Khidmit Nahamya
13
1 Wa fi l‑yoom al‑garo le l‑chaʼab min kitaab Muusa,
ligo bakaan al‑buguul Bani Ammuun wa l‑Muwaabiyiin abadan ma yilkhalbato maʼa jamaaʼat al‑Rabb.
2 Achaan zamaan,
wakit Bani Israaʼiil dawwaro yuchuggu baladhum,
humman ma laagoohum wa la antoohum almi wa la akil.
Wa battaan al‑Muwaabiyiin ajjaro Balʼaam al‑chawwaafi achaan yalʼan Bani Israaʼiil laakin Ilaahna baddal al‑laʼana di be baraka.*
3 Wa wakit Bani Israaʼiil simʼo al‑kalaam da min al‑Tawraat,
gammo tarado kulla ajnabi min usuthum.
4‑5 Wa gubbaal yoom al‑iid da,
Alyaachib bas masʼuul min al‑makhaazin al‑fi beet Allah.
Wa l‑makhaazin dool bas al‑bukhuttu fooghum al‑hadaaya wa l‑samukh al‑muʼattar wa l‑muʼiddaat al‑yakhdumu beehum fi beet Allah wa uchuur al‑gameh wa l‑khamar wa l‑dihin.
Wa l‑khumaam da yantuuh le l‑Laawiyiin wa le l‑khannaayiin wa le hurraas al‑biibaan wa yantu minnah le rujaal al‑diin kula.
Wa Alyaachib da,
hu nasiibah le Tuubiiya al‑min Bani Ammuun wa achaan da,
hu anta izin le Tuubiiya yukhutt khumaamah fi makhazan waahid kabiir min al‑makhaazin dool.
6 Wa fi l‑wakit Alyaachib gaaʼid foogah masʼuul min al‑makhaazin da,
ana ma fiini fi Madiinat al‑Khudus achaan fi l‑sana al‑foogha Artahachta malik Baabil indah 32 sana fi mulkah,
ana gabbalt leyah hinaak.
Wa gaʼadt maʼaayah wa wakit nidoor nigabbil kamaan,
chilt minnah izin
7 wa gabbalt fi Madiinat al‑Khudus.
Wa wakit jiit,
irift kadar Alyaachib sawwa cheyy fasil achaan anta le Tuubiiya makhazan min al‑makhaazin al‑gaaʼidiin fi fadaayit beet Allah.
8 Al‑khabar da zaʼʼalaani zaʼal chadiid wa anteet izin achaan yidaffugu khumaam Tuubiiya barra min al‑makhazan.
9 Wa gult leehum yitahhuru al‑makhaazin wa yigabbulu yidissu fooghum al‑khumaam al‑yakhdumu beyah fi beet Allah wa l‑hadaaya wa l‑samukh al‑muʼattar.
10 Wa battaan simiʼt kadar al‑naas ma anto al‑waajib yantuuh le l‑Laawiyiin wa achaan da,
al‑naas al‑waajib yakhdumu,
yaʼni al‑Laawiyiin wa l‑khannaayiin,
kulluhum khallo al‑khidme wa gabbalo fi ziraaʼithum.
11 Wa ana harajt al‑masʼuuliin wa gult leehum :
« Maala khalleetu beet Allah ? »
Wa battaan lammeet al‑Laawiyiin wa l‑khannaayiin wa gabbaltuhum ayyi waahid fi khidimtah.
12 Wa misil da,
naas Yahuuza kulluhum jaabo battaan uchuur al‑gameh wa l‑khamar wa l‑dihin wa khattoohum fi l‑makhaazin hana beet Allah.
13 Wa ana kallaft be masʼuuliiyit al‑makhaazin Chalamya raajil al‑diin wa Saduukh al‑kaatib wa Fadaaya al‑min al‑Laawiyiin wa Hanaan wileed Zakkuur wileed Mattanya.
Wa azalt al‑naas dool achaan al‑naas induhum fooghum amaan.
Wa misil da,
humman yigassumu al‑khumaam le akhwaanhum.
14 Ya Ilaahi,
fakkir foogi !
Ma tansa al‑amal al‑ana sawweetah be amaan le beetak wa le khidimtah.
15 Wa fi l‑wakit da,
ana chift fi balad Yahuuza naas waahidiin yaʼasuru inabhum fi yoom al‑sabt.
Wa aakhariin bichiddu gameh fi hamiirhum wa bijiibuuh aw bijiibu khamar hana inab aw al‑inab zaatah aw tiin aw ayyi budaaʼa aakhara fi Madiinat al‑Khudus fi yoom al‑sabt.
Wa misil da,
ana hazzartuhum achaan ma yibiiʼu khumaamhum fi yoom al‑sabt.
