Astiir machat bakaan al‑malik
5
1 Wa wakit al‑talaata yoom kammalo khalaas,
Astiir libsat khulgaanha hana l‑mamlaka wa machat wagafat fi l‑fadaay al‑dakhlaaniiye hana gasir al‑malik al‑mugaabil al‑beet.
Wa l‑malik gaaʼid fi kursiih hana l‑muluk fi l‑gasir mugaabil madkhal al‑beet.
2 Wa wakit al‑malik chaaf Astiir al‑malika waagfe fi l‑fadaay,
hi ligat ridaayah.
Wa hu madda le Astiir asaatah al‑dahbiiye al‑fi iidah wa Astiir garrabat wa limsat raas al‑asa.
3 Wa l‑malik gaal leeha :
« Maalki,
ya Astiir al‑malika ?
Chunu munaaki ?
Lahaddi kan nuss mamlakati kula,
nantiih leeki. »
4 Wa Astiir gaalat leyah :
« Kan bigi leek adiil,
ya l‑malik,
khalli taji maʼa Hamaan fi l‑aazuuma al‑ana jahhaztaha leyah al‑yoom. »
5 Wa khalaas,
al‑malik gaal :
« Amchu ajala khabburu Hamaan kadar namchu nahdaro fi aazuumit Astiir. »
Wa l‑malik macha maʼa Hamaan le l‑aazuuma al‑sawwatha Astiir.
6 Wa fi l‑aazuuma,
al‑malik gaal le Astiir :
« Chunu talabki ?
Nantiih leeki.
Wa chunu munaaki ?
Lahaddi kan nuss mamlakati kula,
nantiih leeki. »
7 Wa Astiir raddat wa gaalat :
« Talabi wa munaayi,
8 ya l‑malik,
daahu.
Kan nalga minnak al‑rida wa kan bigi leek adiil,
akhbal talabi wa haggig munaayi.
Khalli taji maʼa Hamaan ambaakir fi l‑aazuuma al‑nisawwiiha leeku.
Wa be da,
ambaakir nisawwi hasab kalaamak,
ya l‑malik,
wa nurudd le suʼaalak. »
Hamaan jahhaz le yaktul Mardakaay
9 Wa fi l‑yoom da,
Hamaan marag mabsuut wa farhaan.
Wa laakin wakit hu chaaf fi khachum baab gasir al‑malik kadar Mardakaay ma yugumm wa la yarjif giddaamah,
khalaas Hamaan ziʼil zaʼal chadiid didd Mardakaay.
10 Wa Hamaan sabbat nafsah wa macha beetah.
Wa rassal naadaahum le rufgaanah wa martah Zarach.
11 Wa Hamaan hajja leehum be khunaayah al‑katiir wa katarat awlaadah wa be kikkeef al‑malik charrafah wa darrajah kabiir fi raas kulla masaaʼiilah wa khaddaamiinah.
12 Wa Hamaan gaal battaan :
« Wa ziyaada min da,
Astiir al‑malika naadatni illa ana maʼa l‑malik fi l‑aazuuma al‑hi jahhazatha.
Wa battaan ambaakir kula,
ana bas al‑maʼzuum maʼa l‑malik.
13 Wa laakin kulla l‑cheyy da ma yitimm leyi wakit daayman nichiif Mardakaay al‑Yahuudi gaaʼid fi khachum baab gasir al‑malik ! »
14 Wa khalaas,
martah Zarach wa kulla rufgaanah gaalo leyah :
« Sawwi leek uud tuulah 50 duraaʼ wa ambaakir fajur,
atlub min al‑malik khalli yiʼallugu foogah Mardakaay.
Wa baʼad da,
inta tamchi farhaan fi l‑aazuuma maʼa l‑malik.
» Wa l‑kalaam da bigi halu le Hamaan wa gamma jahhaz leyah al‑uud.