑yoom yaʼni fi yoom 23 hana l‑chahar al‑usmah Siiwaan,
naado kuttaab al‑malik.
Wa be amur Mardakaay,
humman katabo jawaabaat le l‑Yahuud wa l‑muhaafiziin wa l‑hukkaam wa masaaʼiil al‑wulaayaat al‑gaaʼidiin fi 127 wulaaya min balad al‑Hind lahaddi balad al‑Habacha.
Wa katabo le ayyi wulaaya hasab kitaabitha wa le ayyi chaʼab hasab lukhkhitah wa le l‑Yahuud hasab kitaabithum wa lukhkhithum.
10 Wa khalaas,
humman katabo be usum al‑malik Achawiruuch wa khatamooh be khitim al‑malik.
Wa rassalo al‑jawaabaat dool maʼa siyaad kheel al‑jarraayiin al‑maʼzuuliin le khidmit al‑malik.
11 Wa daahu kalaam al‑jawaab :
Al‑malik anta izin le l‑Yahuud fi kulla l‑hillaal achaan yilimmu le yidaafuʼu le nufuushum wa le yidammuru wa yaktulu wa yikammulu kulla l‑duyuuch al‑yaju min ayyi wulaaya wa min ayyi chaʼab wa yahjumuuhum.
Wa yisawwu nafs al‑cheyy fi iyaalhum wa awiinhum kula wa yagdaro yanhaboohum wa yaksabo khumaamhum.
12 Wa da yukuun fi yoom waahid bas fi kulla wulaayaat al‑malik Achawiruuch yaʼni fi yoom 13 hana chahri 12 al‑usmah Adaar.
13 Wa nuskha al‑jawaab da,
yanchuruuha misil gaanuun fi ayyi wulaaya wa yiballukhuuha le kulla l‑chuʼuub achaan yaʼarfu kadar fi l‑yoom al‑muhaddad da,
kulla l‑Yahuud yabgo jaahiziin le yichiilu al‑taar fi udwaanhum.
14 Wa be amur al‑malik,
siyaad al‑kheel al‑maʼzuuliin le khidmit al‑malik rikbo al‑kheel wa macho be surʼa wa ballakho al‑gaanuun da fi madiinat Chuucha al‑gawiiye.
15 Wa Mardakaay marag min gasir al‑malik laabis khalag hana muluuk loonah zahri wa abyad wa jallaabiiye min gumaach abyad wa garadi wa taaj kabiir hana dahab fi raasah.
Wa kulla naas madiinat Chuucha gaaʼidiin yiʼiitu min al‑farha.
16 Wa kan le l‑Yahuud kamaan,
al‑yoom da bigi leehum yoom hana nuur wa farha wa suruur wa charaf.
17 Wa fi ayyi wulaaya wa ayyi madiina wa kulli bakaan al‑wassal foogah kharaar al‑malik wa gaanuunah,
bigat farha wa suruur fi ust al‑Yahuud wa yoom halu hana aazuuma.
Wa katiiriin min naas al‑balad kula sawwo nufuushum Yahuud achaan khaayfiin min al‑Yahuud.