16 Wa l‑naas al‑min balad Suur al‑saakniin fi Madiinat al‑Khudus,
humman kula bijiibu huut wa budaaʼa aakhara achaan yisaawugu fi Madiinat al‑Khudus wa fi kulla balad Yahuuza fi yoom al‑sabt.
17 Wa ana harajt kubaaraat Yahuuza wa gult leehum :
« Chunu al‑fasaala al‑gaaʼidiin tisawwuuha di ?
Maala ma tihtarumu yoom al‑sabt ?
18 Juduudku kula ma sawwo nafs al‑fasaala walla ?
Wa achaan da Ilaahna jaab leena al‑diige di,
leena aniina wa le Madiinat al‑Khudus.
Wa achaan intu ma ahtaramtu yoom al‑sabt da,
gaaʼidiin tikhaddubu Allah foog Bani Israaʼiil be ziyaada. »
19 Wa misil da,
ana gult leehum yisiddu biibaan Madiinat al‑Khudus gubbaal leelit al‑sabt,
wakit al‑wata tabga dalma.
Wa ooreethum ma yaftahoohum lahaddi yoom al‑sabt yikammil.
Wa battaan khatteet waahidiin min naasi fi l‑biibaan achaan yadharo al‑naas ma yindasso be l‑budaaʼa.
20 Wa laakin be da kula,
al‑tujjaar jo be budaaʼa nafar nafar wa ragado barra min Madiinat al‑Khudus marra aw marrateen.
21 Wa ana hazzartuhum wa gult leehum :
« Maala tarugdu jamb al‑durdur ?
Wa kan battaan sawweetu misil da,
ana nakrubku !
» Wa min al‑yoom da battaan ma gabbalo fi yoom al‑sabt achaan yisaawugu.
22 Wa ana gult le l‑Laawiyiin yabgo taahiriin wa yaju yaharsu biibaan al‑madiina achaan yoom al‑sabt yukuun mukhaddas.
Ya Ilaahi,
fakkir foogi !
Ma tansa al‑amal al‑ana sawweetah da wa hinn foogi be rahmatak al‑kabiire.
23 Wa battaan fi l‑wakit da,
ana chift al‑Yahuud akhado awiin min sukkaan Achduud wa Bani Ammuun wa l‑Muwaabiyiin.
24 Wa nuss min iyaalhum bihajju be lukhkhat Achduud wa waahidiin bihajju be lukhkhaat hana buldaan aakhariin,
laakin waahid minhum kula ma baʼarif bihajji be lukhkhat al‑Yahuud.
25 Wa misil da,
ana harajt abbahaathum wa laʼantuhum wa daggeet waahidiin minhum wa mallatt suufhum.
Wa hallaftuhum be usum al‑Rabb wa gult leehum :
« Ma tantu banaatku le awlaadhum wa ma tichiilu banaathum le awlaadku wa la le nufuusku intu kula.
26 Misil intu taʼarfuuh,
Suleymaan malik Israaʼiil aznab be akhiidtah le l‑awiin al‑min al‑umam dool.*
Wa laakin fi buldaan al‑aalam,
ma fi malik mislah hu achaan Ilaahah habbaah wa sawwaah malik le kulla Bani Israaʼiil.
Wa be da kula,
al‑awiin al‑min al‑umam dool lazzannah wa hu aznab !
27 Wa intu kula,
be l‑fasaala al‑katiire al‑gaaʼidiin tisawwuuha be akhiidit al‑awiin min al‑umam di,
intu gaaʼidiin tukhuunu Ilaahna.
Wa fi niiyitku,
tidooru naskut saakit walla ? »
28 Wa waahid min iyaal Yuyaadaaʼ wileed Alyaachib kabiir rujaal al‑diin,
hu kula akhad bineeyit Sanbalat al‑min hillit Huruun.
Achaan da,
ana taradtah min giddaami.
29 Ya Ilaahi,
rujaal al‑diin wa l‑Laawiyiin najjaso khidmithum wa jamaaʼithum al‑inta sawweet maʼaahum muʼaahada.
Ma tansa fiʼilhum wa laakin aakhibhum !
30 Wa ana kamaan taradt wa maragt min lubbuhum kulla ajnabi wa misil da,
sawweethum taahiriin.
Wa nazzamt rujaal al‑diin wa l‑Laawiyiin wa gabbaltuhum ayyi waahid fi khidimtah.
31 Misil nizaam al‑nazzamtuhum min awwal,
gult leehum yijiibu hatab le l‑dahaaya fi beet Allah fi l‑wakit al‑waajib wa yigaddumu awwal intaaj al‑yagtaʼooh min al‑ziraaʼa kula.
Ya Ilaahi,
fakkir foogi !
Be kheerak,
ma tansaani !